குறைந்த பட்ஜெட்டில் கோடை விடுமுறையை கழிக்கலாம்.. மேற்கு தொடர்ச்சி மலையில் சூப்பர் ஸ்பாட்கள்..!

வெயில் கொளுத்தி எடுக்க ஆரம்பித்துவிட்டது. வெயிலில் இருந்து தப்பிக்க எங்கே ஓடலாம் என்று தான் கூகுள் முழுக்க தேடல் தொடங்கி இருக்கிறது. அப்படி கம்மி பட்ஜெட்டில் கூட்டம் இல்லாத ஆனால் குளிர்ச்சியான மேற்கு தொடர்ச்சி மலை ஸ்பாட்களை உங்களுக்காக தேடி எடுத்து வந்திருக்கிறோம். இந்த இடங்கள் உங்கள் குடும்பத்துடன் செல்லக்கூடிய அதே நேரம் உங்கள் பட்ஜெட்டுக்குள் அடங்கும் அழகான இடங்கள்.

முதலில் இருப்பது, கர்நாடக மாநிலத்தில் உள்ள தென்னிந்தியாவின் சிரபுஞ்சி என்றும் அழைக்கப்படும் அகும்பே மலைத்தொடர். கர்நாடகாவின் சிவமொக்கா மாவட்டத்தில் அமைந்துள்ள இந்த இடத்தில் எப்போதும் குளிர்ச்சியும் லேசான சாரலும் இருக்கும். இந்த இடம் ட்ரெக்கிங் செல்லவும், கலாச்சார கிராமங்களை பார்க்க விரும்பும் மக்களுக்கும் ஏற்ற இடமாக அமையும்.

பொதுவாக எல்லோருக்கும் தமிழ்நாட்டிற்குள் மலைப் பிரதேசம் என்று சொன்னால் ஊட்டி, கொடைக்கானல் தான் நினைவுக்கு வரும். அதற்கு அருகில் உள்ள சிறிய மலைகளும் அதே இயற்கை சூழலை தரும் கூட்டம் குறைந்த இடங்களாக இருக்கும். ஆனால் அதிக சுற்றுலா பயணிகள் இந்த சின்ன இடங்களை கவனிப்பதில்லை. அப்படியான இடம் தான் வட்டக்கானல். கொடைக்கானல் அருகில் உள்ள இங்கு வட்டக்கானல் அருவி மிகவும் பிரபலமானது. ட்ரெக்கிங் செல்பவர்களுக்கு ஏற்ற வியூ பாயிண்டுகள்(view point) நிறைய உள்ளது.

திருவனந்தபுரத்தில் அமைந்திருக்கும் பொன்முடி மலையடிவாரம் உங்களை வேறு உலகத்திற்கு அழைத்துச் செல்லும் என்பதில் சந்தேகம் இல்லை. மலைப்பகுதி, நீர்வீழ்ச்சி, என்று பசுமையும் அமைதியும் போர்த்தியுள்ள இந்த  இடத்தில் காட்டு பறவைகள் மற்றும் பட்டாம் பூச்சிகளைப் பார்க்கும் வாய்ப்பை மிஸ் பண்ணிடாதீங்க.

மலை எற விருப்பம் இல்லை அனால் குளிர்ச்சியான இடத்திற்கு போக வேண்டும் என்று நீங்கள் நினைத்தால் அதற்காகவே பொள்ளாச்சி உள்ளது. தென்னை மரங்கள் சூழ்ந்த இந்த ஊரை சுற்றி  ஆனைமலை, ஆழியார் அணை, திருமூர்த்தி மலை, திருமூர்த்தி அருவி, பரம்பிக்குளம் புலிகள் சரணாலயம் எல்லாம் உங்களுக்கு நல்ல ஸ்பாட்களாக இருக்கும்.

கோவா, கர்நாடகா மற்றும் மஹாராஷ்டிரா சந்திக்கும் இடம் சோர்லா காட்ஸ். இது கோவாவில் உள்ள மேற்கு தொடர்ச்சி மலையின் ஒரு பகுதியாகும். வழக்கமாக கோவா என்றால் கடல் தான் நினைவுக்கு வரும். ஆனால் அந்த எண்ணத்தை எல்லாம் இந்த பசுமையான சோர்லா காட் மலை மாற்றிவிடும். இங்குள்ள குளிர்ச்சியான அருவி மற்றும் மலைகளில்  ட்ரெக்கிங் போகும் அனுபவங்களே தனித்துவமாக இருக்கும்.