12 மணிநேரத்தில் ஹைதராபாத் சுற்றுலா.. தெலுங்கானா போக்குவரத்தின் அசத்தல் பேக்கேஜ்..

நீண்ட விடுமுறைகள் இல்லாத நேரம், ஒரு நாள் சுற்றுலாக்கள் எல்லாம் இருந்தால் நன்றாக இருக்குமே என்று தோன்றும். அப்படி யோசிக்கும் மக்களுக்காக தெலுங்கானா மாநில சாலைப் போக்குவரத்துக் கழகம் (TSRTC) வார இறுதி நாட்களில் செல்லக்கூடிய 12 மணிநேர சுற்றுலா திட்டத்தை அமல்படுத்தி வருகிறது.

அந்த திட்டத்தின் கீழ் காலை முதல் மாலை வரையான 12 மணி நேரத்தில் ஹைதராபாத் நகரத்தின் முக்கிய இடங்களை சுற்றி பார்க்கும் சிறப்புப் பேக்கேஜை வழங்குகிறது. 'ஹைதராபாத் தர்ஷன் பேக்கேஜ்' என்று அழைக்கப்படும் இந்த திட்டத்தின் கீழ் என்னவெல்லாம் பார்க்கலாம் என்ற  விவரங்களை இங்கே உங்களுக்கு சொல்கிறோம்.

சென்னையில் இருந்து ஹைதராபாத்துக்கு தினசரி ரயில்கள் போகின்றன. மாலை 4 மணிக்கு சென்னையில் இருந்து கிளம்பினால், காலை 5 மணிக்கு ஹைதராபாத் சென்று சேரும். அதற்கு முன்னர் இருக்கும் செகந்தராபாத் ரயில் நிலையத்தில் இருந்து தான் இந்த பயணம் தொடங்க இருக்கிறது.

பூங்காக்கள், அரண்மனைகள், அருங்காட்சியகம், ஹுசைன் சாகர் போன்றவற்றை ஹைதராபாத்தில் 12 மணி நேரத்தில் பார்க்கலாம். ஹைதராபாத்தில் உள்ள சுற்றுலா தலங்களை ஒரே நாளில் பார்க்க விரும்புவோருக்கு இந்த டூர் பேக்கேஜ் பயனுள்ளதாக இருக்கும். சுற்றுலா பயணிகள் ஆன்லைனில் அல்லது ஆஃப்லைனில் டிக்கெட் முன்பதிவு செய்யலாம்.

டிஎஸ்ஆர்டிசி ஹைதராபாத் தர்ஷன் டூர் செகந்திராபாத் ரயில் நிலையம் வெளியில் உள்ள  ஆல்பா ஹோட்டலில் இருந்து காலை 8 மணிக்கு தொடங்குகிறது. சுற்றுலா பயணிகள் TSRTC சுற்றுலா பேருந்தில் ஏறினால், காலை 9 மணி முதல் 10 மணி வரை பிர்லா மந்திரைப் பார்வையிடலாம்.

அதன் பின்னர் சௌமஹல்லா அரண்மனையை காலை 10.30 மணி முதல் மதியம் 12.30 மணி வரை பார்க்கலாம். முடிந்ததும் தாராமதி பரதாரி ரிசார்ட்டில் உள்ள ஹரிதா ஹோட்டலில் மதியம் 1 மணி முதல் 1.45 மணி வரை மதிய உணவு.

உணவு முடிந்ததும் ஹைதிராபாத் நகரத்தின் முக்கியமான கோல்கொண்டா கோட்டையை மதியம் 2 மணி முதல் 3.30 மணி வரை பார்வையிடலாம். கோட்டையை சுற்றி பார்க்க இந்த நேரம் சரியாக இருக்கும். ஹைதராபாத் நிஜாமின் இடிந்த மாளிகை, பீரங்கிகள், படை பயிற்சித்தளம் என்று எல்லாவற்றையும் பார்க்கலாம்.

மாலை 4 மணி முதல் 5 மணி வரை துர்கம் செருவு பூங்காவை   காணலாம். கேபிள் பிரிட்ஜில் மாலை 5.30 மணி முதல் 6 மணி வரை உலா வரலாம். மாலை 6.30 மணி முதல் 7.30 மணி வரை என்டிஆர் பூங்கா மற்றும் ஹுசைன் சாகர் ஆகிய இடங்களுக்குச் செல்லலாம். இரவு 8 மணிக்கு செகந்திராபாத்தில் உள்ள ஆல்பா ஹோட்டலை வந்தடைவதோடு சுற்றுப்பயணம் முடிவடைகிறது.

TSRTC ஹைதராபாத் தர்ஷன் டூர் பேக்கேஜ் விலை மெட்ரோ எக்ஸ்பிரஸில் பெரியவர்களுக்கு ரூ.250 மற்றும் குழந்தைகளுக்கு ரூ.130. மெட்ரோ சொகுசு ஏசி பேருந்தில் பெரியவர்களுக்கு ரூ.450, குழந்தைகளுக்கு ரூ.340 செலுத்த வேண்டும். இது வார இறுதி சுற்றுலா தொகுப்பு மட்டுமே.

TSRTC ஹைதராபாத் தர்ஷன் டூர் பேக்கேஜை www.tsrtconline.in இணையதளத்தில் ஆன்லைனில் பதிவு செய்யலாம். மேலும் விவரங்களுக்கு 040 23450033 அல்லது 040 69440000 என்ற எண்ணில் தொடர்பு கொள்ளவும்