இங்குள்ள எந்த பொருளையும் தீண்டக்கூடாது... வினோத விதிகள் கொண்ட இந்திய கிராமம்!

இமாச்சலப் பிரதேசம் மாநிலத்தில் கடல் மட்டத்திலிருந்து 8,700 அடி உயரத்தில் ஆற்றின் கரையில் மலானா என்ற கிராமம் அமைந்துள்ளது. அழகிய மலைகள் , பள்ளத்தாக்குகள், நதிகள் என்று இயற்கை கொஞ்சும் இந்த கிராமத்தில் தான் வினோதமான சில விதிமுறைகளும் உள்ளன.

இந்த கிராமத்து மக்கள் தங்களை அலெக்சாண்டரின் வழித்தோன்றல்கள் என்று கருதுகின்றனர். ஆரிய வம்சத்தின் தூய்மை மாறாமல் இருக்கும் ஒரே இனமாக தங்களைக் கருதுகின்றனர். அதனால் வெளி மக்கள் யாரும் தங்களை விரலால் கூட தீண்டக்கூடாது என்று விதி போடுகின்றனர்.

அங்குள்ள மனிதர்களை மட்டுமல்ல அந்த கிராமத்தில் உள்ள எந்த பொருளையும், கட்டிடங்களின் சுவர்களை கூட வெளியில் இருந்து செல்லும் மக்கள் தொட தடை விதிக்கப்படுகிறது.

விதியை மீறி  ஏதேனும் பொருளையோ  நபரையோ தொட்டால் கடுமையான தண்டனைக்கு ஆளாக்கப்படுவர். கூடுதலாக அபராதம் வேறு விதிக்கப்படுகிறது,

மலானா கிராமத்திற்கு அருகே அமைந்துள்ள பார்வதி பள்ளத்தாக்கில் வளரும் கஞ்சா செடிகளில் இருந்து தயாரிக்கப்படும் "மலானா கிரீம்" உலகம் முழுவதும் பிரபலமானது.. மலானா கிரீம் உலகின் உயர்தர தூய்மையான ஹாஷிஷ் அல்லது போதைப்பொருள் என்று கருதப்படுகிறது. அதற்காக 1994 மற்றும் 1996 இல் இரண்டு முறை High Times Magazine Cannabis Cup விருதுகளையும் வென்றுள்ளது.

மலானாவில் உள்ள பெண்கள் அறுவடை செய்வது, மரம் வெட்டுதல், விற்பது, சமைப்பது போன்ற அனைத்தையும் செய்கிறார்கள் என்றும், ஆண்கள் அனைவரும் இரவும் பகலும் கஞ்சாவை புகைக்கும் வேலையைத்தான் செய்வார்கள் என்றும் கூறப்படுகிறது!

அதுமட்டுமல்லாமல், தங்கள் கோவில்களில் பயன்படுத்தும் "கனாஷி" மொழியும் மற்றவர்கள் நுழையவோ அல்லது கற்றுக்கொள்ளவோ ​​முடியாத அளவுக்கு புனிதமானது, கட்டுப்பாடு உடையது என்று அவர்கள் நம்புகிறார்கள்.

இந்த கிராமத்து மக்கள் தங்களை தவிர இந்த உலகத்தில் உள்ள மற்ற எல்லா மக்களும் குறைந்தவர்கள் என்று நினைக்கின்ன்றனர். அருகில் இருக்கும் குள்ளு பள்ளத்தாக்கு மக்களிடம் கூட பழகுவதில்லை. இந்திய அரசாங்கத்தின் விதியையே துச்சமாக கருதுபவர்கள்.