என்ன அவசரம்.. நிதானமாக ரசித்து பயணம் செய்யலாம் என்பவரா நீங்க..? உங்களுக்கான லிஸ்ட்..!

இன்றைய தேதியில் எல்லோரும் ஏதோ ஒன்றை நோக்கி ஓடிக்கொண்டே இருக்கிறோம். நின்று நிதானமாய் ஒரு வேலையை செய்யலாம் என்ற எண்ணம் யாருக்கும் இருப்பதில்லை. வேலைக்கு நடுவில் ட்ரிப் போனால் கூட அங்கேயும் வேலை குறித்த சிந்தனை. அல்லது கிடைக்கும் 4 நாட்களில் 40 இடங்களுக்கு போக திட்டம் போட்டு விடுவோம்.

ஒரு இடத்தை கூட பொறுமையாக முழுமையாக சுற்றி பார்த்திருக்க மாட்டோம். எல்லாம் பார்ப்பது முக்கியம் அல்ல. ஒரு இடத்தை பார்த்தால் கூட அதை முழுமையாக ரசித்து அனுபவிப்பது தான் முக்கியம். அப்படி நின்று நிதானமாக அனுபவிக்க ஏங்கும் மக்கள் அதற்கான இடங்களை தேடுவார்கள். அவர்களுக்கு தான் இந்த லிஸ்ட்…

அசாம் மாநிலத்தில் பிரம்மபுத்ரா நதிக்கு நடுவில் மஜூலி என்ற தீவு உள்ளது. கடலுக்கு நடுவில் தீவை பார்த்திருப்போம். நதிக்கு நடுவில் உள்ள தீவை பார்ப்பது அரிது. அப்படியான மஜூலி தீவு பசுமை போர்த்தி அழகாக காட்சியளிக்கும். படகின் மூலம் தீவிற்கு சென்று அதன் அழகை நாள் முழுக்க ரசிக்கலாம்.

மிசோரம் இந்தியாவில் மிகக் குறைவான மக்கள் பார்வையிட்ட மாநிலங்களில் ஒன்றாகும். எனவே தலைநகர் ஐஸ்வால் முதல் அமைதியான சம்பாயின் கிராமம் வரை எல்லாமே சுத்தமாகவும், தனித்துவமான அழகோடு இருக்கும். இந்த பயணம் உங்களுக்கு மறக்கமுடியாத புது அனுபவங்களை கொடுக்கும்.

அதேபோல கிழக்கு கடைக்கோடி மாநிலமான அருணாச்சல பிரதேசத்தில் உள்ள மெச்சுக்கா என்ற மலைப்பகுதியும் உங்களை உறைய வைக்கும் அழகு காட்சிக்கு நடுவில் நிறுத்தும். இமயமலை சாரல், தேயிலை தோட்டம், பசுமையான சூழல் என்று அசத்தல் அனுபவத்தை அளிக்கும்.

கர்நாடக கரையில் உள்ள உடுப்பிக்கு பல முகங்கள் இருக்கிறது. அழகிய வெண்மணல் கடற்கரை, பாராசைலிங், உடுப்பி உணவு, கடலோர பயணம், என்று அடுக்கிக்கொண்டே போகலாம். எல்லாவற்றையும் பொறுமையாக அனுபவித்து முடிக்க 1 வாரம் கூட பத்தாது. கோசம்பரி , கோடதேக்லு , அவலகி உபகாரி மற்றும் ஹாலிக்ஸ் இதெல்லாம் மிஸ் பண்ணாம சுவைத்து பாருங்க.

நம் அருகே உள்ள இடத்தின் பெரும்பாலும் நமக்கு தெரிவதில்லை. வால்பாறையை போல ஒரு சொர்க்கம் கிடைப்பது அரிது. 40 ஹேர்பின் பெண்டுகள் கடந்து போகும் போது அங்கே அழகிய காடுகள் கீச்சிடும் பறவைகளும் நம்மை கைபிடித்து பூமியின் சொர்க்கத்திற்கே அழைத்துச்செல்லும். மேற்கு தொடர்ச்சி மலையின் அழகான பறவைகளை இங்கே அதிகம் காணலாம்

பயண டைரிகளை சேர்பவர்களுக்கு கேரளாவில் உள்ள கண்ணூர் பெரிய வரப்பிரசாதம். கண்ணூரில் உள்ள முழப்பிலங்காட் கடற்கரை டிரைவ்-இன் அனுபவத்திற்கு ஏற்றது. உடுப்பியை போலவே கண்ணூர் பாரம்பரிய உணவுகளை நம்மை அவர்களாவது வாழ்க்கை முறையை அனுபவிக்க ஒரு வாய்ப்பை தரும்.

பொறுமையாக பயணத்தை அனுபவிக்க மற்றொரு முக்கியமான இடம் அந்தமான், கடற்கரை, பழமையான சிறைச்சாலை, தீவுக்கூட்டங்கள் என்று அனைத்தையும் ஒருங்கே கொண்ட இடம். பவளப்பாறைகளை நீரில் பார்க்கலாம். அதே போல டைவிங் செய்ய ஏற்ற இடம்.

யாரும் பெரிதாக ஆராயாத மற்றொரு பகுதி லக்ஷத்தீவுகள். மாலத்தீவுகளுக்கு கிளம்பும் மக்கள் இங்கே இருக்கும் அழகான லக்ஷத்தீவுகளை மறந்து விடுகிறார்கள். பவளப்பாறைகள் சூழ்ந்த சிறு சிறு தீவுகள் சேர்ந்த இந்த தீவு கூட்டத்திற்கு இடையர் படகுகளில் பயணிக்கும் அனுபவம் அலாதியானது.