சம்மருக்கு கோவா டூர் போக பிளானா.? நீங்கள் கட்டாயம் பார்க்க வேண்டிய அற்புதமான 5 இடங்கள்.!

சுற்றுலா இடங்கள் குறித்து நண்பர்களுடன் அமர்ந்து நீங்கள் பரிசீலனை செய்யும்போது, கோவா என்ற பெயரை கேட்ட உடனே நம் மனதில் குதூகலம் கிளம்பிவிடும். கோவாவுக்கு சென்றிருந்தாலும், சென்றதில்லை என்றாலும் அதுகுறித்து கற்பனைகள் நம் மனதில் கொடிகட்டி பறக்கும்.

குறிப்பாக கோவா சுற்றுலா குறித்த டிராவல் வீடியோக்களை மட்டுமாவது நாம் பார்த்திருப்போம். ஆக, கோவாவில் பறந்து விரிந்த கடற்கரைகள் எப்படி இருக்கும், காசினோ விளையாட்டுகள், கேளிக்கை நிகழ்ச்சிகள் என்று நம் மனதில் கற்பனை திரை விரியத் தொடங்கியிருக்கும்.

சரி, இந்த முறையேனும் கோடை விடுமுறையில் கோவாவுக்கு சுற்றுலா சென்றே தீர வேண்டும் என்று உங்கள் மனதில் திடமாக முடிவு செய்யும் பட்சத்தில், கீழ்காணும் 5 இடங்களை நாம் கட்டாயம் பார்க்க வேண்டும். கண்ணுக்கு ரம்மியமான இந்த இடங்களை நீங்கள் தவறவிடவே கூடாது.

இம்மாகுலேட் தேவாலயம் : போர்ச்சுகீசிய ஆட்சியாளர்கள் முலமாக கடந்த 1541ஆம் ஆண்டில் கட்டப்பட்டது ‘தி அவர் லேடி ஆஃப் தி இம்மாகுலேட் கன்செப்சன் சர்ச்’ ஆகும். அதாவது, ஏறக்குறைய 6 நூற்றாண்டுகளை நெருங்கிக் கொண்டிருக்கின்ற தேவாலயம் இதுவாகும். போர்ச்சுகீசிய பரோக் கட்டடக் கலை வடிவத்தில் இந்த தேவாலயம் கட்டப்பட்டுள்ளது. எண்ணற்ற திரைப்படங்களிலும் இதனை நீங்கள் பார்த்திருப்பீர்கள்.

பசலிக்கா : ‘தி பசலிக்கா ஆஃப் பார்ன் ஜீசஸ்’ என்ற நினைவுச் சின்னம் கடந்த 1605ஆம் ஆண்டில் கட்டப்பட்டது ஆகும். இதுவும் 5 நூற்றாண்டுகளை கடந்து அதே அழகியலுடன் காட்சியளிக்கிறது. புனித பிரான்சிஸ் சேவியரின் நினைவு இல்லமாக கருதப்படும் இது உலகப் பாரம்பரிய சின்னங்களின் பட்டியலில் உள்ளது.

போர்ச்சுகீசிய கோட்டை : அரபிக் கடலோரத்தில் 17ஆம் நூற்றாண்டில் கட்டப்பட்ட கோட்டை கோவாவுக்கு சுற்றுலா வருகின்ற மக்களின் விருப்பத்திற்குரிய தேர்வாக இருக்கிறது. டச்சு ஆட்சியாளர்களை போரில் வீழ்த்தி வெற்றி அடைந்ததன் நினைவாக போர்ச்சுகீசிய ஆட்சியாளர்கள் இந்த கோட்டையை எழுப்பினர்.

வெகேடார் கடற்கரை : பறந்து விரிந்த மணல் பரப்பும், சலசலவென்ற ஓசையுடன் இரைந்து வரும் அலைகளுமாக காட்சி அளிக்கக் கூடியது வெகேடார் கடற்கரை ஆகும். பார்டிகளை கொண்டாடவும், இசை நிகழ்ச்சிகளை நடத்தவும் இந்த கடற்கரை பிரபலமானதாக உள்ளது. குறிப்பாக, இரவு நேர கேளிக்கை உலகமாக இது கருதப்படுகிறது.

மகோஸ் கோட்டை : இதுவும் போர்ச்சுகீசிய மன்னர்கள் கட்டிய கோட்டை தான். கடந்த  1,551ஆம் ஆண்டில் கட்டியுள்ளனர். 19ஆம் நூற்றாண்டில் பெருமளவு இது சேதமடைய தொடங்கிவிட்டது. இந்த நிலையில் 1993ஆம் ஆண்டு இதனை புதுப்பிக்கும் பணியை ஜெரார்டு டா கன்ஹா என்ற கட்டட வடிவமைப்பாளர் மேற்கொண்டார். தற்போது அனேக சுற்றுலாப் பயணிகளின் விருப்பத்திற்குரிய இடமாக உள்ளது.