உலகத்தில் விமான நிலையங்களே இல்லாத நாடுகள் இத்தனை இருக்கா... லிஸ்ட் இதோ..!

உலகில் இன்றும் விமான நிலையங்கள் இல்லாத நாடுகள் உள்ளது என்று சொன்னால் நம்ப முடிகிறதா? இப்போதுள்ள நிலையில் அநேக பெருநகரங்களிலேயே விமான நிலையம் வந்துவிட்டது. எப்படி ஒரு நாட்டில் விமான நிலையம் இல்லாமல் இருக்கும் என்று மண்டையை உருட்டிக்கொண்டு இருப்பீர்கள். புரிகிறது. அப்படி விமான நிலையங்கள் இல்லாத நாடுகளை பற்றி தான் இதில் பார்க்க இருக்கிறோம்.

உலகின் மிகச்சிறிய நாடான வாடிகன் நகரத்தில் விமான நிலையம் கிடையாது. இதன் மொத்த மக்கள் தொகையே சுமார்  ஆயிரம்தான் இருக்கும். உலகின் சிறிய நாடு என்று சொல்லும் போதே அதன் நிலப்பரப்பு பற்றி தெரிந்துவிடும். இடம் இல்லையாம்பா. அது தான் விமான நிலையம் இல்லாததற்கு காரணம். அதே போல கடல் அல்லது நதி வழி போக்குவரத்தும் கிடையாது. சாலை போக்குவரத்து மட்டும் தான். இருப்பினும், சியாம்பினோ மற்றும் ஃபியூமிசினோ உள்ளிட்ட மற்ற விமான நிலையங்கள் அருகே தான் உள்ளன.

வாடிகன் நகருக்கு அடுத்தபடியாக உலகின் இரண்டாவது சிறிய நாடு மொனாக்கோ. மூன்று பக்கங்களிலும் பிரான்சால் சூழப்பட்டுள்ள இந்த நாட்டிற்கு தனியாக விமான நிலைய வசதி இல்லை. மொனாக்கோவை விமானம் மூலம் அடைய நினைத்தால் , பிரான்சின் நைஸ் கோட் டி'அஸூர் விமான நிலையத்தில் தரையிறங்கிய பிறகு வாடகை வண்டி அல்லது படகில் செல்ல வேண்டும்.

உலகின் பழமையான  நாடுகளில் ஒன்றான சான் மரினோ முற்றிலும் இத்தாலியால் சூழப்பட்டது. இதுவும் நிலப்பரப்பில் மிகவும் சிறியதாக இருப்பதால் இங்கு விமான நிலையம் இல்லை. ஆனால், இதன் சாலை அமைப்புகள் இதை சுற்றியுள்ள அனைத்து பகுதிகளுக்கும் மக்களை செல்ல அனுமதிக்கிறது. நாடு சிறியதாக இருந்தாலும், புளோரன்ஸ், போலோக்னா, இத்தாலி, வெனிஸ் மற்றும் பிசா போன்ற பல விமான நிலையங்கள் இதற்கு அருகிலேயே அமைந்துள்ளன.

மலைகளுக்கு நடுவே அமைந்துள்ள லிச்சென்ஸ்டீன் எனும் நாடு மொத்தமே சுமார் 75 கி.மீ பரப்பளவு தான் கொண்டிருக்கிறது. அதிக செங்குத்தான நிலப்பரப்புகள் இல்லை என்றாலும் விமான நிலையம் அமைப்பதற்காக சூழல் இங்கு இல்லை. மேலும் கிழக்கே ரைன் நதி, மேற்கில் ஆஸ்திரிய மலை இருப்பதால் விமான நிலையம் அமைப்பது சாத்தியம் இல்லை. இந்த நாட்டிற்கு போக்குவரத்து அம்சமாக கார், பஸ் உள்ளது. அருகில் உள்ள விமான நிலையம் என்று பார்த்தால் 120 கிமீ தொலைவில் உள்ள சூரிச் விமான நிலையம்  உள்ளது.

மற்ற நாடுகளைப் போல சிறியதாக இல்லாவிட்டாலும், அன்டோரா  ஒரு பெரிய பரப்பளவைக் கொண்டுள்ளது. அது பல விமான நிலையங்களை தனக்குள் வைத்துக்கொள்ளும் அளவு இருந்தாலும், இங்கு பிரச்னை மலைகள்தான். இந்த நாடு பிரான்ஸ் மற்றும் ஸ்பெயினுக்கு இடையே பைரனீஸ் மலைகளால் முழுமையாக சூழப்பட்டுள்ளது. 3000 மீ உயரத்திற்கு இதன் சிகரங்கள் உள்ளன. அத்தகைய உயரத்தில் விமானம் பறப்பது சற்று ஆபத்தானதாகவும் கடினமாகவும் இருக்கும். அதனால் அன்டோரா எந்த விமான நிலையமும் வேண்டாம் என்று முடிவு செய்தது. ஆனால்  200 கிமீ சுற்றளவில் பார்சிலோனா, லெரிடா ,ஜிரோனா போன்ற விமான நிலையங்கள் உள்ளன.