சிலப்பதிகார கதையோடு பொங்கல் லீவைக் கொண்டாட பக்காவான பூம்புகார் பிளான் இதோ!

சிலப்பதிகாரம் பற்றி படித்துக்கொண்டிருக்கும் பள்ளி படிக்கும் மாணவர்கள் ஆனாலும் சரி, குழந்தைகள் ஆனாலும் சரி அந்த கதையை சொல்லி அதே நேரம் கடலோடு நடைபோட ஏற்ற இடமாக பூம்புகார் இருக்கும்.

காப்பியங்களிலும் கதைகளிலும் காவேரிபூம்பட்டினம் என்று அழைக்கப்படும் பூம்புகார் அல்லது புகார் நகரம்  நாகப்பட்டினம் மாவட்டத்தில் அமைந்துள்ளது. இந்த கடற்கரை பல்வேறு வரலாறுகளை தன்னுள் வைத்துள்ளது. ஒரு காலத்தில் பரபரப்பான துறைமுகமாக இருந்த இந்த நகரம் தற்போது வெறும் எச்சங்களோடு இருக்கிறது.

காவிரி ஆறு கடலில் கலக்கும் இந்த இடம் தமிழ்நாட்டை ஆண்ட சோழ வம்சத்தின் தற்காலிக தலைநகராகவும் இது இருந்தது. கி.பி. 500 இல் ஏற்பட்ட சுனாமியால் பெரும்பாலான நகர பகுதி நீரில் அடித்துச்செல்லப்பட்டது. நீருள் மூழ்கியது. பின்னர் அகழ்வாராய்ச்சியில் முக்கியமான டெரகோட்டா சிலைகள் மற்றும் மட்பாண்டங்கள் கண்டுபிடிக்கப்பட்டுள்ளன.

எலஞ்சி அல்லது இலஞ்சி மன்றம் பூம்புகாரில் உள்ள மற்றொரு அற்புதமான சுற்றுலாத் தலமாகும். சிலப்பதிகாரத்துடன் தொடர்புடைய இளஞ்சி மன்றத்தில் ஒரு குளம் உள்ளது. அந்த குளத்து நீர், நோய்களைக் குணப்படுத்தும் அதிசய சக்திகளைக் கொண்டதாக காவியத்தில் குறிப்பிடப்பட்டுள்ளது. அதற்காகவே மக்கள் பலர் இங்கே வருகின்றனர்.

சிலப்பதிகார கலைக்கூடம் என்பது தமிழ் காவியமான சிலப்பதிகாரத்திற்காக அர்ப்பணிக்கப்பட்ட 7 அடுக்குகளைக் கொண்ட அமைப்பாகும். கதை தொடர்பாக கண்டுபிடிக்கப்பட்ட பொருட்கள் மற்றும் காவியத்தை சார்ந்து மாமல்லபுரம் கலைக்கல்லூரி மாணவர்கள் செய்த படைப்புகள் இங்கே காட்சிப்படுத்தப்பட்டுள்ளன.

கொற்ற பந்தல் என்ற இடமும் சிலப்பதிகார கதையால் ஈர்ப்பு பெற்ற மற்றொரு சுற்றுலாத்தலமாகும். காப்பியத்தில் கொற்ற பந்தல் என்பது மாதவியின் நிச்சயதார்த்தம் நடந்தஇடமாகும். பார்வையாளர்களை பிரமிக்க வைக்கும் வகையில், மேடையின் மேல் உள்ள விதானம் இன்னும் பல அழகான படங்களுடன் உள்ளது.

பூம்புகாரில் அமைந்துள்ள மாசிலாமணி நாதர் கோயில் கி.பி 14 ஆம் நூற்றாண்டில் கட்டப்பட்டது. சுனாமியில் இருந்து தப்பி இத்தனை ஆண்டுகள் தாக்கு பிடித்த இது அன்றைய காலகட்ட கட்டிடக்கலை பாணிக்கு ஒரு அரிய உதாரணமாக நிற்கிறது.

பூம்புகாரில் மற்றொரு முக்கிய இடம் டேனிஷ் கவர்னர் மாளிகை. 1784 ஆம் ஆண்டு டச்சு கவர்னர் தங்குமிடமாக கட்டப்பட்ட இந்த மாளிகை இப்போது பூம்புகாரில் உள்ள தமிழ்நாடு சுற்றுலாத் துறையின் அலுவலகமாக செயல்படுகிறது.

பூம்புகாரில் உள்ள சீயோன் தேவாலயம் 1701 ஆம் ஆண்டு பூம்புகாரில் முதலில் குடியேறிய டச்சுக்காரர்களால் கட்டப்பட்டது. ஆங்கிலேயர்களால் இந்த இடம் கைப்பற்றிய பின்னர் 1782 இல் ஒரு முறையும் 1784 இல் இரண்டாவது முறையும்  திருத்தி கட்டப்பட்டது

நதிகள் கடலில் கலக்கும் காட்சி என்பது எல்லா இடங்களிலும் பார்க்க முடியாது. ஆனால் காவிரி கடலில் கலக்கும் அறிய  காட்சியை இங்கே காண முடியும்.

கண்ணகி பிறந்த நாடாக வருணிக்கப்படும் இந்த நகரம் சிலப்பதிகாரத்தில் மட்டும் அல்லாது தமிழ் வரலாற்றிலும் முக்கியத்துவம் வாய்ந்த இடம். இதை குடும்பத்துடன் பார்த்து வாருங்கள்.