பிரேக்-அப் ஆன காதலர்களின் நினைவுப் பரிசுகளை பொக்கிஷமாக பாதுகாக்கும் மியூசியம் : எங்க இருக்கு தெரியுமா.?

ஒரு காதல் முறிந்து செல்லும் போது விட்டுச்செல்லும் நினைவுச் சின்னங்களைக் கையாள்வதற்கு நம் அனைவருக்கும் வெவ்வேறு வழிகள் உள்ளன. சிலர் 96 படத்தின் ராம் கதாபாத்திரம் பாணியில் ட்ரங்கு பெட்டியில் பத்திரப்படுத்தி வைத்திருப்பர். சிலர் அன்றைய இரவே அதை எல்லாம் தூக்கி போட்டு எரித்து விடுவர்.

காதலுக்கு மட்டும் இல்லை எந்த உறவாக இருந்தாலும் அந்த உறவிற்கு என்று நம் மனதில் தனி இடம் இருக்கும். அதை வேறு  யாராலும் நிரப்ப முடியாது என்ற எண்ணமும் இருக்கும் . தாய்-மகள், தந்தை- மகள்- தந்தை -மகன்- அண்ணன்- தம்பி, அக்கா- தங்கை, நட்பு என்று எல்லாமே அதிக மதிப்பு கொண்டது தான் அது முறியும் பொது ஏற்படும் வலியும் அதிகம்.

குரோஷிய கலைஞர்களான ஒலிங்கா விஸ்டினா மற்றும் டிரேசன் க்ரூபிசிக் ஆகியோர் பிரிந்தபோது, ​​அவர்களது அன்பின் உணர்வுபூர்வமான பரிசு பொருட்களை பிரிந்து செல்ல அவர்கள் தயக்கம் காட்டியுள்ளனர். அப்போதுதான் உடைந்த உறவுகளின் அருங்காட்சியகத்தைத் திறக்க அவர்களுக்கு ஒரு ஐடியா தோன்றியுள்ளது.

என்ன சொல்லுங்கள் ஒரு உறவு உடையும்போது அவர்கள் பயன்படுத்திய அல்லது நமக்கு பரிசாக கொடுத்த பொருளை பார்க்கும் போது அவர்களுடனான நினைவுகள் எல்லாம் ஒரு படமாக நமது நினைவில் வந்து போகும்.

முதலில் என்ன இது உடைந்த உறவுகளின் நினைவுகளை வைத்து அருங்காட்சியம் என்று மக்கள் பேசியுள்ளனர். ஆனால் காலப்போக்கில் எல்லா இடங்களிலிருந்தும் மக்கள் தங்கள் நினைவூட்டல் பொருட்களை நன்கொடையாக இந்த அருங்காட்சியகத்திற்கு வழங்கத் தொடங்கினர்.

கரடி பொம்மைகள், கடிதங்கள், காலணிகள், விளையாட்டு பொருட்கள், ஒரு பெண்ணின் கண்ணீர் நிரப்பப்பட்ட ஒரு சிறிய பாட்டில், ஒரு கோடாரி , டேசர் துப்பாக்கி, திருமண கவுன்கள் என்று அடுக்கிக்கொண்டே போகலாம்.

அதுமட்டும் இல்லாமல், இதன் வெற்றியைத் தொடர்ந்து உடைந்த உறவுகளின் இரண்டாவது அருங்காட்சியகம் 2016 இல் லாஸ் ஏஞ்சல்ஸில் திறக்கப்பட்டது .

தற்காலிகமாக இருந்த இந்த அருங்காட்சியகம் குரோஷியாவில் ஒரு நிரந்தர இடத்தை தனக்கென ஒதுக்கி கொண்டது. இந்த அருங்காட்சியகம் குரோஷிய தலைநகர் ஜாக்ரெப்பில்-அப்பர் டவுனில் உள்ள குல்மர் அரண்மனையில் அமைந்துள்ளது.

குரோஷியாவில் உள்ள உடைந்த உறவுகளின் அருங்காட்சியகத்திற்கான நுழைவுக் கட்டணம் சுமார். 50 குரோஷிய குனா- இந்திய மதிப்பில் சுமார் 580 ரூபாய் ஆகும்.