இதெல்லாம்தான் அஜித் போன ரூட்.. பைக் ட்ரிப்பில் எங்கெல்லாம் சென்றார் தெரியுமா?

தமிழ் திரைப்பட உலகில் தனக்கென தனி ஸ்டைலும், தனி ரசிகர் பட்டாளத்தையும் பெற்றவர் தான்  அஜித். அமராவதி படம் தொடங்கி துணிவு வரை அவரது ஒவ்வொரு  படங்களும்  வசூலை அள்ளித்தந்தவை தான். ஆனால் படங்களைத் தாண்டி அஜித் செய்யும் பல விஷயங்கள் இளைஞர்களை பெரிதளவில் ஈர்த்து வருகிறது.

நடிப்பைத் தாண்டி, ஐஐடி மெட்ராஸ் மாணவர்களுக்கு டிரோன் செய்வதில் உதவி, பைக் தொழில்நுட்பங்கள் கற்றல், துப்பாக்கி சுடுதல், உலக சுற்றுலா என்று பல ஆங்கிள்களில் அசத்திவருகிறார் அஜித். அதன் செய்திகளும் படங்களும் தான் இணையத்தையும் கலக்கி வருகிறது.

வினோத் இயக்கிய வலிமை படத்தின் வெற்றியைத் தொடர்ந்து நடிகர் அஜித் தனது பைக் பயணத்தைத் தொடங்கினார்.  முதலில்   2021  ஆண்டில், தமிழகத்தின் வெள்ளோட்டில்  இருந்து தனது பயணத்தைத் தொடங்கினார். இந்தியாவின் பல்வேறு மாநிலங்களில் உள்ள இடங்களுக்கு தனது பைக்கில் பயணம் செய்து சுற்றிய அஜித் அதன் பிறகு தனது 61வது படத்தின் படப்பிடிப்பில் கலந்து கொண்டார். படத்தின் 80 சதவீத படப்பிடிப்பு முடிந்த பிறகு மீண்டும் இந்தியாவில் பைக் பயணத்தை மீண்டும் தொடங்கினார்.

துணிவு பட படப்பிடிப்புக்கு பின்னர் அவர் தனது சர்வதேச சுற்றுலாவைத் தொடங்கினார். அவர் பூட்டான், நேபால் உள்ளிட்ட நாடுகளை பைக்கில் சுற்றி முடித்துள்ளார். இதனையடுத்து மகிழ் திருமேனி இயக்க இருக்கும் 'விடாமுயற்சி'க்கான அறிவிப்பு வந்ததை அடுத்து தனது பைக் ட்ரிப்புக்கு சற்று ஓய்வு கொடுத்துவிட்டு பட வேலைகளை தொடங்க இருக்கிறார்.

நிலையில் , அவர் சென்று வந்த இடத்தின் வரைபடத்தை அவரது மேனேஜர் வெளியிட்டுள்ளார். நடிகர் அஜித் தனது ரசிகர்களுக்கு பைக் ரெய்டுகளில் எவ்வளவு ஆர்வம் காட்டுகிறார் என்பதை இந்த படங்கள் நிரூபித்து வருகின்றன. பைக்கில் உலகம் சுற்றும் முயற்சியை எடுத்து அதை சாதித்து வருகிறார் அஜித்.

துணிவு படத்தின் படப்பிடிப்பின் போது இடைவெளி கிடைக்கும் போதெல்லாம் அஜித் பைக்கில் ரெய்டு நடத்தினார். அந்த பயணத்தில், சண்டிகர், மணாலி, சர்ச்சு, லே, நுப்ரா பள்ளத்தாக்கு, பாங்காங் டிசோ, டிசோ மோரிரி, கார்கில், ஸ்ரீநகர், ஜம்மு, சண்டிகர், ஹரித்வார், ரிஷிகேஷ், கேதார்நாத் மற்றும் பத்ரிநாத் போன்ற இடங்களை பார்த்து வந்தார்.

படப்பிடிப்பு முடிந்து, இமயமலைக்கு அருகில் உள்ள பல்வேறு ஆன்மீக தலங்களுக்கு பைக்கில் ரெய்டு சென்றபோது , ​​அவர் தனது ரசிகர்களுடன் எடுத்துக்கொண்ட புகைப்படங்கள், வீடியோக்கள் வைரலானது. துணிவு படப்பிடிப்பு தொடர்ந்து தாமதமான நேரத்தில் அஜித் தனது பைக் பயணத்தை நேபாளம் மற்றும் பூடானுக்கு திருப்பினார்.

அவர் ஏற்கனவே ஐரோப்பாவில் சில இடங்களிலும் தாய்லாந்தில் சில இடங்களிலும் உலக சுற்றுப்பயணம் செய்துள்ளார். உலக சுற்றுப்பயணத்தின் அடுத்த கட்டம் 2023 நவம்பரில் தொடங்கும் என்று தகவல்கள் வெளியாகியுள்ளன. அந்த பயணத்தில் நியூஸிலாந்து, மற்றும் ஆஸ்திரேலியா நாடுகளில் உள்ள இடங்களை சுற்றிப்பார்க்க உள்ளார் என்றும் அவரது மேனேஜர் கூறியுள்ளார்.