சீன பெருஞ்சுவரை கேட்டிருப்பீர்கள்.. இந்திய பெருஞ்சுவரை பற்றி தெரியுமா?

சீன பெருஞ்சுவரை பற்றி கேட்டிருப்பீர்கள்.உலக அதிசயம் என்று பாடப்புத்தகங்களில் படித்திருப்போம் ஆனால் இந்தியப் பெருஞ்சுவரைப் பற்றி கேட்டிருக்கிறீர்களா? ஆம், அப்படி சொல்லும் அளவிற்கான ஒரு அமைப்பு ராஜஸ்தானில் உள்ளது!

உதய்பூருக்கு அருகில் அமைந்துள்ள யுனெஸ்கோவின் உலக பாரம்பரிய தளமான கும்பல்கர் என்ற கோட்டையில் தான் இந்த அமைப்பு உள்ளது. சித்தூர் கோட்டைக்குப் பிறகு இந்தியாவின் இரண்டாவது பெரிய கோட்டை வளாகமாக காணப்படும் இந்த கோட்டை ஆரவல்லி மலைத்தொடரில் அமைந்துள்ளது.

இந்த கோட்டையின் மதில் சுவரை தான் இந்திய பெருஞ்சுவர் என்று சுட்டுகின்றனர். மேலும் இது சீனாவின் பெருஞ்சுவருக்கு அடுத்தபடியாக உலகின் இரண்டாவது நீளமான தொடர்ச்சியான சுவர் என்று கூறப்படுகிறது.

15 ஆம் நூற்றாண்டில் மேவார் இராச்சியத்தின் ஆட்சியாளரான ராணா கும்பாவால் கட்டப்பட்ட இந்த அழகிய கோட்டை கடல் மட்டத்திலிருந்து 1100 மீ உயரத்தில் அமைந்துள்ளது. இந்த கோட்டை 3600 அடி உயரமும், 38 கிமீ நீளமும் கொண்ட ஒரு பரந்த பகுதியை உள்ளடக்கியது.

கோட்டையைப் பற்றிய ஒரு சுவாரஸ்யமான உண்மை என்னவென்றால், இது சுமார் 360 கோயில்களைக் கொண்டுள்ளது, அவற்றில் பெரும்பாலானவை ஜெயின் கோயில்கள் என்று கூறப்படுகிறது. படிக்கட்டு கிணறுகள், அரண்மனைகள், தோட்டங்கள் மற்றும் 700 பீரங்கி பதுங்கு குழிகளையும் கொண்டுள்ளது.

இத்தனையையும் உள்ளடக்கிய கோட்டையின் மதில் சுவர் என்பது சுமார் 36 கி.மீ தூரம் வரை நீண்டு உள்ளது. சுவரின் சில பகுதிகள் மிகவும் அகலமாக உள்ளன. அதனால் எட்டு குதிரைகள் வரை ஒரே வரிசையில் சவாரி செய்யலாம். இந்த முழு அமைப்பும் முடிக்க வெறும் 15 ஆண்டுகள் தான் ஆகியுள்ளது. ஆனால் சுவரின் கட்டிட அமைப்பு இன்றும் அதை நிலையாக நிற்க உதவுகிறது.

இந்த பறந்து விரிந்த சுவர் மலைப்பாங்கான நிலப்பரப்பு வழியாக வளைந்து செல்கிறது. கோட்டையில் இருந்து பார்பதற்கு ஏதோ பாம்பு நெளிந்து ஓடுவதை போல காட்சி அளிக்கும். புகைப்படம் எடுப்பதற்கு அருமையான இடம். ஆபத்து காலங்களில் இப்பகுதியின் ஆட்சியாளர்களின் நம்பிக்கையின் சின்னமாக  இந்த கோட்டை இருந்துள்ளது.