பூமியின் வடகோடி நகரம் எப்படி இருக்கும் என்று யோசித்ததுண்டா..? இங்கே பாருங்க...

உலகை சுற்றி பார்க்க விரும்புபவர்கள்  பிரபலமான இடங்களைத் தேடி அங்கே இருக்கும் கூட்டத்தோடு சேர்ந்து  பார்த்துவிட்டு வருவார்கள். அப்படி இல்லாமல் அதிக கூட்டம் இல்லாத அதே நேரம் மிகவும் வித்தியாசமான இடத்தை பற்றி தான் இங்கு சொல்ல இருக்கிறோம்

இந்த பூமியில் உள்ள நிலப்பரப்பின் கடைக்கோடிகளை பற்றி நினைத்திருக்கிறீர்களா? வடகோடி நிலம் எது, தென்கோடி நிலம் எது என்று?கூகுள் மேப்பை திறந்து வடகோடியில் உள்ள, மக்கள் வாழத் தகுந்த இடம் என்ன என்று தேடிப்பாருங்கள், பனி போர்வை போர்த்திய லாங் இயர் பியன்  என்ற ஒரு நார்வே நகரத்தை கைகாட்டும். இந்த பூமியில் மக்கள் வாழும் வடகோடி முனை அதுதான்.

இதற்கு மேலே ஸ்வால்பார்டில், நை ஆலேசன்ட் போன்ற சில இடங்கள்  உள்ளன. ஆனால் அவை முற்றிலும் ஆராய்ச்சிக்காக மட்டுமே பயன்படுத்தப்படுகிறது. மக்கள் அங்கே குடியிருப்பதில்லை. லாங்இயர்பியன்  நகரத்திலிருந்து வடமேற்கே சில கிலோமீட்டர் தொலைவில் ஸ்வால்பார்ட் விமான நிலையம்  (LYR) அமைந்துள்ளது. உலகின் வடகோடி விமான நிலையம் இதுதான்.

இந்த நகரம் 1906 ஆம் ஆண்டில் அமெரிக்க ஜான் முன்ரோ லாங்யாரால் நிறுவப்பட்டது . பத்து ஆண்டுகளுக்குப் பிறகு அவர் ஒரு நோர்வே நிலக்கரி நிறுவனத்திற்கு இந்த இடத்தை விற்றார். லாங்யாரால் என்பவர் நிறுவியதால் அவரின் நினைவாக இந்த இடத்திற்கு லாங்கியர்பைன் என்று பெயரிட்டனர். நோர்வே மொழியில் இந்த இடத்திற்கு லாங் இயர் பியென் என்று பெயர் .

பனி போர்த்திய இந்த பகுதியில் உள்ள நிலக்கரியை எடுக்க ஒரு சுரங்கம் அமைக்கப்பட்டுள்ளது. அதன் ஊழியர்கள் தங்குவதற்கு இடம் வேண்டும் என்பதற்காக இடம் தேடியபோதே இதை விலைக்கு வாங்கியுள்ளனர். முதலில் சில வீடுகள் அமைக்கப்பட்டுள்ளது. பின்னர் அது ஒரு குடியிருப்பாக மாறிவிட்டது.

இந்த நகரமும் உலகில் உள்ள மற்ற எல்லா நகரங்களை போன்று  மருத்துவமனை, தபால் அலுவலகம், வங்கி, நூலகம், ஹோட்டல்கள், , பெட்ரோல் நிலையம், உணவகங்கள், கடைகள் மற்றும் பார்களைக் கொண்டுள்ளது. ஷாப்பிங் சென்டர் கூட இருக்குங்க…

1965 இல் இங்கு ஒரு தேவாலயத்தை அமைத்துள்ளனர். வட துருவ பயண அருங்காட்சியகம் கூட இங்கு உள்ளது . வட துருவத்தில் இது வரை  கண்டுபிடித்த பொருட்களை இந்த அருங்காட்சியகத்தில் வைத்துள்ளனர்.

வட கோடியில் இருக்கிறதே ..இங்கு இணைய வசதி இருக்காதோ என்று நினைக்க வேண்டாம். இங்கு மொபைல் நெட்வொர்க் சிறப்பாக கிடைக்கும். அதே போல இங்கு வாங்கும் பொருட்களுக்கு வரி எதுவும் கிடையாதாம். ஆனால் மதுவுக்கு கட்டுப்பாடு உண்டு. மாதத்திற்கு ஒரு லிட்டர் மது மற்றும் 24 பீர் கேன்கள் மட்டுமே வாங்க அனுமதிக்கப்படுகிறார்கள்.

உலகின் வடக்கே உள்ள உயர்கல்வி நிறுவனமாக ஸ்வால்பார்ட் பல்கலைக்கழக மையமான UNIS உள்ளது. நகர மையத்தில் உள்ளூர் செய்தித்தாள் அலுவலகங்கள் ஒன்று கூட இருக்கிறது. ஸ்வால்பார்ட்போஸ்டன் என்பது வாராந்திர இதழ் தான் உலகின் வடக்கு கோடி பகுதியில் உள்ள செய்தித்தாள் ஆகும்.

அதேபோல இந்த இடத்தின் மற்றொரு சுவாரசியமான விஷயம் இங்கு 3 மாதங்களுக்கு வெறும் பகல் தான் ஜூன் மாதம் தொடங்கி ஆகஸ்ட் வரை சூரியன் மறைவதே இல்லை. இரவு நேரத்தில் சூட சூரியன் சுட்டெரிக்கும்.