முழுநிலவின் ஒளியில் காதலின் சின்னத்தைப் பார்க்க வாய்ப்பு.. எப்படி..? எப்போது தெரியுமா..?

ஒரு சில இடங்களை பகலில் பார்த்தால் அழகாக இருக்கும். அதேபோல ஒரு சில இடங்களை இரவில், நிலவின் ஒளியில் பார்ப்பது வரம். அதுவும் நதிக்கு அருகிலேயே அமைந்துள்ள உலக அதிசயங்களில் ஒன்றான தாஜ் மஹாலின் அழகை இரவில் பார்க்க முடியும் என்று சொன்னால் மிஸ் பண்ணத் தோன்றுமா என்ன ?

காசி ராமேஸ்வரம் போல காதலின் சின்னமான தாஜ் மஹாலை ஒரு முறையாவது பார்க்க வேண்டும் என்பது பலரின் கனவாக இருக்கும் . அப்படிப்பட்ட தாஜ் மஹாலின் அழகை இரவின் ஒளியில் ரசிக்க  வருடத்துக்கு ஒருமுறை அல்லது  சிலநாட்கள் தான் பார்க்கமுடியும் என்று நினைத்தால் அதுதான் தவறானது. மாதத்திற்கு 5 நாட்கள், இந்த அற்புதனான வாய்ப்பு அளிக்கப்படுகிறது.

ஒவ்வொரு மாதமும்  பௌர்ணமி, அதற்கு 2 நாட்கள் முன்னும் பின்னும் தாஜ்மஹால்  பார்வையாளர்களுக்கு இரவு காட்சிக்காக அதன் கதவுகளைத் திறக்கிறது. இந்த ஐந்து நாட்களிலும்  சூரிய அஸ்தமனத்திற்குப் பிறகு இரவு 8:30 மணி முதல் 12:30 மணி வரை தாஜ்மஹால் வளாகத்திற்குள் நுழைய அனுமதிக்கப்படுகிறார்கள். அந்த நேரத்தில் நிலவொளியின் கீழ் ஒளிரும் காதலின் நினைவுச்சின்னத்தைப்  பார்க்கலாம்.

ஒவ்வொரு பார்வையாளர்களும் வளாகத்திற்குள் 30 நிமிடங்கள் மட்டுமே செலவிட முடியும். அனைத்து வெள்ளிக்கிழமைகளையும் ரமலான் மாதத்தையும் தவிர்த்து மற்ற தினங்களில் மக்கள் இந்த இரவு நேர ஸ்பெஷல் காட்சிக்கு அனுமதிக்கப் படுகின்றனர். இதற்கு தனியாக சிறந்த புக்கிங் வசதியும் உள்ளது.

பௌர்ணமி இரவில் மட்டுமே இரவு காட்சி வாய்ப்பு கிடைக்கும் என்பதால், சந்திர நாட்காட்டியைப் பொறுத்து தாஜ்மஹாலைப் பார்ப்பதற்கான சரியான தேதிகள் மாறுபடும். மேலும் இந்திய தொல்பொருள் ஆய்வுத் துறையின் (ASI) அதிகாரப்பூர்வ இணையதளத்தில் அதற்கான டிக்கெட் மற்றும் திறக்கப்படும் இடம் குறித்து தெரிந்துகொள்ளலாம்

மேலும் இதற்கான டிக்கெட்டுகள்  இந்த நாட்களுக்கு ஒரு நாள் முன்பு மட்டுமே கிடைக்கும். காலை 10 மணி முதல் மாலை 6 மணி வரை இந்திய தொல்லியல் துறை (ஏஎஸ்ஐ) அலுவலகத்தில் இருந்து டிக்கெட்டுகளை வாங்கலாம்.