ஒரு மணி நேரத்திற்குள் ஒரு நாட்டையே சுற்றிப் பார்க்க முடியும் என்றால் நம்புவீர்களா..?

சுற்றுலாவிற்கு ஒரு ஊருக்கு போனாலே அந்த ஊரை சுற்றி முடிக்கவே குறைந்தது இரண்டு நாட்கள் ஆகும். எப்படி ஒரு நாட்டையே ஒரு மணி நேரத்தில் பார்க்க முடியும் என்று தானே கேட்கிறீர்கள். அந்த நாட்டின் தன்மையையும், பெயரையும் சொன்னால் ஏன் என்று நீங்களே கண்டுபிடித்துவிடுவீர்கள்.

உலகில் மொத்தம் 195 நாடுகள் உள்ளன. நிலப்பரப்பு அடிப்படையில் எடுத்துக்கொண்டால், ரசியா தான் உலகின் பெரிய நாடு. உலகின் நீண்ட ரயில் பயணம் என்பதே ரசியாவின் இரண்டு எல்லைகளை இணைப்பது தான். அந்த ரயில் பயணம் சுமார் 7 நாட்கள் எடுத்துக்கொள்கிறது. அதே நேரத்தில் உலகின் சிறிய நாடு என்பது வாட்டிகன் நகரம் ஆகும்.

எல்லாப்பக்கமும் இத்தாலி எல்லையைக்கொண்ட இந்த நாட்டை தான் ஒரு மணிநேரத்தில் சுற்றிப்பார்த்துவிடலாம். ஹோலி சீ என்றும் அழைக்கப்படும் இந்த நாடு கிருத்துவ மதத்தின் முக்கியமான ரோமன் கத்தோலிக்க திருச்சபையின் தலைமை தேவாலயத்தைக்கொண்டுள்ள நாடாகும்.

கிருத்துவர்களின் புனித இடமான இந்த நாடு உலகின் மிகப்பெரிய ரோமன் கத்தோலிக்க தேவாலயங்களில் ஒன்றான செயின்ட் பீட்டர்ஸ் பசிலிக்கா தேவாலயத்தை பிரதானமாகக் கொண்டுள்ளது. அதைச் சுற்றி, அரசு மாளிகை ஒன்று, ஒரு அருங்காட்சியகம், 2 சிறிய கல்வி நிறுவனம்,சில வீடுகள், கடைகள் தான் இருக்கின்றன. இந்த நாட்டின் மொத்த நிலப்பரப்ப வெறும் 0.17 சதுர மைல்கள் அல்லது 0.44 சதுர கிலோமீட்டர்தான் . இதை சுற்றி நடந்தாலே வெறும் 20 நிமிடங்கள் தான் ஆகும்.

கிறிஸ்தவ உலகின் மையப்பகுதி, புனித பீட்டர் அப்போஸ்தலரின் கல்லறை, தலைமை போப்பின் இல்லம் என இந்த நாட்டிற்கான பெருமை முழுக்க சின்ன இடத்திற்கும் அடங்கியுள்ளது. இந்த நாட்டில் வாழும் மொத்த மக்களே 825 பேர்தான்.தேவாலயத்தை பார்த்துவிட்டு அதை சுற்றி வந்தால் நாடு முடிந்துவிடும் அதனால் அதிகபட்சம் 1 மணிநேரம் தான் ஆகும்.

இந்த நாட்டின் சுவாரசிய விஷயங்கள் என்று பார்த்தால், பூமியில் சிறை இல்லாத ஒரே நாடு வாடிகன் நகரம் மட்டுமே. மாறாக இங்கு குற்றம் செய்பவர்கள் இத்தாலி சிறைக்கு அனுபவிக்கின்றனர். சின்ன நாடானாலும், குற்ற விகிதம் மிகவும் அதிகமாகவே இருக்கிறது.

இந்த சிறிய நாட்டில் வசிக்கும் போப் ஆண்டவரை பாதுகாக்கும் பொறுப்பு வாடிகன் அதிகாரிகளிடம் இல்லை. அதற்காக  போன்டிஃபிகல் ஸ்விஸ் கார்ட் என்ற பெயரில் சுவிஸ் வீரர்கள் இருக்கின்றனர்.

வாடிகன் நகரம் உலகின் மிகக் குறுகிய ரயில் பாதையையும் கொண்டுள்ளது. இந்த நிலையத்தில் இரண்டு 300 மீட்டர் தடம் மற்றும் ஒரு ரயில் நிலையம் உள்ளது. உலக பாரம்பரிய தளமாக முழுமையாக அறிவிக்கப்பட்ட ஒரே நாடு வாடிகன் மட்டுமே.