ஹனிமூன் செல்ல இந்த நாடுகளுக்கு விசா இருந்தால் போதும்.. இந்தியர்களுக்கு ஸ்பெஷல் ஆஃபர்..!

திருமண சீசன் தொடங்கிவிட்டது. வாரம் தோறும் திருமணங்களும் விருந்துகளும் நடந்து வருகிறது. புதிதாக திருமணம் ஆனவர்கள் எல்லோரும் ஹனிமூனுக்கு எங்கே போவது என்று யோசித்துக்கொண்டு இருப்பார்கள். வெளிநாடுகளுக்கு போக வேண்டும் என்று சிலர் ஆசைப்படுவார்கள். ஆனால் விசா கிடைக்க பல நாட்கள் ஆகுமே என்ன செய்வது என்று யோசிப்பார்கள்.

எல்லா நாடுகளுக்கும் போகும் முன்னர் விசா எடுக்க வேண்டிய அவசியம் இல்லை. சில நாடுகளுக்கு போன பின்னர் குறிப்பிட்ட நாட்களுக்கு அவர்களே விசா வழங்குவார்கள். இதை விசா ஆன் அரைவல் (VOA) என்று சொல்வார்கள். இதற்கு உங்கள் அடையாள அட்டை, அசல் பாஸ்போர்ட் உள்ளிட்ட ஆவணங்களை மட்டும் சமர்ப்பிக்க வேண்டும். அப்படியான ஹனிமூன் செல்லக்கூடிய நாடுகளின் லிஸ்ட் இதோ.

இந்திய நடிகர்கள் முதல் உலக பிரபலங்கள் வரை எல்லாருமே விடுமுறை என்றால் உடனே கிளம்பும் இடம் மாலத்தீவுகள் தான், இந்தியாவில் இருந்து விமானத்தில் 2 மணிநேரத்தில் செல்லக்கூடிய மாலத்தீவில் இந்தியர்களுக்கு விசா ஆன் அரைவல் வசதி உள்ளது. இங்குள்ள கடற்கரைகள் மற்றும் ரிசார்ட்டுகள் ஹனிமூன் தம்பதிகளுக்கு ஏற்றதாக இருக்கும்.

மொரிஷியஸுக்குள் நுழையும் இந்திய சுற்றுலாப் பயணிகளுக்கு VOA கிடைக்கிறது. மேலும் வந்த நாளிலிருந்து 60 நாட்களுக்கு இந்த அனுமதி விசா செல்லுபடியாகும். தெளிந்த நீரைக் கொண்ட கடல், வெள்ளை மணலால் மூடிய கடற்கரைகள் ரசிக்க மார்ச் மாதம் ஏற்ற நேரமாக இருக்கும்.

மடகாஸ்கர் செல்லும் இந்திய குடிமக்களுக்கு 90 நாட்களுக்கு விசா எளிதாக கிடைக்கிறது. கூட்டம் அதிகள் இல்லாத இடத்தில் ஹனிமூனை கழிக்க விரும்பும் தம்பதிகளுக்கு மடகாஸ்கர் சரியான தேர்வாக இருக்கும். அடுத்து வரும் மாதங்களில் கூட வெயில் கொஞ்சம் அதிகம் இருக்கும். ஆனால் பிப்ரவரி மற்றும் மார்ச் மாதங்கள் மடகாஸ்கர் செல்ல சரியான நேரம்.

இயற்கையான நீலகடல், பசுமையான தோட்டங்கள், தனியார் தீவுகள், தம்பதிகள் தங்கும் விடுதிகள் என்று தேனிலவு விடுமுறைக்கு ஏற்ற இடமாக சிஷேல்ஸ் இருக்கும். சிஷேல்ஸுக்குள் நுழையும்போது உங்கள் பாஸ்போர்ட் அசலை காட்டி விசா பெற்றுக்கொண்டால் போதுமானது.

இந்திய பயணிகளுக்கு VOA வழங்கும் மற்றொரு அழகான நாடு இந்தோனேசியா. பசுமையான மலைகள், காடுகள் இடையே அமைந்துள்ள இந்தோனேஷியா தேனிலவு நாட்களை செலவழிக்க ஏற்ற இடமாக இருக்கும். இங்குள்ள புத்த விகாரங்களை சுற்றிபார்ப்பதுடன் வினோத உணவுகளை பரிமாறிக்கொள்ளலாம்

உங்கள் காதல் துணைவருடன் கழிக்கும் தேனிவு நாட்களை மறக்கமுடியாத ஒன்றாக மாற்ற லாவோஸ் நாட்டை நீங்கள் நிச்சயம் தேர்வு செய்யலாம். இந்தோனேசியாவைப்போலவே லாவோஸ் நாடும் இயற்கையோடு சாகச பயணங்களுக்கும் புகழ்பெற்றது. உரிய ஆவணங்களுடன் இந்தியர்கள் 30 நாட்களுக்கு தாங்கும் விசாவை பெறலாம்.

தென்கிழக்கு ஆசியாவில் தேனிலவு விடுமுறைக்கு திட்டமிடும் தம்பதிகளுக்கு கம்போடியா நாடும் ஒரு சிறந்த இடமாகும். புத்த கட்டிடங்கள் , மற்றும் கம்போடியா கட்டிடக்கலைகள் போட்டோஷூட் எடுக்க பக்காவாக இருக்கும்.திருமணம் முடிந்தவுடன் அழகான நாட்களை படங்களாக பதிவு செய்ய கம்போடியா சரியாக இருக்கும்

மற்றொரு பிரபலமான தேனிலவு இடம் என்றால் அது தாய்லாந்து தான். மிகவும் அழகான ஃபூகெட் மற்றும் கிராபி உட்பட பல அற்புதமான தீவுகளைக் கொண்டுள்ளது. தாய்லாந்து சுற்றுலா நோக்கங்களுக்காக VOA ஐ வழங்குகிறது. அதை சரியாக தேனிலவு பயணத்திற்கு பயன்படுதிக்கொள்ளுங்கள். தாய்லாந்து உணவுகளை மிஸ் செய்து விடாதீர்கள்.