சுற்றுலா தலங்களாக மாறப்போகும் சீன எல்லையில் உள்ள 17 கிராமங்கள்!

கிராமப்புற சுற்றுலாவை மேம்படுத்தும் வகையில், மத்திய அரசு துடிப்பான கிராமம் (vibrant village )திட்டத்தை அறிமுகப்படுத்துகிறது. இந்த முயற்சியின் கீழ், சீனாவின் எல்லையில் உள்ள 17 கிராமங்கள் அரசாங்கத்தால் தேர்ந்தெடுக்கப்பட்டு, சுற்றுலா தளங்களாக மேம்படுத்தப்பட உள்ளது.

எல்லைகளில் உள்ள 663 கிராமங்களில் முதல் கட்டமாக  இந்த 17 எல்லை கிராமங்கள் தேர்ந்தெடுக்கப்பட்டு புதுப்பிக்கப்படும் என்று அரசு தரப்பு அறிக்கைகள் தெரிவிக்கின்றன. அதேசமயம் சுற்றுலாப் பயணிகளுக்கான வசதிகள் மற்றும் சிறந்த போக்குவரத்து இணைப்பு வசதிகளில் முதன்மை கவனம் செலுத்தப்பட உள்ளது.

இந்திய - சீன எல்லைகளில் உள்ள இமாச்சலப் பிரதேசம், லடாக், சிக்கிம், உத்தரகண்ட் மற்றும் அருணாச்சலப் பிரதேசம் ஆகிய மாநிலங்களில் உள்ள எல்லைக் கிராமங்கள் தேர்வு செய்யப்பட்டுள்ளன.

இந்த திட்டத்தின் கீழ் உருவாக்கப்படும் கிராமங்கள் பட்டியலில் லடாக்கில் உள்ள சுஷுல் மற்றும் கோர்சோக் ஆகியவை அடங்கும். ஹிமாச்சல பிரதேசத்தில் உள்ள கிபு, லாலுங் மற்றும் சரங் காஸ், உத்தரகாண்டில் நிதி, மனா, மலரி மற்றும் குஞ்சி, சிக்கிமில் லாச்சென், க்னாதாங், லாச்சுங்,அருணாச்சல பிரதேசத்தில் உள்ள ஜெமிதாங், டுட்டிங், டாக்சிங், சயாங்தாஜோ மற்றும் கிபித்தூ உள்ளன.

உத்தரகாண்ட் கிராமங்களில் 120 தங்கும் விடுதிகள் கட்டப்படும் அல்லது மறுகட்டமைக்கப்படும் என்று அரசு தெரிவித்துள்ளது. அதோடு உத்தரகாண்ட் மற்றும் இமாச்சலப் பிரதேசத்தில் உள்ள பகுதிகள் வழியாக மலையேற்ற பாதைகள் உருவாக்கப்படும். சிக்கிம் மற்றும் அருணாச்சல பிரதேசத்தின் பகுதிகள் ஐஸ் ஸ்கேட்டிங், ரிவர் ராஃப்டிங், பனிச்சறுக்கு மற்றும் பல சாகச விளையாட்டு  வசதிகளும் கொண்டுவரப்பட உள்ளது.

மேலும், இந்த லட்சிய திட்டம்  17 கிராமங்களில் சுற்றுலா மையங்களின் வளர்ச்சியுடன் சுத்தமான குடிநீர், அனைத்து வானிலை சாலை அணுகல், மொபைல் நெட்வொர்க், மின்சாரம், இணைய இணைப்பு ஆகியவற்றை வழங்குவதை நோக்கமாகக் கொண்டுள்ளது.