நண்பர்களுடன் கோவா ட்ரிப் பிளான் போட்டாச்சா..? இங்கெல்லாம் சுற்றிப்பார்க்க மறந்துடாதீங்க..!

உங்க இயந்திர வாழ்க்கையில் இருந்து சற்று ஓய்வு பெற நினைத்தாலோ அல்லது உங்கள் கண்களுக்கு சற்று விருந்தளிக்க நினைத்தாலோ கோவா உங்களுக்கு சரியான தேர்வாக இருக்கும். கோவாவில் உள்ள சுற்றுலாத் தலங்களின் பட்டியல் மிகவும் நீளமானது. கடற்கரைகள், கட்டிடக்கலைக்கு பெயர் போன தேவாலயங்கள், சந்தைகள் மற்றும் கலாச்சாரம் என அடுக்கி கொண்டே போகலாம். கோவா என்றாலே, நைட் டிரைவுக்கு பெயர் போனது. உணவுப் பிரியர்களுக்கு இந்த இடம் ஒரு சொர்க்கம். கோவாவில் பார்க்க வேண்டிய சில அற்புதமான சுற்றுலாத் தலங்களின் பட்டியல் பற்றி இங்கே காணலாம்.

அகுவாடா கோட்டை (Aguada Fort) : கோவாவின் மிகவும் சுவாரஸ்யமான கோட்டைகளில் ஒன்றான இந்த அகுவாடா கோட்டை அரபிக்கடலை ஒட்டி அமைந்துள்ளது. சூரிய அஸ்தமனத்தின் கம்பீரமான காட்சிகளை காண மக்கள் கூட்டம் இங்கு அலைமோதுவதுண்டு.

அஞ்சுனா பிளே (Anjuna Flea Market) : கோவாவின் பிரபலமான சுற்றுலாத் தலங்களில் ஒன்றாக பார்க்கப்படும் இந்த அஞ்சுனா பிளே மார்க்கேட் புதன் கிழமைகளில் மட்டுமே திறந்திருக்கும் ஒரு பல்பொருள் சந்தை ஆகும். அழகிய ஆடைகள் துவங்கி ஆடம்பர எலக்ட்ரானிக் சாதனங்கள் வரை இங்கு நாம் வாங்கலாம்.

சலீம் அலி பறவைகள் சரணாலயம் : மாண்டோவி ஆற்றங்கரையில் அமைந்துள்ள இந்த பறவைகள் சரணாலயம் சுமார் 440 ஏக்கர் பரப்பளவில் பரந்து விரிந்திருக்கும் ஒரு அழகிய தீவு ஆகும். இந்த சரணாலயத்தில் பல்புல்ஸ், கிங்ஃபிஷர்ஸ், ஸ்வான்ஸ், ஹார்ன்பில்ஸ் போன்ற அரிய பறவை இனங்களை நாம் காணலாம்.

சின்குரிம் பீச் (Sinquerim Beach) : அகுவாடா கோட்டைக்கு மிக அருகில் அமைந்துள்ள இந்த சிக்குரிம் கடற்கரை நீச்சல் மற்றும் நீர் விளையாட்டுகளுக்கு ஏற்ற இடம் ஆகும். மேலும், இங்கு செல்லும் சுற்றுலா பயணிகள் பாராசெய்லிங், ஸ்கூபா டைவிங் போன்ற சாகச விளையாட்டுகளிலும் ஈடுபடலாம்.

துத்சாகர் நீர்வீழ்ச்சி (Dudhsagar Waterfall) : மாண்டோவி ஆற்றில் அமைந்துள்ள இந்த நீர்வீழ்ச்சி, இந்தியாவின் இரண்டாவது உயரமான நீர்வீழ்ச்சியாகும். கோவா - கர்நாடக மாநிலங்களின் எல்லைக்கு மிக அருகில் உள்ள பனாஜியில் இருந்து 60கிமீ தொலைவில் இந்த நீர்வீழ்ச்சி அமைந்துள்ளது.

குழந்தை இயேசு தேவாலயம் : Basilica of Bom Jesus என ஆங்கிலத்தில் அழைக்கப்படும் இந்த கத்தோலிக்க கிறித்தவ வழிப்பாட்டு தலம், போர்த்துகீசியர்களின் தலைநகராக விளங்கிய பழைய கோவாவில் அமைந்துள்ளது.

அகோண்டா (Agonda Beach) : அகோண்டா கடற்கரையானது, கோவாவின் தெற்கு பகுதியில் அமைந்துள்ள ஒரு புகழ்பெற்ற கடற்கரையாகும். ஆமைகள் பாதுகாப்பிற்கென அறிவிக்கப்பட்டுள்ள பகுதிகளில் இந்த அகோண்டா கடற்கரையும் ஒன்று.

லாம்காவ் குகைகள் (Lamgau Caves) : கோவாவின் பனாஜியில் இருந்து சுமார் 25கிமீ தொலைவில் அமைந்துள்ள இந்த குகைகள், கோவாவின் முக்கிய சுற்றுலா தலங்களில் ஒன்றாகும். ஏராளமான பனை மரங்களால் சூழப்பட்ட இந்த குகைகள் அமைதியை விரும்புவோருக்கு ஏற்ற இடம் ஆகும்.

பகவான் மகாவீரர் தேசியப் பூங்கா : கோவாவின் சாங்க்யும் தாலுக்காவில் அமைந்துள்ள இந்த பகவான் மகாவீரர் காட்டுயிர்ச் சரணாலயம் மற்றும் மொல்லம் தேசியப் பூங்கா, சுமார் 240 சதுர கிமீ பரப்பளவில் அமைந்துள்ள பிரமாண்ட பூங்கா ஆகும். புகழ்பெற்ற துத்சாகர் நீர்வீழ்ச்சி இங்கு தான் அமைந்துள்ளது.