சம்மர் ஹாலிடே வரப்போகுது… கோவைக்கு மிக அருகில் இருக்கும் சுற்றுலா தலங்கள் ஒரு பார்வை..!

கோடைகாலம் ஆரமித்துவிட்டது. இனி, பள்ளி குழந்தைகளுக்கு கோடை விடுமுறை விடப்படும். குடும்பத்துடன் மகிழ்ச்சியாக ஒருநாள் சுற்றுலா செல்ல நீங்கள் திட்டமிட்டால், நாங்கள் சில இடங்களை உங்களுக்கு கூறுகிறோம். தெரியாதவர்கள் யாரும் இருக்க முடியாது. தமிழகத்தின் கொங்கு மண்டலத்தில் அமைந்துள்ள ஒரு பழமையான மாவட்டமாக கோயம்புத்தூர் உள்ளது. இந்த மாநகரை சுற்றி குடும்பத்துடன் சுற்றுலா செல்ல ஏற்ற இடங்கள் என்ன என்று இந்த பதிவில் காணலாம்.

சிறுவாணி அருவி : கோவை மாநகரில் இருந்து சுமார் 35 கி.மீ தொலைவில் அமைந்துள்ள இந்த அருவி, கோவைக் குற்றாலம் என அழைக்கப்படுகிறது. இது பாதுகாக்கப்பட்ட வனப்பகுதியில் அமைந்துள்ள இந்த அருவி, கோடை விடுமுறைக்கு ஏற்ற இடம் ஆகும். உங்கள் குழந்தைகள் மற்றும் குடும்பத்தினருடன் மகிழ்ச்சியாக இருக்க அருமையான இடம்.

சைலன்ட் வேலி தேசியப் பூங்கா : கோவையில் இருந்து 100 கி.மீ தொலைவில் அமைந்துள்ள இந்த தேசியப் பூங்கா (Silent Valley), கேரளாவின் 2-வது பெரிய தேசியப் பூங்காவாக பார்க்கப்படுகிறது. 200-க்கும் அதிகமான பட்டாம்பூச்சி வகைகள், 400-க்கு அதிகமான விட்டில் பூச்சி வகைகளை இங்கு நாம் காணலாம்.

மலம்புழா அணை : கோவையில் இருந்து சுமார் 50 கி.மீ தொலைவில் அமைந்துள்ள இந்த அணை, கேரளாவின் பாலக்காடுக்கு மிக அருகில் அமைந்துள்ளது. இங்கு அமைக்கப்பட்டுள்ள பூங்கா, குழந்தைகள் முதல் பெரியவர் வரை அனைவரையும் ஈர்க்கும் அம்சம் ஆகும்.

பாலக்காட்டுக் கோட்டை : கோவை மாநகரில் இருந்து சுமார் 52 கி.மீ தொலைவில் அமைந்துள்ள இந்த பாலக்காட்டுக் கோட்டை, கேரளாவின் பாலக்காடு நகரின் மையப்பகுதியில் அமைந்துள்ளது. கேவையில் இருந்து ஒரு நாள் சுற்றுலா செல்ல விரும்புவோருக்கு இது ஒரு நல்ல தேர்வு!

ஈஷா யோகா மையம் : ஈஷா அறக்கட்டளையின் கீழ் இயங்கி வரும் இந்த யோகா மையம், நீலகிரி மலைத் தொடரின் ஒரு பகுதியான வெள்ளியங்கிரி மலைச்சாரலில் அமைந்துள்ளது. தற்போது கோவை மக்களின் பிரபலமான சுற்றுலாத் தலமாக உறுமாறியுள்ளது.

பரம்பிக்குளம் சரணாலயம் : கேரளாவின் சிற்றூர் தாலுகாவில் அமைந்துள்ள இந்த பரம்பிக்குளம் வனவிலங்கு சரணாலயம், கோவையில் இருந்து சுமார் 87 கி.மீ தொலைவில் அமைந்துள்ளது. கோவைக்கு அருகில் புலியை காண விரும்புவோர் இந்த சரணாலயத்திற்கு செல்லலாம்.

அமராவதி அணை : கோவையில் இருந்து 94 கி.மீ தொலைவிலும், திருப்பூர் மாவட்டத்தின் உடுமலையிலிருந்து 17கிமீ தொலைவிலும் அமைந்திருக்கும் இந்த அமராவதி அணைக்கு சென்றால், இயற்கைக்சூழலில் வளர்க்கப்படும் முதலைப் பண்ணையை பார்வையிடலாம்.

தொட்டபெட்டா : கோவையில் இருந்து சுமார் 92 கி.மீ தொலைவில் அமைந்துள்ள இந்த தொட்டபெட்டா, நீலகிரி மாவட்டத்தில் அமைந்துள்ளது. சுமார் 2623மீ உயரமுள்ள இந்த மலை உச்சிக்கு சென்றால், உதகமண்டலத்தின் முழு அழகையும் ரசிக்கலாம்.