இந்த மார்ச் மாதம் புதிய தம்பதிகள் ஹனிமூன் செல்ல சிறந்த ஸ்பாட்கள்..!

திருமண சீசன் தொடங்கி விட்டது. வாரம் தோறும் திருமணங்களும் விருந்துகளும் நடந்து வருகிறது. புதிதாக திருமணம் ஆனவர்கள் எல்லோரும் ஹனிமூனுக்கு எங்கே போவது என்று யோசித்துக்கொண்டு இருப்பார்கள். இந்தியாவில்  உள்ள வித்தியாசமான ஹனிமூன் மற்றும் போட்டோஷூட் ஸ்பாட்களை பற்றி கூறுகிறோம்

திருமணம் ஆகி முதல் முறை வெளியே செல்லும் போது தனிமையான , அமைதியான அதே நேரம் அழகான இடத்தை தான் தேடுவோம். அப்படி பக்காவாக பேக் செய்யப்பட்ட பகுதி தான் லக்ஷத்தீவுகள். சிறிய சிறிய தீவுகள் சேர்ந்த தீவுக்கூட்டத்தில் உள்ள ரிசார்ட்டுகள் உங்கள் ஹனிமூன்களை மேலும் அழகானதாக மாற்றும்.

தென் இந்தியாவில் உள்ள அழகுக்கு பெயர் போன இடங்களில் ஒன்றான வயநாடு ஹனிமூனுக்கு ஏற்ற இடமாக அமையும். அதுவும் சாகச விரும்பிகளாக நீங்கள் இருந்தால் உங்கள் துணைவரோடு இங்குள்ள மேற்கு தொடர்ச்சி மலை பகுதியில் ட்ரெக்கிங் செல்லலாம். மேலும் இங்குள்ள பசுமையான சூழல் உங்களுக்கு இதமான ஒரு சூழலை ஏற்படுத்தும்.

பொதுவாக எல்லாரும் செல்லும் இடங்கள் இல்லாமல் வித்தியாசமான இடத்திற்கு போக நினைத்தால் ஹம்பி உங்களுக்கு அட்டகாசமான பயண அனுபவத்தை வழங்கும். இங்குள்ள கட்டிட கலைகள் போட்டோஷூட் செய்ய பக்காவான தளத்தை ஏற்படுத்திக்கொடுக்கும்.

காலம் காலமாக ஹனிமூன் என்று சொன்னதும் நினைவுக்கு வருவது காஷ்மீர் தான். ரோஜா படத்தில் வரும் “புது வெள்ளை மழை .. இங்கு பொழிகின்றதே..” என்ற ரெக்கார்டிங் எல்லாம் கண்முன் வந்து போகும். தால் ஏரியில் மிதக்கும் படகு இல்லங்களில் இருந்து சூரிய உதயம், அஸ்தமனங்களை ரசிப்பது எல்லாம் அற்புத நினைவுகளை சேர்க்கும்.

மார்ச் மாதத்தில் கோவா செல்வது சரிப்பட்டு வராது. வெளியில் அடிக்கும். சீசன் இல்லை என்று பொதுவாக சொல்வார்கள். ஆனால் இந்த காலத்தில் கூட்டம் குறைவாக இருக்கும். அதனால் கோவா கடற்கறைகளில் தம்பதிகள் தனியாக உலாவர ஏற்ற நேரமாக இருக்கும்.

அதேபோல இந்தியாவின் வடகிழக்கில் அமைந்துள்ள ஷில்லாங் நகரம் நிச்சயம் தவிர்க்க முடியாத அழகின் அற்புதங்களை தன்னுள் கொண்டுள்ளது.இயற்கையின் இளமை மாறாத தன்மையோடு உங்கள் புதிய வாழ்க்கையைத் தொடங்க விரும்பினால் அதற்கு சரியான இடமாக ஷில்லாங் அமையும்.

குளிர் மற்றும் இதமான வெதுவெதுப்பு ஆகிய இரண்டு சூழலையும் ஒரே இடத்தில் அனுபவிக்க எண்ணும் தாம்பதிகளுக்கு ராஜஸ்தானில் அமைந்துள்ள மவுண்ட் அபு ஏற்ற இடமாக இருக்கும். இந்தமலை சிகரத்தில் விழும் சூரிய அஸ்தமனகாட்சி நிச்சயம் உங்கள் கண்களை கொள்ளையடிக்கும். அது உறுதி.

உதய்பூர் உங்களுக்கு இயற்கை அழகோடு ஒரு அரசர்கள் கால வாழ்க்கையை சேர்த்து கொடுப்பதாக இருக்கும். உங்கள் துணைவரோடு மிகவும் வசதியான ராஜபோக ஹனிமூனை கழிக்க விரும்பினால் மார்ச் மாதமே உதய்பூருக்குச் செல்ல சிறந்த நேரமாகும். இந்த காலத்தில் உதய்ப்பூர் வானிலை இதமாக இருக்கும்.