வேக்ஸிங் செய்த சருமத்தில் எரிச்சல், பருக்களை போக்க பயனுள்ள டிப்ஸ்கள்!

உடலில் உள்ள தேவையற்ற ரோமங்களை நீக்க வேக்ஸிங் மற்றும் த்ரெட்டிங் பயன்படுகிறது. கை, கால் உள்ளிட்ட உடலின் எந்த பகுதியில் இதனை செய்தாலும் வலி அதிகமாக இருக்கும் என்பது அனைவரும் நன்கு அறிந்த விஷயம். அதுவே முகம் போன்ற மெல்லிய மற்றும் உணர்வுத்திறன் அதிகம் கொண்ட சருமத்திற்கு வேக்ஸிங் அல்லது த்ரெட்டிங் செய்யும் போது, முகப்பரு, எரிச்சல், சருமம் சிவந்து போவது, அலர்ஜி போன்ற தேவையற்ற பின்விளைவுகளை எதிர்கொள்ள நேரிடலாம்.

அதிர்ஷ்டவசமாக, இந்த சிக்கலைக் குறைக்கவும் தவிர்க்கவும் பலவழிமுறைகள் இருக்கின்றன. த்ரெட்டிங் அல்லது வேக்ஸிங் செய்த பிறகு என்ன மாதிரியான வழிமுறைகள் உள்ளன என்பதை பற்றி விரிவாக காணலாம்...

வேக்ஸிங் செய்யும் முன் : முகத்தில் உள்ள எக்ஸ்ட்ரா ரோமத்தை அகற்ற வேக்ஸிங் செய்யும் முன்பு உங்களுடைய முகத்தை நன்றாக கழுவி சுத்தப்படுத்திக் கொள்ளுங்கள். முகத்தில் எந்தவிதமான லோஷன்கள் மற்றும் மேக்கப் பொருட்கள் பூசப்படவில்லை என்பதை உறுதி செய்து கொள்ளுங்கள். மேலும் உங்கள் முகத்திற்கு ஒரு நல்ல எக்ஸ்போலியேட்டரை பயன்படுத்துவது இறந்த செல்களை நீக்க உதவும்.

சரியான வேக்ஸிங் தேர்வு : வேக்ஸிங் செய்து கொள்ளும் முன்பு உங்களுடைய சருமம் எந்தவகையைச் சார்ந்தது என்பதை சரும பராமரிப்பு நிபுணர் அல்லது அனுபவமிக்க அழகு கலை நிபுணர் உதவியுடன் பரிசோதித்து கொள்ளுங்கள். லேசான வெக்சை உடலின் பிற பாகத்தில் பயன்படுத்தி ஏதாவது அலர்ஜி ஏற்படுகிறதா? என சோதித்து பார்க்க வேண்டும். மேலும் உங்களுடைய சருமம் உணர்திறன் அதிகம் கொண்டதாக இருந்தால் நிச்சயம் செமி சாலிடான கோல்டு வேக்ஸிங்கை தேர்வு செய்வது நல்லது.

குளிர்ந்த தண்ணீரில் ஒத்தடம் : வீக்கம், எரிச்சலை கட்டுப்படுத்த குளிர்ந்த நீரில் ஒத்தடம் கொடுப்பது இயற்கையான தீர்வாகும். வேக்ஸிங் செய்த பிறகு குளிர்ந்த நீரில் நனைத்த துணி அல்லது ஐஸ் கட்டியை 20 நிமிடங்கள் வைத்து ஒத்தடம் கொடுக்கலாம்.

வெப்பத்தை தவிர்க்கவும் : வெப்பத்தால் வீக்கம் அதிகரிக்கலாம், எனவே வேக்ஸிங்கிற்கு பிறகு முடிந்த அளவிற்கு முகத்தை வெயிலில் இருந்து பாதுகாப்பது நல்லது. ஸ்கார்ப் அல்லது துப்பட்டா கொண்டு முகத்தை மூடிக்கொள்ளலாம். அதேபோல் வேக்ஸிங்கிற்கு பிறகு சூடான நீரில் குளிப்பதை தவிர்க்க வேண்டும்.

சுகர் ஸ்க்ரப் : வேக்ஸிங்கிற்கு பிறகு சுகர் ஸ்க்ரப் பயன்படுத்தலாம், இது சருமத்தில் வர உள்ள முகப்பருக்கள் மற்றும் வீக்கத்தை குறைக்க உதவும். கடைகளிலேயே ஏராளமான சுகர் ஸ்க்ரப்கள் வகைகள் கிடைக்கின்றன, அதில் இருந்து உங்களுக்கு விருப்பமான ஒன்றை வாங்கிக்கொள்ளலாம் அல்லது அரை கப் சர்க்கரை உடன் தேங்காய் அல்லது ஆலிவ் எண்ணெயை கலந்து வீட்டிலேயே எளிமையான சுகர் ஸ்க்ரப்பை தயாரித்துக்கொள்ளலாம்.

கற்றாழை : அலோவேரா எனப்படும் சோற்றுக்கற்றாழை இயற்கையாகவே நம்ப முடியாத அளவிற்கு சரும அழற்சிக்கான எதிர்ப்பு சக்தியை வழங்குகிறது. வேக்ஸிங்கிற்கு பிறகு சிறிய துண்டு கற்றாழையை எடுத்து, தினந்தோறும் 3 முறை பாதிக்கப்பட்ட சருமத்தின் மீது வைத்து மசாஜ் கொடுக்கலாம்.