உலகின் பணக்கார வளர்ப்பு பிராணிகள் குறித்து தெரிந்து கொள்ளுங்கள்

நாய், பூனை, கோழி உள்ளிட்ட வளர்ப்பு பிராணிகள் என்றால் பிடிக்காதவர்கள் இருக்க முடியாது. ஏழை, பணக்காரர் வித்தியாசம் இல்லாமல் அனைவரது வீடுகளிலும் வளர்ப்பு பிராணிகள் உண்டு. குறிப்பாக, கிராமப்புறங்களில் உள்ள வீடுகளில் ஏராளமான கோழிகளும், நாட்டு நாய்களும் வளர்க்கப்படும். அதுவே நகர்ப்புற வீடுகள் என்றால் கட்டாயம் வெளிநாட்டு வகை நாய்கள் அல்லது உள்நாட்டிலேயே மிகவும் திறன் வாய்ந்ததாகக் கருதப்படும் ராஜபாளையம், சிப்பி பாறை போன்ற வகை நாய்கள் வளர்க்கப்படும்.

வளர்ப்பு பிராணிகள் சில விலை அதிகம் என்றாலும், வெளிநாடுகளில் இருப்பதைப் போன்ற விலை வர முடியாது. ஏனென்றால், அங்கு சிலர் வளர்ப்பு பிராணிகளின் பெயரில் சொத்துக்களை எழுதி வைத்திருப்பதால் அவை பல கோடி ரூபாய் மதிப்பு கொண்டவையாக இருக்கின்றன. உங்கள் வாழ்நாள் வருமானத்தையே கொடுத்தாலும் போதாது என்ற அளவுக்கு பணக்கார வளர்ப்பு பிராணிகள் குறித்து கேள்விப்பட்டது உண்டா? ஆம், அதுபோன்ற பிராணிகள் குறித்த பட்டியலைத்தான் இந்த செய்தி வாயிலாக அறிந்து கொள்ள இருக்கிறோம்.

டார்தார் சாஸ் : டார்தார் சாஸ் என்பது பூனை. இதனை கிரெம்பி கேட் என்றும் அழைக்கிறார்கள். அப்பாவியான, கோபம் கலந்த பார்வையை கொண்டிருப்பதால் எல்லோருக்கும் பிடித்தமானதாக இருக்கிறது. சமூக வலைதளங்களிலும், அதில் வரும் மீம்ஸ்களிலும் இந்த பூனை மிகவும் பிரபலம். ஆனால், இதன் மதிப்பு ரொம்பவும் அதிகம் இல்லை. சுமார் 100 மில்லியன் டாலர்கள் மட்டுமே! திரைப்படம் ஒன்றிலும் நடித்திருக்கிறதாம்.

குண்தர் 4 : குண்தர் 4 என்பது நாய். சுமார் 80 மில்லியன் டாலர்கள் விலை கொண்ட குண்தர் 3 நாய்க்கு பிறந்த ஆண் நாய் தான் இந்த குண்தர் 4. இதை பராமரிப்பவர்கள் இதன் மீது செய்துள்ள முதலீடுகள் காரணமாக இதன் மதிப்பு இப்போது 400 மில்லியன் டாலர்களாக உள்ளது. இதற்கு தனி உதவியாளர் உண்டு.

ஓப்ரா வின்ஃபிரே : ஓப்ரா வின்ஃபிரே என்பது பெண் நாய் ஆகும். இதன் மதிப்பு 30 மில்லியன் டாலர்கள் ஆகும். ஆகவே, இந்த நாய் இறக்கும் பட்சத்தில், அது பெற்றெடுத்த சேடி, சன்னி, லூக், லெய்லா, லாரன் போன்ற பிள்ளைகளுக்கு இந்தப் பணம் போய் சேருமாம். நல்ல பணக்கார பரம்பரை தான் போல.

கிகூ : பட்டியலில் நாய், பூனை எல்லாம் இடம்பெறும்போது கோழி மட்டும் இல்லாமல் போகுமா என்ன? பிரிட்டீஷ் பதிப்பாளர் மைல்ஸ் பிளேக்வெல் என்பவருக்கு சொந்தமான கிகூ என்ற கோழியின் மதிப்பு 15 மில்லியன் டாலர்கள் ஆகும்.

டொமாசினோ : டொமாசினோ என்பது பூனை ஆகும். இதன் பெயரில் 13 மில்லியன் டாலர்கள் அளவுக்கு சொத்து இருக்கிறது. எண்ணற்ற பங்களா, எஸ்டேட் போன்றவை இதன் பெயரில் உள்ளன.

பிளாக்கி : கின்னஸ் உலக சாதனை பட்டியலின்படி உலகில் உள்ள பணக்கார பூனைகளில் இந்த பிளாக்கியும் ஒன்றாகும். இதன் சொத்து மதிப்பு 12.5 மில்லியன் டாலர்கள் ஆகும்.