உங்கள் வாழ்க்கைத் துணை உங்களை ஏமாற்றுகிறார் என்பதற்கான அறிகுறிகள்.!

கணவன், மனைவி இருவருமே ஒருவருக்கு, ஒருவர் அன்பு செலுத்தி, உண்மையாக வாழ்ந்தால் மட்டுமே தாம்பத்ய வாழ்க்கை சிறப்பாக அமையும். ஆனால், ஏதோ சில காரணங்களால் உங்கள் வாழ்க்கை துணைக்கு உங்கள் மீதான ஈர்ப்பு குறையத் தொடங்கிவிடும் அல்லது திடீரென்று உங்களைவிட அழகான, திறமையான நபரை கண்டதும் மனதை பறிகொடுத்து விடுவார்கள்.

இன்னொரு ஆணுடன் அல்லது பெண்ணுடன் புதிய பந்தம் உருவான பிறகு உங்கள் மீதான அக்கறை மெல்ல, மெல்ல குறையத் தொடங்கும். ஒரு கட்டத்தில் உங்கள் வாழ்க்கையில் இருந்து முழுமையாக விலகிச் செல்வார்கள். ஆரம்ப கட்டத்திலேயே இதை சில அறிகுறிகள் மூலமாக கண்டறிந்து, கண்டித்து வைத்துக் கொள்வது நல்லது.

வழக்கத்திற்கு மாறான நடத்தைகள் : உங்கள் வாழ்க்கைத் துணையின் பழக்க, வழக்கங்கள் மற்றும் நடத்தைகள் திடீரென்று மாற்றம் அடையத் தொடங்கும். அவர்களின் தினசரி நடவடிக்கைகளில் எந்த காரணமும் இன்றி நீங்கள் மாற்றங்களை கவனித்தீர்கள் என்றால், அது ஏன் என்பதை கேட்டு தெரிந்து கொள்ளுங்கள். புதிய உறவு மலர்ந்துள்ளதன் வெளிப்பாடாக அது இருக்கலாம்.

ரகசியத்தன்மை அதிகரிப்பது : ஃபோன், லேப்டாப் அல்லது சமூக வலைதளங்களில் பாஸ்வார்டுகளை மாற்றி உங்களுக்கு தெரியாமல் ரகசியத்தன்மையை கடைப்பிடிக்கிறார்கள் என்றால் உங்களிடம் இருந்து எதையோ மறைக்கத் தொடங்கியுள்ளனர் என்று அர்த்தம். சிலர் எதையுமே வெளிக்காட்டிக் கொள்ளாமல் சமூக வலைதளங்களில் பிறரிடம் ஜொள்ளு விட்டுக் கொண்டிருப்பார்கள்.

தோற்றத்தில் மாற்றம் : இதுநாள் வரையிலும் தன்னுடைய தோற்றம் குறித்து பெரிதும் அலட்டிக் கொள்ளாமல் தான்தோன்றித்தனமாக சுற்றிக் கொண்டிருந்தவர்களின் தோற்றத்தில் திடீரென்று மாற்றங்கள் ஏற்படுகிறது என்றால், அது பரிசீலனைக்கு உரிய விஷயமாகும். புதுப்புது ஆடைகள், சன் கிளாஸ் என்று சகலத்திலும் மாற்றங்களை பார்க்கலாம்.

வீட்டை விட்டு வெளியே இருப்பது : அலுவலகத்திற்கு வேலைக்கு சென்றோமா, திரும்பி வந்தோமா என்றிருப்பவர்களின் வாழ்க்கையில் திடீரென்று பல மாற்றங்கள் தென்பட தொடங்கும். காரணமேயின்றி வீட்டிற்கு தாமதமாக வருவார்கள். ஏதேதோ காரணங்களை சொல்லி வீட்டை விட்டு வெளியிடங்களில் வலம் வந்து கொண்டிருப்பார்கள். புதிய நபருடன் ஊர் சுற்றுவதன் அறிகுறி இதுவாகும்.

ஆர்வம் குறைவது : முன்பெல்லாம் எப்போதும் உங்களுடன் ஒட்டிக் கொண்டு திரியும் உங்கள் வாழ்க்கை துணை இப்போது உங்களை கண்டுகொள்ள நேரமின்றி ஓடிக் கொண்டிருப்பார். உங்கள் மீதான பாசம், அக்கறை எல்லாம் குறையத் தொடங்கிவிடும். சுருக்கமாகச் சொன்னால் “நீ யாரோ, நான் யாரோ’’ என்ற மனநிலையில் வலம் வருவார்கள்.

தற்காப்பு மனநிலை : தன்னைப்பற்றி அணு அளவும் உங்களுக்கு தெரிந்து விடக் கூடாது என்பதில் மிகுந்த ஆர்வம் கொண்டிருப்பார்கள். எப்போதும் தங்கள் இருப்பிடம், நடவடிக்கை போன்றவற்றை ரகசியமாக வைத்துக் கொள்வார்கள். நீங்கள் அதுகுறித்து கேட்டாலும் விளக்கம் தராமல் சண்டையிடுவார்கள்.

செலவுகள் அதிகரிப்பது : உங்கள் வாழ்க்கை துணையின் டெபிட் கார்டு அல்லது கிரெடிட் கார்டுகளின் பரிவர்த்தனைகளை கவனித்தால் ஏதேதோ புதிய செலவினங்களை மேற்கொண்டிருப்பார்கள். குறிப்பாக பரிசுபொருட்களை வாங்கியிருப்பார்கள். அதை அவர்களின் மனம் கவர்ந்தவர்களுக்கு அன்பளிப்பாக கொடுத்திருக்கலாம்.

அன்யோன்யம் குறைவது : கணவன், மனைவி எப்போதுமே ஒருவருக்கு, ஒருவர் அன்பையும், அன்யோன்யத்தையும் வெளிப்படுத்த வேண்டும். குறிப்பாக உடல் ரீதியிலான நெருக்கம் தன்னியல்பாக ஏற்படும். மாறாக இதில் ஆர்வம் குறையத் தொடங்கினால், அவர்களின் சிந்தனை வேறெங்கோ இருக்கிறது என்று அர்த்தம்.

கண் தொடர்பை தவிர்ப்பது : உங்கள் வாழ்க்கை துணை உங்களை ஏமாற்றிக் கொண்டிருக்கிறார்கள் என்பதற்கான மிக முக்கியமான அறிகுறி இதுவாகும். எப்போதும் முகம் கொடுத்து பேச மாட்டார்கள். குறிப்பாக உங்கள் கண்களை பார்த்துப் பேசுவதை தவிர்த்து விடுவார்கள். குறிப்பாக, நேர்மை, விசுவாசம் குறித்து பேசும்போது அவர்களின் கண்கள் தடுமாறும்.