எப்போதும் செல்போன்.. பாலுறவு சிக்கல்.. பார்ட்னர் ஏமாற்றுகிறார் என்பதற்கான அறிகுறிகள்.!

திருமண வாழ்க்கையில் கணவன், மனைவி இருவருமே ஒருவருக்கு ஒருவர் அன்பு செலுத்தி உண்மையாக வாழ வேண்டும். அப்படி இருந்தால் மட்டுமே அந்த உறவு பலம் மிகுந்ததாக ஆயுள் வரை நீடித்து நிற்கும். ஆனால், இதில் யாரோ ஒருவர் ஏமாற்ற தொடங்கினாலும் கூட அந்த பந்தம் சுமூகமானதாக இருக்காது.

ஏமாற்றுதல் என்றால் உடலளவில் மற்றொரு இணையருடன் தொடர்பு கொண்டிருக்க வேண்டும் என்று அர்த்தம் இல்லை. மாறாக மனதளவிலும் கூட பிறருடன் அவர்கள் தொடர்பில் இருக்கலாம். சுருக்கமாக சொல்லப்போனால் வேறொரு ஆணுடன் அல்லது பெண்ணுடன் ஜொள்ளு வடிப்பதை வாடிக்கையாக கொண்டிருப்பார்கள். ஆனால், இது போன்ற செயல்பாடுகளை சில அறிகுறிகள் மூலமாக நாம் தெரிந்து கொள்ளலாம்.

மற்றவர்களின் மன விருப்பங்களுக்கு முன்னுரிமை : கணவராக இருந்தாலும் சரி அல்லது மனைவியாக இருந்தாலும் சரி உங்களுடைய மன விருப்பத்திற்கு முன்னுரிமை தருபவராக இருக்க வேண்டும். ஆனால், உங்கள் கண் எதிரிலேயே வேறொரு நபரின் மன விருப்பத்திற்கு அவர்கள் செவி சாய்க்கிறார்கள் என்றால் உங்களை இரண்டாம் பட்சமாக கருதுகிறார்கள் என்று அர்த்தம்.

எப்போதும் ஃபோனும் கையுமாக இருப்பது : அலுவலக சூழல் அல்லது நட்பு ரீதியாக சில சமயம் மற்றவர்களுடன் ஃபோனில் பேசுவது அல்லது டெக்ஸ்ட் மெசேஜ் செய்வது போன்றவை எதார்த்தமான விஷயம் தான். ஆனால் எந்த நேரமும் ஃபோனும், கையுமாக மூழ்கி இருக்கிறார்கள் என்றால் யாரோ ஒருவரின் அன்புக்கு அவர்கள் அடிமையாகி வருகிறார்கள் என்று அர்த்தம்.

உங்களிடமிருந்து விலகிச் செல்வது : ஒரே வீட்டில், ஒரே அறையில் வாழ்க்கை. ஆனால், ஒன்றாக அமர்ந்து உரையாடி அல்லது சாப்பிட்டு பல நாட்கள் ஆகிறது அல்லது உடல் ரீதியாக நெருங்கி பல நாட்கள் ஆகிறது என்றால் உங்கள் பார்ட்னர் உங்களிடமிருந்து விலகிச் செல்ல தொடங்கியுள்ளார் என்று அர்த்தம். உங்கள் மீதான ஈர்ப்பு குறைந்து வருவதை நீங்கள் உணர்ந்து கொள்ளலாம்.

நெருக்கம் குறைவது : வீட்டில் கணவன், மனைவியர் ஒருவரை ஒருவர் அவ்வபோது விளையாட்டாக சீண்டுவது, அதன் தொடர்ச்சியாக பாலியல் உறவில் ஈடுபடுவது போன்றவை அவர்களுக்கிடையிலான நெருக்கத்தை உணர்த்துவதாக அமையும். ஆனால், இவை இல்லை என்றால் யாரோ ஒருவர் மனதளவில் பிடி கொடுக்கவில்லை என்று புரிந்து கொள்ளலாம்.

ரகசிய திட்டங்கள் : சாதாரண விஷயங்களை கூட உங்களுடன் பகிர்ந்து கொண்டவர்கள் இப்போது முக்கியமான திட்டங்கள் மற்றும் சந்திப்புகள் குறித்து தகவல் தெரிவிப்பதில்லை என்றால் உங்களிடமிருந்து ஏதோ ஒன்றை அவர்கள் மறைக்க விரும்புகின்றனர் என்பதை புரிந்து கொள்ளுங்கள்.

எரிந்து விழுவது : உங்கள் பார்ட்னரின் சந்தேகத்திற்கு இடமான நடவடிக்கைகள் குறித்து நீங்கள் அவர்களிடம் கேள்வி எழுப்பும் போது உங்களுக்கு முறைப்படி பதில் அளிக்காமல் எரிந்து விடும் மனப்பாங்குடன் நடந்து கொள்வார்கள்.

அடிக்கடி விமர்சனம் செய்வது : கணவன் மனைவியிடையே மாற்றுக்கருத்து என்பது இல்லாமல் இருக்க முடியாது. ஆனால் எந்த நேரமும் உங்களை குறை காண்பதிலேயே ஒருவர் குறியாக இருக்கிறார் அல்லது பிறருடன் ஒப்பிட்டு பேசுகிறார் என்றால் அதை நீங்கள் கவனத்தில் கொள்ள வேண்டும்.

குடும்பத்தை தவிர்ப்பது : இரு தரப்பு குடும்ப உறுப்பினர்கள், உறவுகள், நண்பர்கள் போன்றவர்களை சந்திப்பதையும் அவர்களுடன் உரையாடுவதையும் அவர்கள் விரும்ப மாட்டார்கள். எந்த நேரமும் தனிமையை விரும்புவார்கள்.

எண்ண ஓட்டங்கள் மாறுவது : வீட்டில் எல்லாம் சுமூகமாக இருக்கும் சூழலிலும், எல்லோரும் கலகலப்பாக இருக்கின்ற சூழலிலும் பார்ட்னரை ஏமாற்றக்கூடிய நபர் மட்டும் ஆழ்ந்த சிந்தனையில் மூழ்கி இருப்பார். யாருடனும் பிடி கொடுத்து பேச மாட்டார். எப்போதுமே கவலை தோய்ந்த முகத்தில் இருப்பார்கள்.