துணைக்கும் உங்களுக்கும் உள்ள ஒற்றுமை எப்படிப்பட்டது..? இந்த விஷயங்களை கவனியுங்கள்..

திருமணங்கள் செய்ய பணம், படிப்பு, அந்தஸ்து என பல பொருத்தங்கள் பார்க்கப்படுகின்றன. இது எல்லாவற்றையும் பார்த்து, பார்த்து செய்கின்ற நாம் மனப் பொருத்தம் அமைகிறதா என்பதை பார்ப்பதில்லை. ஆகவே தான், பல வீடுகளில் சண்டையும், சச்சரவுமாக இருக்கின்றன. உங்களுக்கும், உங்கள் வாழ்க்கை துணைக்கும் இடையே மனப் பொருத்தம் கனக்கச்சிதமாக இருக்கிறதா, இல்லையா என்பதை நாம் சில அறிகுறிகளை வைத்து தெரிந்து கொள்ளலாம். அவை இதோ…

ஒருவரை ஒருவர் முழுமையாக தெரிந்து வைத்திருப்பது : உடல் இரண்டாக இருந்தாலும் உள்ளம் ஒன்றாக இருக்க வேண்டும். இருவரின் சிந்தனையும் ஒரு முகமாக இருக்க வேண்டும். உங்கள் கணவரை பற்றி அல்லது மனைவியை பற்றி உங்களுக்கு தெரியாத விஷயங்களே இருக்கக் கூடாது. எது பிடிக்கும், எது பிடிக்காது என எல்லாவற்றையும் உணர்ந்தவராக இருக்க வேண்டும்.

மாற்றுக் கருத்து இல்லை : தம்பதியர் ஒருவரை, ஒருவர் மாறாத அன்புடன் நேசித்து வருகின்றனர் என்றால் இருவருக்கு இடையே கருத்து வேறுபாடுகள் இருக்காது. குறிப்பாக, ஒருவரின் முடிவை மற்றொருவர் எந்தவித தயக்கமும் இல்லாமல் ஏற்றுக் கொள்வார்கள்.

பொதுவான ஆசைகள் : கணவன், மனைவி இருவரின் ஆசைகளும் ஒன்றுபோலவே இருக்கும். சாதாரணமாக ரெஸ்டாரண்ட்களில் சாப்பிடச் சென்றால் கூட இருவரும் சொல்லி வைத்தார்போல ஒரே உணவை ஆர்டர் செய்து சாப்பிடுவார்கள்.

சண்டைகள் : செல்லமான சண்டைகள் இல்லாத வாழ்க்கை சலிப்பு தட்டிவிடும். ஆக, சின்ன, சின்ன சண்டைகள் தேவையானது தான். அவை ஆரோக்கியமான தீர்வுகளை நோக்கியதாக இருக்க வேண்டும்.

கருத்து ஒற்றுமை : ஒருவருக்கு, ஒருவர் விட்டுக் கொடுத்துச் செல்லும் சூழ்நிலை காணப்படும். நமக்கு ஏதோ ஒன்று பிடிக்கவில்லை என்றாலும், குடும்ப நலன் கருதி வாழ்க்கை துணை சொல்வதை கேட்டுக் கொள்வோம்.

எதிர்கால திட்டமிடல் : தங்கள் எதிர்காலம் எப்படி அமைய வேண்டும் என்பது குறித்து கணவனும், மனைவியும் உட்கார்ந்து ஆலோசனை செய்து முடிவு செய்வீர்கள். வீடு, கார் வாங்குவது அல்லது பிள்ளைகளின் நலன் குறித்து முடிவு எடுப்பது போன்ற விஷயங்களில் இதை உணரலாம்.

தீர்வுகளை தேடுவது : பிரச்சினைகளை பூதாகரமாக்கி மென்மேலும் சண்டையிட்டுக் கொண்டிருக்காமல், தீர்வை நோக்கி இருவரும் பயணிப்பீர்கள்.

குடும்ப ஒற்றுமை : இது கணவரின் குடும்பம் அல்லது இது மனைவியின் குடும்பம் என்று வேறுபாடு காட்டாமல், எல்லோரையும் தன்னுடைய உறவுகளைப் போல அரவணைத்துச் செல்லக் கூடிய பண்பு இருக்கும்.

முயற்சி செய்வது : தங்களிடையே இருக்கும் பந்தத்தை பலப்படுத்துவதற்கான முயற்சிகளை இருவரும் இணைந்தே மேற்கொள்வது. அதாவது, பணிச்சூழல் காரணமாக இருவருக்கும் இடையே ஒன்றாக நேரம் கிடைப்பது அரிதாக இருந்தாலும் கூட, கிடைக்கும் நேரத்தில் சிறப்புக் கவனமெடுத்து அன்பை பரிமாறிக் கொள்வீர்கள்.