இனிக்க இனிக்க பேசுவாங்க.. உஷார்! தவறான நபருடன் நட்பு.. இதுதான் அறிகுறிகள்!

நீங்கள் வசிக்கும் பகுதியில் உள்ள நண்பர்கள் அல்லது அலுவலகத்தில் பணியாற்றக் கூடிய சக ஊழியர்களிடம் நாம் நட்பு பாராட்டுவது இயல்பான விஷயம் தான். பார்த்த மாத்திரத்தில் யார் நல்லவர், கெட்டவர் என்று கண்டுபிடித்து விட முடியாது. ஆனால், நீங்கள் தேர்வு செய்த நண்பர் தவறானவர் என்றால், அது உங்கள் நலனுக்கும் கேடு விளைவிப்பதாக அமையும். உங்கள் முகத்திற்கு நேராக இனிக்க, இனிக்க பேசினாலும் கெட்டெண்ணம் கொண்ட நட்புக்களை புரிந்து கொள்ளாவிட்டால் உங்களுக்குத்தான் ஆபத்தாக முடியும்.

ஆகவே, உங்கள் நண்பர் தவறானவரா அல்லது நல்லவரா என்பதை வெகு விரைவாக யூகித்துவிட வேண்டும். மன நல ஆலோசகர் ஜிஞ்சர் தீன் இதுதொடர்பாக இன்ஸ்டாகிராமில் பல ஆலோசனைகளை வழங்கியுள்ளார். அவற்றை பார்க்கலாம்.

உங்களை அப்படியே காப்பி அடிப்பது : உங்களிடம் இருக்கின்ற திறமை, அதற்காக நீங்கள் பெறுகின்ற பாராட்டு, இவையெல்லாம் உங்கள் நண்பரிடத்தில் பொறாமையை ஏற்படுத்தக் கூடும். ஆனால், இதை துளியளவும் காண்பித்துக் கொள்ள மாட்டார்கள். ஆனால், உங்கள் நடவடிக்கையை அப்படியே காப்பி அடித்து, ஏதோ இயல்பாக அந்தத் திறமையை கொண்டிருப்பதை போல காட்டிக் கொள்வார்கள்.

ஆரோக்கியமற்ற போட்டி : அவர்கள் என்னதான் முயற்சி செய்தாலும், அதை தாண்டி நீங்கள் வளர்ச்சி அடைவது அவர்களுக்கு பொறுக்காது. ஒரு கட்டத்தில் அவர்களையும், உங்களையும் ஒப்பிட்டு பேசுவார்கள். நீங்கள் எதை செய்தாலும், அதைவிட அவர்கள் சிறப்பாக செயல்பட்டதாக கூறி சுயபெருமை அடைவார்கள்.

நம்மை மட்டம் தட்டுவது : நம் மனதில் தாழ்வு மனப்பான்மையை உருவாக்கவும், அவர்களை உயர்ந்தவராக காட்டிக் கொள்ளவும், நம்மை தரம் தாழ்த்தி பேச தொடங்குவார்கள். சக ஊழியர்கள், நண்பர்கள் மத்தியில் நம்மை மட்டம் தட்டி பேசுவது அவர்களின் வாடிக்கையாக இருக்கும்.

போலியான அன்பை பொழிவது : நம் மீது அவர்களுக்கு துளி கூட நல்லெண்ணம் இருக்காது. ஆனால், போலியான அன்பை அள்ளிக் கொட்டுவார்கள். அவர்கள் பயன்படுத்துகின்ற வார்த்தைகளில் இதை தெரிந்து கொள்ளலாம். திடீரென்று நம்மை அளவுக்கு அதிகமாக புகழ்ந்து தள்ளுவார்கள்.

புறம் பேசுவது : சக ஊழியர்கள், நண்பர்கள் மத்தியில் நம்மை பற்றி குறை பேசிக் கொண்டிருப்பார்கள். ஆனால், நம்மை பார்த்து விட்டால் மட்டும் எதுவுமே தெரியாதது போல நடிப்பார்கள். இருப்பினும், கண்களை பார்த்தால் தடுமாறும். உங்கள் ஆழ்மனம் அதை கண்டு கொள்ளும்.

பகையை பற்ற வைப்பது : நாம் எவ்வளவு தான் நல்லவர் என்றாலும், நமக்கென்று சில பகை இருக்கத்தான் செய்யும். அந்த பகையாளிகளுடன், அவர்கள் கூட்டு சேர்ந்து கொண்டு நமக்கு எதிரான விஷயங்களை பற்றவைத்து விடுவார்கள். பகையாளியின் மனதில் நம்மை பற்றி கோபத்தை உண்டாக்குவார்கள்.