தம்பதிகள் கருத்தரித்தலுக்கான வாய்ப்புகளை இழக்க இந்த தவறுகளே காரணம்..! விளக்கும் மருத்துவர்

பல இளம் தம்பதியர்கள் கருத்தரித்தல் பிரச்சினையை எதிர்கொள்கின்றனர் என்பதை தெரிந்து கொள்ள புள்ளி விவரங்களை ஆராய தேவையில்லை. ஊருக்கு, ஊர் அதிகரித்து வரும் கருத்தரித்தல் மையங்களையும், அதில் காத்துக் கிடக்கும் தம்பதியர்களையும் பார்த்தாலே இந்த உண்மை விளங்கும்.

தோராயமாக 10 முதல் 15 சதவீத தம்பதியர்கள் கருத்தரிக்க முடியாமல் சிரமத்தை எதிர்கொள்கின்றனர். தம்பதியர்கள் எதிர்கொள்ளும் கருத்தரித்தல் பிரச்சினைகளுக்கு அவர்களது மோசமான வாழ்வியல் பழக்க, வழக்கங்களே காரணம் என்பதில் மாற்றுக் கருத்து இருக்க முடியாது.

உணவுப் பழக்கம் மற்றும் பிஎம்ஐ : ஆரோக்கியமான உணவுகள் மற்றும் சீரான உணவுப் பழக்கத்தை கொண்டிருந்தால் மட்டுமே இனப்பெருக்க நலன் மேம்படும். குறிப்பாக, ஆண்களைப் பொருத்தவரையில் அல்புமின், செரோபிளாஸ்மின் மற்றும் ஃபெர்ரிடின் போன்ற ஆண்டி ஆக்ஸிடண்டுகள் அதிகரிக்க சத்தான உணவு அவசியமாகும். இவையெல்லாம் ஆண்களின் விந்தணு தரத்தை மேம்படுத்தக் கூடியவை ஆகும்.

ஆக, மோசமான உணவுப் பழக்கத்தை கொண்டிருந்தால் இவையெல்லாம் பாதிக்கப்படும் என்பதில் மாற்றுக் கருத்து இல்லை. அதேபோல, பெண்களும் ஆரோக்கியமற்ற உணவுப் பழக்கத்தை கொண்டிருந்தால் அவர்களின் கருமுட்டை தரம் பாதிக்கப்படும்.

மகளிருக்கான இனப்பெருக்க ஆரோக்கியம் மேம்பட வேண்டும் என்றால், தாவரம் சார்ந்த புரதங்களை அதிகமாகவும், கிளைசமிக் இண்டெக்ஸ் குறைவாக உள்ள உணவுகளையும் எடுத்துக் கொள்ள வேண்டும். பல்வகை விட்டமின்கள் அடங்கிய உணவுகளை எடுத்துக் கொள்வதன் மூலமாக கருமுட்டை வெளியேற்ற பிரச்சினைகளுக்கு தீர்வு காண முடியும்.

பொதுவாக உயரத்திற்கு ஏற்ற உடல் எடை மற்றும் இதர நலனை குறிக்கின்ற பிஎம்ஐ அளவுகள் சீரானதாக இருக்க வேண்டும். இல்லை என்றால் ஆண்களின் விந்தணு தரம் பாதிக்கப்படும் மற்றும் பெண்களின் கருமுட்டை வெளியேற்றத்தில் சிக்கல் உண்டாகும்.

புகைப்பழக்கம் : சிகரெட்டில் 4 ஆயிரம் வகையான ரசாயனங்கள் உள்ளன. புகைப்பிடிக்கும் ஆண்களுக்கு மொத்த விந்தணு எண்ணிக்கை குறையும் மற்றும் விந்தணுக்களின் நகர்வு, அவற்றின் தரம், கருத்தரித்தல் திறன் ஆகியவை பாதிக்கப்படும். அதேபோல, பெண்களுக்கு புகைப்பிடிக்கும் பழக்கம் இருக்கும் பட்சத்தில் கருமுட்டை உற்பத்தி பாதிக்கப்படும்.

உளவியல் பிரச்சினைகள் : உடல் ரீதியாகவும், உளவியல் ரீதியாகவும் தம்பதியர்கள் எதிர்கொள்ளும் ஸ்ட்ரெஸ் பிரச்சினைகளும் கூட அவர்களின் கருத்தரித்தல் திறன் பாதிக்க காரணமாக அமைகிறது. அதிலும் கருத்தரித்தல் தாமதமாகும்போது அதனால் நட்பு மற்றும் சொந்தம் சார்ந்த சமூக வட்டத்தில் எழக் கூடிய விமர்சனங்கள், பிரச்சினையை கண்டறிவதற்கான பரிசோதனை, அதற்கான சிகிச்சை, இதற்கு ஆகும் செலவு என அத்தனை விஷயங்களுமே தம்பதியர்களுக்கு மனக் கவலையை அதிகரிக்கும் விஷயங்களாக உள்ளன. இதுவும் கூட தம்பதியர்களின் கருத்தரித்தல் திறனை பாதிக்க காரணமாக அமைகிறது.