Baby Care : படுக்கையிலிருந்து குழந்தைகள் தவறி கீழே விழுந்து விட்டால் உடனடியாக செய்ய வேண்டியது என்ன..?

குழந்தை பிறந்தது முதல் நன்றாக விவரம் தெரியும் வரை அதை வளர்ப்பது என்பது அவ்வளவு எளிதான வேலை இல்லை. அதிலும் சிறு குழந்தைகளை கவனித்து கொள்வது என்பது 24/7 சேவை வழங்கும் பணி போன்றதே. நாம் உறங்கும் போதும் சரி குழந்தைகள் உறங்கும் போதும் சரி, 24 மணி நேரமும் சிசிடிவி கேமரா போல குழந்தைகளை கண்காணித்து கொண்டே தான் இருக்க வேண்டும்.

குழந்தைகள் எல்லா நேரங்களிலும் பாதுகாப்பாக இருப்பதை உறுதி செய்வது பெற்றோர்கள் மற்றும் சுற்றியிருக்கும் உறவினர்களுக்கு மிகவும் சவாலான பணியாகும். புதிதாக பிறந்துள்ள குழந்தைகளை அடிக்கடி தூக்கி வைத்து பார்த்து கொள்ள முடியாது என்ற போதிலும், கைக்குழந்தை படுத்தபடியே இருந்தாலும் அதை கண்காணிக்காமல் அப்படியே விட்டு விட முடியாது.

பிறந்த குழந்தையாக இருந்தாலும் கைகள் மற்றும் கால்களை உதைத்து விளையாடுவது அல்லது அழுவது போன்ற பழக்கம் அதற்கு இருக்கும் என்பதால் மெத்தை போன்ற படுக்கையில் இருந்து திரும்பி கீழே விழுந்து விடும் அபாயம் இருக்கிறது என்பதை கவனத்தில் கொள்ள வேண்டும். குழந்தைகளை பெற்றோர்கள் அல்லது உறவினர்கள் எந்நேரமும் கண்காணித்து கொண்டே இருந்தாலும் அவர்கள் சில வினாடிகள் கவனம் சிதறினாலோ அல்லது டயர்டில் கண் அசரும் போது குழந்தைகளுக்கு சில ஆபத்துகள் நேரிடும் சூழல் உண்டாகிறது. இதை எவ்வாறு தவிர்க்கலாம்? என்பது குறித்து இங்கு தெரிந்து கொள்வோம்.,

பேபி ப்ரூஃப் (baby proof) : குழந்தை மெத்தையில் இருந்து தவறி விழுந்து பெரிய ஆபத்தில் சிக்குவதை தவிர்க்க மற்றும் வேறு சில காரணங்களுக்காக முழு வீட்டையும் பேபி ப்ரூஃப் செய்யலாம். ஆனால் குழந்தை விழாது அல்லது விழுந்தால் காயமடையாது என்பதற்கு இது முழு உத்தரவாதம் அளிக்காது என்று கருதப்படுகிறது.

என்ன செய்ய வேண்டும்.? : குழந்தைக்கு பால் கொடுப்பதற்காக பாட்டிலை எடுக்க 2 அல்லது 3 வினாடி திரும்பும் சமயத்தில், டக்கென்று குழந்தை தவறி கீழே விழ கூடும். இது கைகுழந்தைகளுக்கு மட்டுமே ஏற்படும் ஆபத்து அல்ல, கட்டில் அல்லது உயரமான நாற்காலி, ஸ்டூல் உள்ளிட்டவற்றில் ஏறி அதிலிருந்து தவறி கீழே விழும் 5 வயது குழந்தைகள் கூட இருக்கின்றன.

தவறுதலாக குழந்தைகள் கீழே விழுந்து விட்டால் அவர்களை அந்த அதிர்ச்சியில் இருந்து மீட்டு, சமாதானம் செய்ய வேண்டும்.

தெடர்ந்து அவர்களுக்கு கடுமையான காயங்கள் ஏதேனும் இருக்கிறதா என்பதை கவனமாக பார்க்க வேண்டும்.

குழந்தைகள் விழுந்ததில் தலையில் அடிபட்டிருப்பின் மிகுந்த கவனம் காட்ட வேண்டும். தலையில் ரத்தப்போக்கு அல்லது வீக்கங்கள் ஏற்பட்டுள்ளதா என்று பார்க்கவும்.

கீழே விழுந்த சில குழந்தைகள், 10 நிமிடங்களில் இயல்பு நிலைக்கு திரும்பினாலும், கீழே விழுந்த சம்பவத்தை மருத்துவ அவசரநிலையாக நினைத்து டாக்டரிடம் அழைத்து சென்று பரிசோதிப்பது முக்கியம். குழந்தை நன்றாக தானே இருக்கிறது என்று நினைத்து அஜாக்கிரதையாக இருக்க கூடாது.

விழுந்ததால் கடுமையான காயங்கள் அல்லது விளைவுகள் எதுவும் இல்லை என்பதை உறுதிப்படுத்த அடுத்த 24 மணிநேரத்திற்கு கீழே விழுந்த குழந்தையை கண்காணிப்பது அவசியம்.

சுயநினைவின்மை, கடும் ரத்தபோக்கு , எலும்பு உடைவது, மண்டை ஓடு எலும்பு முறிவு, அதிர்ச்சி மனநிலை, சத்தமிட்டு தொடர் அழுகை உள்ளிட்ட அறிகுறிகள் உடனடி மருத்துவ சிகிச்சை அளிக்க வேண்டிய சூழலை உணர்த்துகின்றன.

கூடுதலாக கீழே விழுந்த பின் குழந்தை வழக்கத்திற்கு மாறாக நடந்து கொள்வது தெரிந்தாலும் அவசர சிகிச்சைக்கு அழைத்து செல்ல வேண்டும்.

இது மாதிரியான அசம்பாவிதங்கள் குழந்தைகளுக்கு நேரும் போது தாமதிக்காமல் விரைந்து செயல்படுவது அவர்களுக்கு ஏற்படும் ஆபத்துக்களை வெகுவாக குறைக்கும் என்பது பெற்றோர்கள் எப்போதும் மனதில் வைக்க வேண்டிய விஷயம் ஆகும்.