பெற்றோர்களே உஷார்...கொரோனா குணமடைந்த பின் குழந்தைகளை அச்சுறுத்தும் MIS-C நோய் : அறிகுறிகள் , சிகிச்சை முறைகள் என்ன..?

கொரோனா தொற்று பாதிக்கப்பட்டு குணமடைந்த குழந்தைகளிடம் மிஸ்-சி (MIS-C) என்னும் அழற்சி நோய் அறிகுறி கண்டறியப்பட்டுள்ளது. ஆங்கிலத்தில் Multi-inflammatory syndrome in Children என்று கூறப்படும் இந்த நோய் குழந்தைகள் உடலின் உட்புற உறுப்புகளை கடுமையாக பாதிக்கும் அபாயத்தைக் கொண்டுள்ளது.

15 வயதிற்குக் கீழ் உள்ள கொரோனாவால் பாதித்து குணமடைந்த குழந்தைகள் அல்லது கோவிட் -19 அறிகுறிகளைக் காட்டிய நான்கு வாரங்களுக்குள் இந்த மிஸ்-சி நோயால் பாதிக்கப்படுவதாக மருத்துவர்கள் தெரிவிக்கின்றனர். இது ஏற்கெனவே இருந்தாலும் இந்த இரண்டாவது கொரோனா அலையில் மீண்டும் உருவெடுப்பதாகக் கூறுகின்றனர்.

இதனால் நோய் எதிர்ப்புத் திறன் பலவீனமடைந்து இதயம், நுரையீரல், சிறுநீரகங்கள், மூளை, தோல், கண்கள் அல்லது இரைப்பை குடல் உறுப்புகள் உள்ளிட்ட பல்வேறு உடல் பாகங்கள் பலவீனமடையக்கூடிய ஒரு நிலை ஏற்படுகிறது.

அறிகுறிகள் எப்படி இருக்கும் : காய்ச்சல், வயிற்று வலி, வாந்தி,வயிற்றுப்போக்கு, கழுத்து வலி, சொறி,வாய்ப்புண், கை,கால் வீக்கம், கழுத்தில் நெறி கட்டுதல், சிவந்த கண்கள், அதிக சோர்வாக உணர்வது இப்படியான அறிகுறிகளை குழந்தைகளிடம் கண்டால் உடனே மருத்துவரை தொலைபேசியில் அணுகி ஆலோசனை பெற்றுக்கொண்டு பின் மருத்துவமனை கொண்டு செல்வது நல்லது.

தீவிர அறிகுறிகளாக சுவாசிப்பதில் சிக்கல், மார்பில் வலி அல்லது அழுத்தம் ,குழப்பமான மனநிலை, எழுந்திருக்க முடியாத நிலை, வெளிர், சாம்பல் அல்லது நீல நிற தோல், உதடுகள், கடுமையான வயிற்று வலி போன்றவை இருக்கும். இதுபோன்ற அறிகுறிகளுக்கு உடனே தீவிர சிகிச்சை அவசியம்.

MIS-C க்கு என்ன காரணம் என்று இதுவரை கண்டுபிடிக்கவில்லை. ஒருவேளை MIS-C -யால் பாதிக்கப்பட்ட பல குழந்தைகள். COVID-19 ஐ ஏற்படுத்தும் வைரஸால் பாதிக்கப்பட்ட அல்லது COVID-19 நோயினால் பாதிக்கப்பட்டவர்களுடன் நெருக்கத்தில் இருந்திருக்கலாம் என கருதுகின்றனர். MIS-C தீவிரமானது, ஆபத்தானதும் கூட, ஆனாலும் பயப்பட வேண்டாம், MIS-C கண்டறியப்பட்ட பெரும்பாலான குழந்தைகள் மருத்துவ கவனிப்பில் இருந்து குணமடைந்துள்ளனர் என்பது ஆறுதலான விஷயம்.

மிஸ்-சியிலிருந்து குழந்தைகளை பாதுகாப்பது எப்படி : பெரும்பாலும் பெரியவர்கள் மூலமாக தான் குழந்தைகள் பாதிக்கப்படுகிறார்கள். எனவே கொரோனா தொற்றால் பாதிக்கப்பட்டால் குழந்தைகளிடமிருந்து விலகி இருங்கள். முடிந்தவரை வெளியே செல்லாமல் உங்களுக்கு தொற்று ஏற்படாதவாறு பார்த்துக்கொள்ளுங்கள்.

உங்கள் குழந்தைகளையும் முழு வீட்டையும் COVID-19 க்கு காரணமான வைரஸ் வராமல் தடுப்பதே சிறந்த வழி. தினமும் தவறாமல் முன்னெச்சரிக்கை நடவடிக்கைகளை எடுப்பதன் மூலம் உங்கள் குழந்தையை கொரோனா மற்றும் MIS-C நோயிலிருந்தும் பாதுகாக்கலாம்.