பெற்றோர்களே...குழந்தைகளுக்கு இப்போதிலிருந்தே உடல் சார்ந்த அக்கறை, ஆரோக்கியத்தில் கவனம் செலுத்த கற்றுக்கொடுங்கள்..! அதற்கான 6 வழிகள்..

ஆரோக்கியமான வாழ்க்கைதான் நோய்களிலிருந்து தப்பிப்பதற்கான ஒரே வழி. அதை மக்கள் இன்று உணரத் தொடங்கிவிட்டனர் என்றே சொல்லலாம். வாழ்க்கையில் அதிமுக்கிய விஷயமாக மாறிப்போன ஆரோக்கியத்தை அடுத்த தலைமுறைகளான நம் குழந்தைகளுக்கும் இப்போதிலிருந்தே கற்றுக்கொடுப்பது நல்லது.

தன் ஆரோக்கியத்தை தானே தற்காத்துக்கொள்வது எப்படி என்பதை அவர்களின் பழக்க வழக்கங்களின் வழியே கற்றுக்கொடுங்கள். எதிர்காலத்தில் அவர்களுக்கு மிகவும் பயனுள்ளதாக இருக்கும். எவ்வாறு கற்றுத்தருவது என்று பார்க்கலாம்.

அடிப்படையிலிருந்து ஆரம்பிக்கலாம் : குழந்தைகளுக்கு முதலில் பல் துலக்குவது, குளிப்பது குறித்த அவசியத்தையும், அதனால் கிடைக்கும் நன்மைகள் என்ன..தினமும் செய்யாவிட்டால் கிடைக்கும் தீமைகள் எனென்ன என்பதை முதலில் கற்றுக்கொடுங்கள்.

மனதை தயார் படுத்துங்கள் : அவர்களுக்கு செல்ஃபோன், டிவி, லேப்டாப் போன்ற திரை நேரத்தைக் காட்டிலும் பொம்மை, விளையாட்டுப் பொருட்களில் கவனம் செலுத்தி விளையாடுவதில் எத்தனை நன்மை என்பதை கற்றுக்கொடுங்கள். ஆக்டிவிடீஸ், யோகா, தியானம் போன்றவற்றை கற்றுத்தருதல் அவர்களை மனதளவில் பக்குவப்படுத்தும்.

உடற்பயிற்சிகள் : சில உடல் சார்ந்த விளையாட்டுகள், ஆக்டிவிடீஸ், உடற்பயிற்சி போன்றவற்றை செய்ய ஊக்கப்படுத்துங்கள். அதன் நன்மைகளையும், அமர்ந்தே இருப்பதால் வரும் தீமைகளையும் கற்றுக்கொடுங்கள். உடல் மற்றும் மன ஆரோக்கியம்தான் சிறந்த வாழ்க்கைக்கான அடிப்படை என்பதை எப்போதும் சொல்லிக்கொடுங்கள். அதற்குதான் முக்கியத்துவம் அளிக்க வேண்டும் என்று சொல்லிக்கொடுங்கள். விளையாட்டுப் பயிற்சிகளிலும் அவர்களை ஈடுபடுத்துங்கள்.

தனிப்பட்ட நேரம் : ஒவ்வொரு மனிதனுக்கும் தனக்கான நேரம் என்பது மிகவும் அவசியம். எனவே அதை தினமும் அவர்களுக்கு கொடுப்பதில் உறுதியாக இருங்கள். அந்த சமயத்தில் அவர்களுக்கு பிடித்த மாதிரி புத்தகங்கள் வாசிப்பது, பெயிண்டிங், பாட்டுப்பாடுதல் இப்படி தன் விருப்பத்தை செய்யட்டும். சும்மாவே அமர்ந்து சுவற்றை பார்த்துக்கொண்டிருந்தால் கூட பரவாயில்லை. இப்படி அந்த தனிமையின் அவசியத்தை கற்றுக்கொண்டுங்கள். இந்த தனிமை நேரம்தான் அவர்களின் மனதை உற்சாகப்படுத்தும்.

சுய அக்கறை பழக்கங்கள் கொண்ட புத்தகம் : குழந்தைகள் பள்ளி புத்தகங்களை விட இது போன்ற புத்தகங்களை படிக்க அதிகம் விரும்புவார்கள். எனவே அவர்களுக்கு சுய அக்கறை பழக்கங்கள் அடங்கிய புத்தகங்கள், ஆரோக்கியம் சார்ந்த புத்தகங்களை வாங்கிக்கொடுங்கள்.

தூக்க நேரத்தின் அவசியம் : அவர்களின் தூக்க நேரத்தில் ஒருபோதும் சமரசம் செய்து கொள்ளாதீர்கள். தூங்குவதால் கிடைக்கும் நன்மைகள் என்ன..தூங்கும்போது உடலில் நடக்கும் செயல்பாடுகள் என்ன என்பன போன்ற விஷயங்களை அவர்களுக்குக் கற்றுக்கொடுங்கள். எனவே குறிப்பிட்ட நேரத்தில் தூங்கி குறிப்பிட்ட நேரத்தில் எழுவதை உறுதி செய்யுங்கள்.