பெற்றோர்களே... உங்கள் பிள்ளைகளை திட்டுவதற்கு மறந்தும் பயன்படுத்த கூடாத 10 சொற்றொடர்கள்!

குழந்தை வளர்ப்பில் அனைவருமே வல்லுனர்கள் என்று கூறிவிட முடியாது. அதிலும் முக்கியமாக குழந்தைகள் வளர வளர அவர்களை கையாள்வதும் கட்டுப்படுத்துவதும் பல பெற்றோருக்கு மிகப்பெரும் சவாலாகி விடுகிறது. சில சுட்டிப் பிள்ளைகளை எவ்வளவு முயன்றாலும் கட்டுப்படுத்த முடியாது. அவர்களின் சேட்டைகளை தாங்க முடியாமல் பல பெற்றோர்கள் தங்கள் பிள்ளைகளை திட்டி தீர்த்து விடுவார்கள். கோபத்தில் கூறப்படும் இந்த வார்த்தைகள் சில நேரங்களில் குழந்தைகளின் மனதில் மாறாத வடுவாக மாறிவிடும். அந்த வகையில் பெற்றோர்களால் வாய்மொழியாக கூறப்பட்டு குழந்தைகளின் மனதை புண்படுத்தும் விதமாக அமையும் சொற்றொடர்களை இந்த பதிவில் பார்ப்போம்.

உன்னால் ஏன் இதை செய்ய முடியாது? இது இன்றைய காலங்களில் பல பெற்றோர்கள் தங்கள் குழந்தைகளிடம் இந்த வாக்கியத்தை பயன்படுத்துவதை பார்க்க முடியும். உங்கள் பிள்ளைகளிடம் ஒரு விஷயத்தை செய்ய சொல்லி வற்புறுத்துவதோ அல்லது அதை செய்ய முடியாத போது “மற்றவர்களால் செய்ய முடிந்த ஒன்றை உன்னால் ஏன் செய்ய முடியாது என்று கூறுவதோ” அவர்களின் திறமையை கேள்வி கேட்பது போல் அமைந்து விடும்.

நீ பிறக்காம இருந்தா சந்தோஷமா இருந்திருப்பேன்! கோபம் எந்த அளவிற்கு உச்சத்தில் இருந்தாலும் குழந்தைகளிடம் இந்த வார்த்தை உபயோகிக்க கூடாது. ஆனால் பல பெற்றோர்கள் இதன் பின் விளைவுகளை பற்றி அறியாமல் தங்கள் குழந்தைகளிடம் பலமுறை இந்த வார்த்தையை உபயோகிக்கின்றனர்.

நீ ஒரு முட்டாள் : பெற்றோர்கள் தங்கள் பிள்ளைகளை திட்டுவதற்கு இந்த வார்த்தையை தான் அதிகம் பயன்படுத்துவார்கள். இது உங்கள் குழந்தைகளை மனதளவில் பாதிக்கிறது என்பதை தெரியாமலேயே இந்த வார்த்தையை நீங்கள் பயன்படுத்துகிறீர்கள்.

நீ எதற்கும் உதவாதவன்! உங்கள் பிள்ளைகளிடம் “நீ எதற்கும் உதவாதவன்” என்று கூறும் போது அவர்கள் மனதளவில் மிகவும் தாழ்மையாக உணர்வார்கள். அந்தத் தாழ்வு மனப்பான்மை எதிர்காலத்தில் அவர்கள் தங்கள் திறமைகளை கண்டறிவதற்கு மிகப்பெரிய முட்டுக்கட்டையாக இருக்கும்.

ஏன்? சாப்பிட மறந்தியா இன்னிக்கு? பிள்ளைகள் ஒரு செயலை செய்வதற்கு மறந்தாலோ அல்லது தவறாக செய்தாலோ பெற்றவர் முதல் ஆசிரியர்கள் வரை இந்த வாக்கியத்தை பயன்படுத்துவார்கள். உண்மையில் இந்த முட்டாள்தனமான வாக்கியத்தை பயன்படுத்துவதன் மூலம் பிள்ளைகளின் மனதில் மாறாத வடுவை ஏற்படுத்துகிறீர்கள் என்பதை உணர வேண்டும்.

இதெல்லாம் செய்வதற்கு நான் எவ்வளவு கஷ்டப்பட்டேன் தெரியுமா! நீங்கள் வாழ்வில் மிகப் பெரும் சவால்களை கடந்து வந்திருக்கலாம். இப்போதும் கூட கடினமான சூழ்நிலைகளை கையாண்டு கொண்டிருக்கலாம். ஆனால் அவற்றை உங்கள் குழந்தைகளிடம் சொல்லி காட்டுவது தவறான அணுகுமுறை. அவர்களால் அதனை புரிந்து கொள்ளவோ அவற்றை சரி செய்யவோ முடியாது என்பதை பெற்றோர் உணர வேண்டும்.

உன்னால் ஏன் மற்ற குழந்தைகளை போல் இருக்க முடியவில்லை? இது குழந்தைகளை மனதளவில் மிகப் பெரும் அளவில் பாதித்துவிடும். எப்போதும் உங்கள் குழந்தைகளை மற்ற குழந்தைகளோடு ஒப்பிட்டு பேசுவது கூடவே கூடாது.

இதுக்காகத்தான் நாங்க உன்னை வளர்த்தோமா? உங்கள் பிள்ளைகள் செய்யும் சிறு சிறு தவறுகளுக்கும் நீங்கள் அவர்களை கஷ்டப்படாமல் வளர்த்ததை சொல்லிக் காட்ட வேண்டிய அவசியம் இல்லை.

வாழ்க்கை எவ்வளவு கடினம் தெரியுமா?
வாழ்க்கையின் சவால்களைப் பற்றி அடிக்கடி அவர்களுக்கு பாடம் எடுத்துக் கொண்டிருக்காதீர்கள். வாழ்வில் ஒரு சமயம் வரும்போது அவர்களை வாழ்வைப் பற்றி புரிந்து கொள்வார்கள்.

எப்போ தான் கத்துக்க போற? ஒவ்வொரு குழந்தையும் தனித்துவமானது. சில குழந்தைகள் மிக விரைவாகும் சிலர் பொறுமையாகவும் கற்றுக்கொள்ளும் தன்மை உடையவராக இருப்பார்கள். எனவே ஒரு விஷயத்தை உடனடியாக கற்றுத் தெரியும்படி அவர்களை வற்புறுத்துவதில் எந்தவித பயனும் இல்லை.