Parenting | குழந்தைக்குக் கற்றுக்கொடுக்க வேண்டிய வாழ்க்கைக்கு தேவையான முக்கிய பண்புகள் என்னென்ன?

குழந்தைகளுக்கு நற்பண்புகளைக் கற்றுக்கொடுப்பது என்பதில் பள்ளியிலிருந்து அல்ல வீட்டில் பெற்றோரிடமிருந்து துவங்க வேண்டும். அதுதான் உங்கள் குழந்தையை சமூகத்தில் நல்ல பண்பானவராக காட்டும். அது அவர்களின் வாழ்க்கையை செம்மைபடுத்தும். எனவே நீங்கள் கற்றுக்கொடுக்க வேண்டிய முக்கிய பண்புகள் என்னென்ன பார்க்கலாம்.

நல்ல வார்த்தைகள் : பேசும் போது நல்ல வார்த்தைகளை பயன்படுத்தக் கற்றுக்கொடுங்கள். தவறான வார்த்தைகள் சமூகத்தில் பார்க்கும் இடங்களில் எல்லாம் கொட்டிக் கிடக்கின்றன. எனவே அதை குழந்தைகள் தெரியாமல் பேசினாலோ அல்லது அப்படி என்றால் என்ன என்று கேள்வி கேட்டாலோ அதன் தவறை சுட்டிக் காட்டுங்கள். இது அவர்கள் பள்ளிக்குச் செல்லும்போது மற்ற குழந்தைகளோடு பேசுவதற்கு உதவும். வெறும் வார்த்தைகளை மட்டும் பழக்காமல் அதன் அர்த்தத்தையும் கூறுங்கள்.

பொறுமை அவசியம் : எந்த ஒரு காரியத்தை செய்தாலும் அதில் பொறுமை மிக மிக அவசியம் என்பதை கற்றுக்கொடுங்கள். நிதானமாக செய்யும் எந்த வேலையும் தவறாகாது. எனவே பதட்டம் தேவையில்லை, எந்த சூழலிலும் பொறுமையாக சிந்திந்து செயல்பட கற்றுக்கொடுங்கள்.

மதித்து நடத்தல் : பெரியவர்களானாலும், சிறியவர்களானாலும் எப்படி மதித்து நடக்க வேண்டும் என்பதை கற்றுக்கொடுங்கள். கீழ்ப்படிதலின் அர்த்தம், அதன் முக்கியத்துவத்தையும் கற்றுக்கொடுங்கள். இது அவர்கள் எதிர்கொள்ளப் போகும் சமூகத்தில் நிலைத்திருக்க உதவும்.

அன்பாக இருக்க வேண்டும் : யாருடமும் கோபத்துடனும், முரட்டுத்தனமாகவும் இல்லாமல் அன்பாக பேச வேண்டும். பழக வேண்டும் என்பதைக் கற்றுக்கொடுங்கள். இதை நீங்கள் குழந்தையிடம் செய்தாலே குழந்தை தானாக பின்பற்றும்.

பயம் வேண்டாம் : யாரும் எதற்கும் பயப்பட தேவையில்லை. தவறு செய்யாத எந்த விஷயத்திற்கும் பயம் தேவையில்லை. நீ செய்த காரியம் சரி எனில், உன் பக்கம் நியாயம், நேர்மை, உண்மை இருப்பின் பயம் அவசியமில்லை என்பதை கற்றுக்கொடுங்கள். அதேபோல் தனிமை பயம், மற்றவர்களை பார்த்து பயம், ஒரு செயலை செய்ய பயம் என இருப்பதும் குழந்தைக்கு மனதளவில் பாதிக்கும். எனவே அதை எப்படி கையாள வேண்டும் என்பதை கற்றுக்கொடுங்கள்.

சுறுசுறுப்பாக இருக்க வேண்டும் : எப்போதும் சோர்ந்து இல்லாமல் ஆக்டிவாக இருக்க கற்றுக்கொடுங்கள். எந்த வேலை செய்தாலும் அதை ஆர்வத்துடனும், உற்சாகத்துடனும் செய்ய வேண்டும் என்று கற்றுக்கொடுங்கள். சோம்பல் ஒருவனை நிமிர்த்த விடாது என்பதை வாழ்க்கைப் பாடமாக கற்றுக்கொடுங்கள்.

நன்றி செய்தல் : இது வாழ்க்கைக்கு அவசியமான ஒன்று, ஒருவர் செய்த உதவிக்கு நன்றி கூறுவதும், அந்நன்றியை மறவாமல் இருப்பதும் எவ்வளவு முக்கியம் என்பதை கற்றுக்கொடுங்கள். இந்த நன்றி உணர்வு சமூகத்தில் நல்ல பண்பானவராக உயர்த்தும்.

பொறாமை தவிர் : வாழ்க்கையில் முன்னேறி செல்ல ஆரோக்கியமான போட்டி அவசியம். ஆனால் பொறாமை குணம், தேவையற்ற போட்டி ஆகியவை தவறு. எனவே இதுபோன்ற மனப்பான்மைகள் இருந்தால் முளையிலேயே கிள்ளி எறியுங்கள்.

உண்மை : பொய் நிறைந்த உலகம் என்பார்கள். எனவே பொய் எத்தனை உயர்ந்த இடத்தில் இருந்தாலும் கீழே தள்ளிவிடும். எனவே பொய் கூறுதல் தவறு என்பதை புரிய வையுங்கள். நேர்மையாக நடந்துகொள்ள வேண்டும். தவறு செய்தாலும் அப்பா அம்மாவிடம் தைரியமாக உண்மையை ஒப்புக்கொள்ள வேண்டும் என்பதை வீட்டிலிருந்து துவங்குங்கள். ஏனெனில் சில குழந்தைகள் அம்மா , அப்பா திட்டுவார்களோ என்ற பயத்திலேயே அது பொய் என தெரியாமலேயே பேசுவார்கள். எனவே அதற்கு நீங்கள் இடம் தராதீர்கள். உண்மை வழியைக் கற்றுக்கொடுங்கள்.

நேர்மை : போட்டி நிறைந்த உலகில் குறுக்கு வழிகளுக்கும் பஞ்சமிருக்காது. ஆனால் அவ்வாறு செல்வது என்றைக்காவது உன்னை கீழே இறக்கிவிடும். அது உனக்கு மன திருப்தியை அளிக்காது. எனவே நேர்மை குணமே நல்ல மனிதனுக்கு அழகு என கற்றுக்கொடுங்கள். எந்த காரியத்தையும் நேர்மையான வழியிலேயே அணுக வேண்டும் என்று கற்றுக்கொடுங்கள்.

வீட்டு ஒழுக்கம் : வீட்டில் சில வேலைகளை செய்வது, தன் வேலையை தானே சீராக செய்து கொள்வது போன்ற ஒழுக்க நெறிமுறைகளைக் கற்றுக்கொடுங்கள். உதாரணத்திற்கு ஒரு பொருளை எடுத்தால் எடுத்த இடத்தில் வைக்க வேண்டும். வீட்டை சுத்தமாக வைத்துக்கொள்ள வேண்டும் என்பன போன்ற விஷயங்களை கற்றுக்கொடுங்கள்.

சுகாதாரம் : சுகாதாரத்தின் அவசியத்தை கற்றுக்கொடுங்கள். குளித்தல், எழுந்ததும் பல் துலக்குதல், சீக்கிரம் தூங்குதல், உணவை சீராக சாப்பிடுதல், கை கழுவிய பின்னரே எந்த உணவையும் சாப்பிட வேண்டும் என கற்றுக்கொடுத்தல். தூய உடைகளையே அணிதல் என்பன போன்ற சுகாதார ஒழுக்கங்களையும் கற்றுக்கொடுங்கள்.  இவையே சமூகத்தில் சிறந்த மனிதனாக உயர்த்தும்.