குழந்தைகள் வளர்ப்பில் இதெல்லாம் முக்கியம்... பெற்றோர்கள் தவிர்க்க வேண்டிய சில விஷயங்கள்!

தங்கள் பிள்ளைகளிடம் அன்பு காட்டி வளர்க்கவும், தேவையான சமயங்களில் கண்டிப்பு காட்டவும் பெற்றோர்கள் தயங்குவதில்லை. குழந்தைகளை சரியான முறையில் வளர்க்க வேண்டும் என்பதற்காகவோ அல்லது வேடிக்கையாகவோ சில சமயம் பெற்றோர் செய்கின்ற வேலைகள் அவர்களுடைய மன நலனை பாதிப்பதாக அமைகிறது. நல்ல பண்பும், குணமும் நிறைந்த குழந்தைகளை வளர்த்தெடுப்பது பெற்றோரின் கடமை தான் என்றாலும் கூட, சில நடவடிக்கைகளை அவர்கள் கைவிட்டாக வேண்டும். அதுகுறித்து இந்த செய்தியில் பார்க்கலாம்.

பட்டப்பெயர் சொல்லி அழைக்கக் கூடாது : தங்கள் குழந்தைகளை செல்லமாக அழைக்கிறேன் என்ற பெயரில் ஏதேனும் பட்டப்பெயர் வைத்து அழைப்பது பல பெற்றோரின் வாடிக்கையாக இருக்கிறது. சில சமயம் குழந்தைகளின் தாத்தா, பாட்டி இந்த நடவடிக்கையை மேற்கொள்கின்றனர். இதுபோன்ற பழக்கத்தை தொடர்ந்தால் ஒரு கட்டத்தில் பிள்ளைகளின் உண்மையான பெயர் மறைந்து, இந்த பட்டப் பெயரை நிலைத்து நிற்கும்.

அதிக கட்டுப்பாடு கூடாது : குழந்தைகளிடம் பெற்றோர் கண்டிப்புடன் நடந்து கொள்வது அவசியம் தான். ஆனால் அதற்காக அனைத்து சமயத்திலும் அலுவலக மேனேஜர் போல் குழந்தைகளிடம் நடந்து கொள்ளக் கூடாது. சில கண்டிப்புகள் பிள்ளைகளின் மனதை பாதிக்கக்கூடும். ஆகவே நட்புடன் நடந்து கொள்ள வேண்டும்.

அதீத அக்கறை கூடாது : குழந்தையை பாதுகாப்பாகவும், பத்திரமாகவும் வளர்க்க வேண்டும் என்பது பெற்றோரின் விருப்பமாக இருக்கும். அதற்காக எப்போதும் அவர்களை தங்கள் கண்காணிப்பிலேயே வைத்துக் கொண்டிருக்கக் கூடாது. சுதந்திரமாக உலா வருவதற்கு குழந்தைகளுக்கு கொஞ்சம் இடம் கொடுக்க வேண்டும்.

தவறான பழக்கவழக்கங்கள் : நகம் கடிக்கக் கூடாது, பொருட்களை வீசி எறிய கூடாது என்று பிள்ளைகளுக்கு பாடம் எடுக்கும் பெற்றோரே சில சமயம் அதை மீறுவது தவறான முன்னுதாரணமாக அமைந்து விடும். ஆகவே சொல்கின்ற அறிவுரைக்கு தகுந்தார் போல முதலில் பெற்றோர் நடந்து கொள்ள வேண்டும்.

குழந்தைகளை புறக்கணிக்கக் கூடாது : சும்மா தொன தொனன்னு பேசாதே என்று பிள்ளைகளிடம் பெற்றோர் சிலர் எரிந்து விழுவதை நாம் பார்த்திருக்கிறோம். குழந்தைகள் ஏதேனும் ஆர்வமாக பேச வரும்போது அதை காது கொடுத்து கேட்க வேண்டும். அவர்களுக்கு தெரியாத விஷயங்களை அன்பாகவும் அக்கறையாகவும் சொல்லிக் கொடுக்க வேண்டும்.

பாராட்ட தவறக் கூடாது : ஒவ்வொரு குழந்தைக்கும் ஒவ்வொரு தனித்திறமை இருக்கும். அடுத்த வீட்டு குழந்தைகளை போல நம் குழந்தைகள் இல்லையே என்ற காரணத்திற்காக அவர்களது தனித்திறமையை நாம் பாராட்டாமல் இருக்க கூடாது. பெற்றோரின் பாராட்டு தான் குழந்தைகளுக்கு ஊக்கமாக அமையும்.

அடுத்தவர்களை புறம் பேசுவது : பிறரைப் பற்றி குறை கூறக்கூடாது என்று குழந்தைகளிடம் நாம் சொல்லி வளர்த்திருப்போம். ஆனால் நமக்கு இருக்கும் உறவுகள் மற்றும் நண்பர்கள் குறித்த குறைகளை வீட்டில் பேசாமல் இருக்க மாட்டோம். இருப்பினும் குழந்தைகள் உடன் இருக்கும்போது அதை செய்யக்கூடாது.

தடித்த வார்த்தைகளை பேசக்கூடாது : வீட்டில் பெரியவர்களுக்குள் சண்டை வருகின்ற போது தடித்த வார்த்தையால் திட்டிக் கொள்வது வாடிக்கையாக இருக்கிறது. ஆனால் குழந்தைகளுக்கு இது தவறான முன்னுதாரணமாக அமையும். அவர்களும் அதே வார்த்தைகளை பேச தொடங்கி விடுவார்கள்.

ஆசிரியர்களை திட்டக்கூடாது : குழந்தைகள் எப்போதும் ஆசிரியர்கள் மீது மரியாதை கொண்டவர்களாக இருக்க வேண்டும். ஆனால், அதே குழந்தைகள் படிக்கவில்லை என்பதற்காக வீட்டில் ஆசிரியர்களை திட்டும் பழக்கம் பலரிடமும் இருக்கிறது. அதை பார்த்து கற்றுக் கொள்ளும் குழந்தைகள் மறுநாள் ஆசிரியர்களை அவமதிக்க வாய்ப்பு உண்டு. ஆகவே இதை தவிர்க்க வேண்டும்.

அவமரியாதை செய்வது : வீட்டில் உள்ளவர்களை கிண்டல் செய்கிறோம் என்ற பெயரிலோ அல்லது சண்டை நடக்கும் சமயத்திலோ உடன் இருப்பவர்களை அவமரியாதை செய்யக்கூடாது. குழந்தைகளும் அதையே பின்பற்ற தொடங்கி விடுவார்கள். ஆகவே எந்த விஷயமானாலும் கனிவாக பேசி முடிக்க வேண்டும்.