உங்கள் செல்ல நாயுடன் படுக்கையை ஷேர் செய்வது நல்லதா... கெட்டதா..? இதை கட்டாயம் தெரிந்துகொள்ளுங்கள்..!

ஒரு சிலர் தங்கள் வீட்டில் வளர்க்கும் பூனை, நாய் உள்ளிட்ட செல்லப்பிராணிகள் மீது அளவு கடந்த பாசம் வைத்திருப்பார்கள். குடும்ப உறுப்பினர்களில் ஒருவராகவே பல வீடுகளில் செல்ல பிராணிகள் நடத்தப்படுகின்றன. ஒரு சிலர் தங்களது படுக்கையில் நாய்களுக்கும் இடம் கொடுத்து தூங்க வைப்பார்கள்.

வீட்டில் வளர்க்கும் நாய் பயந்திருந்தாலோ அல்லது உடல்நிலை சரியில்லாமல் இருந்தாலோ அதை அரவணைப்பது உரிமையாளரின் கடமை. இது போன்ற சம்யங்களில் அவற்றை தனியே தூங்க அனுமதிக்க முடியாது. எனினும் நாய்களுடன் உரிமையாளர்கள் படுக்கையைப் பகிர்ந்து கொள்வதில் நிறைய நன்மை & தீமைகள் உள்ளன.

ரிலாக்ஸ் செய்ய உதவும்: நாய்கள் எப்போதுமே நம்மை மகிழ்விக்கின்றன. தூங்குவதற்கு முன் நாய்களுடன் வேடிக்கையாக சிறிது நேரம் விளையாடுவது மகிழ்ச்சிக்கு காரணமான ஆக்ஸிடாஸின் ஹார்மோன் வெளிப்பட உதவுகிறது. தூக்கத்தில் பிரச்சனை இருந்தால் உங்கள் நாயுடன் படுக்கையை பகிர்ந்து கொள்வது அதனை எளிதாக சரி செய்ய உதவும்.

பாதுகாப்பு உணர்வு: குறிப்பாக வீட்டில் தனியாக வாழும் நபர்களுக்கு நாயுடன் ஒரே படுக்கையில் தூங்கும் பழக்கம் மிகவும் நல்லது. அவை எப்போதும் உஷாராக இருக்கும் ஜீவன் என்பதால் விசித்திரமான சத்தம் லேசாக கேட்டால் கூட உங்களை எழுப்பும்.

நாயுடனான உறவை மேம்படுத்தும்: உங்கள் நாயுடன் நீங்கள் ஒன்றாக உறங்குவது அதற்கு பெரும் பாசத்தை உங்கள் மீது ஏற்படுத்தும். உங்களுக்கான விசுவாசம் நாயிடம் மேலும் அதிகரிக்கும். இதன் மூலம் உங்களுக்கும் , நாய்க்கும் இடையிலான பிணைப்பு அதிகரிக்கும்.

குளிரில் அரவணைப்பு: குளிர்காலத்தில் நமக்கும் சரி, நாய்க்கும் சரி நிச்சயம் ஒரு நல்ல அரவணைப்பு தேவைப்படும். அதே நேரம் பொதுவாகவே நாயின் உடல் வெப்பநிலை மனித வெப்பநிலையை விட அதிகமாக உள்ளது. உங்கள் பெட்டில் படுத்திருக்கும் நாய், உங்களை அரவணைக்கும் போது நிம்மதியான தூக்கத்திற்கு தேவையான கதகதப்பை உணர்வீர்கள்.

மனச்சோர்விலிருந்து விடுதலை: உங்கள் பாசமிகு நாயுடன் ஒன்றாக தூங்குவது ரத்த அழுத்தம் மற்றும் கார்டிசோலின் அளவை குறைக்க உதவும். அதாவது உங்கள் மன அழுத்தம் மிக விரைவில் சரியாகி விடும். உங்கள் நாயின் மகிழ்ச்சியான குரல், அதன் விளையாட்டு, அது வாலை ஆட்டும் விதம் கூட உங்களை நேர்மறையான மனநிலைக்கு இட்டு செல்லும்.

அலர்ஜி அல்லது ஆஸ்துமா: உங்களுக்கு அலர்ஜி அல்லது ஆஸ்துமா இருக்கும் பட்சத்தில் நாயுடன் ஒரே படுக்கையில் தூங்குவது விஷயங்களை மோசமாக்கி விடும். என்னதான் நீங்கள் தூய்மையாக அவற்றை வைத்திருந்தாலும் அதன் ரோமங்கள் அலல்து அதன் உடலில் இருக்கும் அழுக்குகள் உள்ளிட்டவை உங்களுக்கு இருக்கும் சிறிய அலர்ஜிகளை கடுமையானதாக மாறலாம். இது தீவிர உடல்நல பிரச்சினைகளுக்கு வழிவகுக்கும்.

நாயின் நடத்தை மோசமாகலாம்: உங்கள் நாய் முரட்டுத்தனம் மிக்க அல்லது பிரிவு ஏக்கமிக்க நாயக் இருப்பின் ஒரே படுக்கையில் தூங்குவது நாயின் நடத்தையை மோசமாக்கலாம். மேலும் நாய் ஒரு மனிதனுடன் படுக்கையைப் பகிர்ந்து கொண்டால், அவரும் நமக்கு சமம் என நினைத்து ஓவராக அட்வான்டேஜ் எடுத்து கொள்ளும்.

அழுக்காகும் படுக்கை: நாய்களை எவ்வளவு சுத்தமாக வைத்திருந்தாலும் அவற்றின் சருமம் மற்றும் ரோமத்தில் எளிதாக ஒட்டுண்ணிகள் வந்து விடும். உங்களுடன் அவற்றை படுக்க வைத்து கொள்வதால் எளிதாக உங்களுக்கும் அவை பரவலாம். எனவே ஒவ்வொரு நாளும் நாயும், நீங்களும் எழுந்த பிறகு படுக்கையை சுத்தப்படுத்துவதை வழக்கமாக்கி கொள்ளுங்கள்.

தூக்கத்தின் தரம்: ஒரு சிலருக்கு நாய் அருகில் படுத்திருப்பதால் சரியாக தூக்கம் வராது. நாய்களின் வாழ்க்கையில் தோராயமாக 3 தூக்க சுழற்சிகள் இருப்பதால் அவை விழித்திருக்கும் நேரங்களில் உஷாராக இருக்கின்றன. இரவு நேரங்களில் 2 - 3 முறை விழுகின்றன. ஆனால் நமக்கு இரவு நீண்ட தூக்கம் மிகவும் முக்கியம் என்பதால் அவற்றை படுக்க வைக்கும் போது, அவை விழித்தால் நமது தூக்கமும் கெடும்.

உங்கள் ஆரோக்கியத்தின் அனைத்து அம்சங்களையும் கணக்கில் எடுத்து கொள்வதோடு, உங்கள் நாயின் நடத்தை பற்றி நீங்கள் அனைத்தையும் அறிந்திருப்பதை உறுதிப்படுத்தி கொண்டு உங்கள் நாயுடன் படுக்கையைப் பகிர்ந்து கொள்வதா, வேண்டாமா என்பதை முடிவு செய்யுங்கள்.