உங்கள் குழந்தைகளுக்கு கட்டாயம் கற்பிக்க வேண்டிய சமூக பழக்கங்கள் குறித்து தெரிந்து கொள்ளுங்கள்

இன்றைய உலகில் வளரக் கூடிய குழந்தைகள் பெரும்பாலும் ஆண்டிராய்ட் ஃபோன்களில் மூழ்கிக் கிடக்கின்றனர். சமூக வலைதளங்கள் மற்றும் ஆன்லைன் கேம் போன்றவையே அவர்களது உலகமாக மாறி போயுள்ளது. பெரியவர்களை எப்படி மதிக்க வேண்டும், ஆசிரியர்களை எப்படி அணுக வேண்டும் என்பது போன்ற பல்வேறு பழக்க வழக்கங்களை இன்றைய குழந்தைகள் அவ்வளவாக தெரிந்து வைத்திருப்பதில்லை. இதனால், ஒரு கட்டத்திற்குப் பிறகு பொது சமூகத்தில் அடியெடுத்து வைக்கும்போது கடுமையான சிரமங்களை எதிர்கொள்கின்றனர்.

உங்கள் குழந்தைகள் எந்த சிக்கலையும் எதிர்கொள்ளாமல் எப்போதும் வெற்றியாளராக இருக்க வேண்டும் என்றால், சின்ன வயதில் இருந்து உங்கள் குழந்தைகளுக்கு சமூக பழக்க, வழக்கங்கள் குறித்து நீங்கள் கற்பிக்க வேண்டும். அதில் சிலவற்றை இந்த செய்தி மூலமாக தெரிந்து கொள்ளுங்கள்.

பெரியவர்களுக்கு மதிப்பு அளிப்பது: பெரியவர்களுக்கு மதிப்பு அளிப்பதுதான் மிக முக்கியமான சமூக பழக்க வழக்கம் ஆகும். அது வீடு என்றாலும் சரி அல்லது பள்ளி என்றாலும் சரி, பெரியவர்களை அன்போடும், பணிவோடும் வரவேற்பது குறித்து உங்கள் குழந்தைகளுக்கு கற்பிக்க வேண்டும். உங்கள் குழந்தை மீதான மதிப்பை இது உயர்த்தும்.

பகிர்ந்து கொள்ள வேண்டும்: எல்லாம் எனக்கு மட்டுமே சொந்தம் என்ற சிந்தனையை குழந்தைகளிடம் வளர விடக் கூடாது. சாப்பிடும் ஸ்நாக்ஸ் அல்லது விளையாட்டுப் பொருட்கள் எதுவானாலும் பிறருடன் பகிர்ந்து கொள்ளும் பழக்கத்தை உருவாக்க வேண்டும். இதனால், உங்கள் குழந்தைகளுக்கு புதிய நண்பர்கள் கிடைப்பார்கள்.

கவனம் செலுத்த கற்பிக்க வேண்டும்: உரையாடல் என்பது இருவழிப் பாதை போன்றது. ஆனால், ஆசிரியர்களோ, பெரியவர்களோ எதையாவது உங்கள் குழந்தைகளிடம் விவாதிக்கும்போது, அவர்கள் அதுகுறித்து கண்டுகொள்ளாமல் விளையாட்டுத் தனமாக இருப்பார்கள். ஆகவே, பிறர் பேசுவதை கவனமுடன் கேட்டறிந்து, அதற்கு பதில் சொல்ல கற்றுக் கொடுங்கள்.

திறன்சார்ந்த விளையாட்டுகளை கற்றுக் கொடுங்கள்: குழந்தைகள் தற்போது பெரும்பாலும் ஆன்லைன் கேம்ஸ்களில் மூழ்கியிருக்கின்றனர். இதனால், கண் பார்வை பாதிக்கப்படும். இதர உடல் நல பிரச்சினைகள் ஏற்படும். ஆகவே, வெளியே சென்று விளையாட ஊக்குவியுங்கள். இதுமட்டுமல்லாமல் உங்கள் குழந்தையின் அறிவுத் திறனை வளர்த்தெடுக்கும் வகையில், அறிவுசார்ந்த விளையாட்டுகளை கற்றுக் கொடுங்கள். வாசிப்பது, ஓவியம் வரைவது போன்ற கலைகளை கற்க ஊக்குவியுங்கள்.

அமைதியை கடைப்பிடிக்க பழக்கவும்: பெரும்பாலும் குழந்தைகள் அதிகம் அடம் பிடிப்பார்கள் அல்லது சட்டென்று கோபம் அடையும் பழக்கம் இருக்கும். அது தவறானது என்பதை புரிய வைத்து, எப்போதும் அமைதியாக இருக்க கற்றுக் கொடுங்கள்.

ஒத்துழைப்பு அவசியம்: கூடி வாழ்ந்தால் கோடி நன்மை என்பதற்கு ஏற்ப, குழுவாக இணைந்து செயல்படுவது குறித்தும், குழுவில் உங்கள் குழந்தை ஒத்துழைப்பு அளிப்பது குறித்தும் அவர்களுக்கு கற்றுக் கொடுங்கள்.