கர்ப்பகாலத்தின் முதல் மூன்று மாதங்களில் இந்த விஷயங்களை செய்யவே செய்யாதீங்க..!

திருமணம் ஆன பெண்களின் வாழ்க்கையில் கர்ப்பம் என்பது ஒரு பெரிய வரப்பிரசாதமாகும். அத்தகைய சிறப்பு மிக்க கர்ப்ப காலத்தில் பெண் மனதளவிலும் உடல் அளவிலும் பல்வேறு மாற்றங்களைப் பெறுகின்றனர். விரைவில் வீட்டிற்கு ஒரு புதிய வருகை வரும் என்ற ஆவலுடன் காத்திருக்கும் போது, ஏதேனும் தவறு நடந்து விடுமோ என்ற பயமும் அவ்வாறு நேர்ந்தால் என்ன செய்வது என்று தெரியாமலும் நீங்கள் கவலைப்படலாம். அப்படியானால் கர்ப்பகாலத்தின் முதல் மூன்று மாதங்களில் பெண்கள் மிகவும் கவனமாக இருக்க வேண்டும்.

ஏனெனில் கருவுற்ற நாள் முதல் பெண்கள் ஒவ்வாமையை எதிர்கொள்வதால் பெரும்பாலும் உணவை தவிர்த்து விடுவார்கள். பலவீனமாக இருக்கும் பெண்களுக்கு கருச்சிதைவு உண்டாக வாய்ப்புண்டு. இதற்கு பல்வேறு காரணங்கள் இருந்தாலும் உணவு முறையும் அதில் ஒன்றாக கூறலாம். அதனால்தான் மருத்துவர்கள் ஆரோக்கியமான உணவை எடுத்துக்கொள்ள வேண்டும் என்று வலியுறுத்துவார்கள்.

வயிற்றில் வளரும் குழந்தையின் ஆரோக்கியமும் மூளை வளர்ச்சியும் சிறப்பாக இருக்க சத்துக்கள் மிக்க உணவுகள் தான் உதவி புரிகிறது. முதல் மூன்று மாத காலங்களில் சிசுவின் வளர்ச்சி அதிகரிக்கும் என்பதால் அதை மேம்படுத்த உதவி புரியும் கால்சியம் மற்றும் புரத சத்துக்கள் நிறைந்த உணவை சேர்த்து கொள்வது அவசியம். அதே சமயம், நமது சில தகாத பழக்கங்களும் குழந்தைக்கு நேரடி பாதிப்பை ஏற்படுத்தும். ஆரோக்கியமான கர்ப்பத்தைத் தவிர்ப்பதற்கு ஏழு பொதுவான தவறுகள் உள்ளன. அவற்றை பெண்கள் தவிர்ப்பது மிகவும் முக்கியம்.

கடுமையான உடற்பயிற்சி செய்யக்கூடாது: கர்ப்பகாலத்தில் சில கடுமையான உடற்பயிற்சிகளை செய்யக்கூடாது. ஏனெனில் அவை கருச்சிதைவுக்கு வழிவகுக்கும். கர்ப்பத்தின் ஆரம்ப மாதங்களில் மருத்துவர்களின் ஆலோசனையுடன் மிகவும் லேசான பயிற்சிகளை மட்டும் செய்வது நல்லது.

புகைபிடிப்பதை தவிர்க்கவும்: புகைபிடிக்கும் பழக்கம் வைத்திருப்பவர்கள் கர்ப்பகாலத்தில் கருச்சிதைவு, பிறப்பு குறைபாடுகள், முன்கூட்டிய பிறப்பு (premature birth), குறைந்த எடையுடன் பிறப்பு மற்றும் குழந்தை இறப்பு கூட ஏற்படலாம். எனவே நீங்கள் புகைப்பழக்கத்தை விடுவது மிகவும் நல்லது.

மது குடிப்பதை தவிர்க்கவும்: முதல் மூன்று மாதங்களில் ஆல்கஹால் அருந்துவதால் அது அனைத்து நிலைகளிலும் குழந்தையின் வளர்ச்சி பிரச்சினைகளுக்கு வழிவகுக்கும்.

பச்சை இறைச்சி சாப்பிடுவதைத் தவிர்க்கவும்: பச்சை கறி அல்லது அரைவேக்காட்டில் சமைத்த அசைவ உணவு, பச்சை முட்டைகளை சாப்பிடுவது கருச்சிதைவு மற்றும் பிறப்பு குறைபாடுகளுக்கு வழிவகுக்கும்.

ஸ்டீம் பாத் எடுப்பதைத் தவிர்க்கவும்: கர்ப்பகாலத்தில் ஸ்டீம் பாத் எடுப்பது உடல் வெப்பநிலையை அதிகரிக்க வழிவகுக்கும். இதனால் நீரிழப்பு, அதிக வெப்பம் மற்றும் மயக்கம் கூட ஏற்படலாம்.

காபி குடிப்பதை தவிர்க்க வேண்டும் : உங்கள் வளர்ந்து வரும் குழந்தைக்கு அதிக காபி நல்லதல்ல, குறிப்பாக ஆரம்ப கட்டத்தில். ஏனெனில் அதில் கஃபின் அதிகம் இருப்பதால் குழந்தைகளுக்கு கேடு விளைவிக்கும்.

சுயமாக மருந்து எடுத்துக்கொள்ள வேண்டாம்: தாய் மற்றும் குழந்தை இருவருக்கும் ஆபத்து விளைவிக்கும் என்பதால் சுயமாக மருந்துகளை எடுத்துக்கொள்ளக்கூடாது. மருத்துவரின் ஆலோசனைப்படியே மருந்துகளை எடுத்துக்கொள்ள வேண்டும்.