முதல்முறை டேம்பான்ஸ் பயன்படுத்துகிறீர்களா? - எப்படிப் பயன்படுத்துவது எனத் தெரிந்து கொள்ளுங்கள்!

டேம்பான்ஸ் என்பது மாதவிடாய் காலத்தில் பெண்கள் பயன்படுத்தும் நேப்கின், மென்ஸ்சுரல் கப் போன்ற ஒரு பொருள் தான். பெண்ணுறுப்பின் உள்ளே இதைப் பொருத்துவதன் மூலமாக உதிரப்போக்கை அது உறிஞ்சிக் கொள்கிறது.

மாதவிடாய் காலத்தில் பயன்படுத்தக் கூடிய மற்ற பொருட்களைக் காட்டிலும் கொஞ்சம் கூடுதலான பலன்கள் இந்த டேம்பான்ஸ் பயன்பாட்டில் உண்டு. அதாவது, இதைப் பொருத்திக் கொண்டு நீங்கள் இயல்பாக நீச்சல் குளத்தில் கூட நீந்திச் செல்லலாம்.

ஏனென்றால் நமது உடலில் கூடுதலாக ஒரு பொருளைப் பொருத்தியிருக்கிறோம் என்ற உணர்வை இது ஏற்படுத்தாது. மிகச் சரியாகப் பொருத்தும் பட்சத்தில் இலகுவான உணர்வைத் தரும். அரிப்பு போன்ற தொந்தரவுகள் எதுவும் ஏற்படாது. இது அளவில் மிகச் சிறியது என்பதால் எந்த நேரத்திலும், மிக இலகுவாக உடன் எடுத்துச் செல்ல வசதியாக இருக்கும்.

இதற்கு முன்னர் நீங்கள் டேம்பான்ஸ் பயன்படுத்தியதில்லை என்றால், அதைப் பயன்படுத்தும் முன்பாக லேபிளில் உள்ள வழிகாட்டு விதிகளைச் சரியாகப் படிக்கவும். இதை எப்படிப் பயன்படுத்துவது என்பது குறித்து, மருத்துவர் தனாயா, இன்ஸ்டாகிராமில் விழிப்புணர்வு வீடியோ வெளியிட்டுள்ளார்.

நீங்கள் சூப்பர் அப்சார்பண்ட் டேம்பான்ஸ் வகைகளைத் தேர்வு செய்யக் கூடாது. அதில், நச்சுப் பொருட்கள் அடங்கியுள்ளன. அது உடலுக்குள் பாக்டீரியாவை கொண்டு வந்து சேர்க்கும்.

நோய்த் தொற்றுகளிலிருந்து நம்மைத் தற்காத்துக் கொள்வதற்கு 6 முதல் 8 மணி நேர இடைவெளியில் டேம்பான்களை மாற்றிவிடவும். டேம்பான்ஸ் ஒன்றை 8 மணி நேரத்திற்குக் கூடுதலாகப் பயன்படுத்த வேண்டாம்.

டேம்பான்ஸ்களை பெண்ணுறுப்பில் பொருத்துவதற்கு முன்பாகவும், பொருத்திய பிறகும் கைகளை சுத்தமாக கழுவவும். இது கிருமித் தொற்றுகளில் இருந்து பாதுகாப்பு தரும்.

டேம்பான்ஸ்களை மாதவிடாய் காலத்தில் மட்டும் பயன்படுத்துங்கள். வேறு காலங்களில் அல்லது வேறு பயன்பாடுகளுக்காக இதைப் பயன்படுத்த வேண்டாம்.

உங்கள் பெண்ணுறுப்பு வறட்சியாக இருக்கும்பட்சத்தில் டேம்பான்ஸ் பொருத்துவதற்குச் சிரமமாக இருக்கும். அத்தகைய சமயங்களில் லூப்ரிகண்ட் பயன்படுத்தி இதனைப் பொருத்தலாம். ஆனால் எந்த காரணத்தைக் கொண்டு பெட்ரோலியம் ஜெல்லி போன்ற பொருட்களைப் பெண்ணுறுப்புக்கான லூப்ரிகண்ட்டாக பயன்படுத்த வேண்டாம். அது பெண்ணுறுப்பில் கிருமித் தொற்றுகளை ஏற்படுத்தும்.