ஊறுகாய் கெட்டுப்போகாம இருக்கனுமா..? மிக்ஸி ஜார் பிளேடை கூர்மையாக்கனுமா..? டாப் கிட்சன் டிப்ஸ்..!

சமையலறையை நிர்வகிப்பது என்பது பெரிய சவால். அதை ஆளுவதற்கு சமையல் கலை மட்டும் பிரதானமில்லை. கிட்சன் மளிகை பொருட்களை சரி பார்ப்பதும், நிர்வகிப்பதும்தான் அந்த ஆளுமை பட்டியலில் சேரும். அந்த வகையில் உங்களுக்கு உதவக்கூடிய சில கிட்சன் டிப்ஸ் இதோ...

ஊறுகாய் கெட்டுப்போகாமல் இருக்க : மழைக்காலம், குளிர்காலங்களில் ஊறுகாய் சீக்கிரமே கெட்டுவிடும். இதை தவிர்க்க ஊறுகாயை கண்ணாடி ஜாரில் சேமித்து வைக்கவும். அதோடு அதன் மேல் அடுக்கில் எப்போதும் மிதக்கும் அளவுக்கு எண்ணெய் ஊற்றி வையுங்கள். இதுதான் அந்த ஊறுகாயை கெட்டுப்போகாமல் தடுக்க உதவும்.

எறும்புகளை சமாளிக்க : எப்போதும் இனிப்பு பண்டம் உள்ள பாத்திரம் அல்லது சர்க்கரை பாட்டிலை சுற்றி எறும்புகள் படை எடுக்கிறது எனில் அதற்குள் 2 -3 கிராம்புகளை போட்டு வையுங்கள். கிராம்பு வாசனையினால் எறும்பு நெருங்காது.

பனீர் கெட்டுப்போகாமல் இருக்க : பனீர் அடிக்கடி சமைப்பவர்கள் நிறைய ரெடிமேட் பனீர் வாங்கி ஸ்டோர் செய்வது வழக்கமாக இருக்கும் அல்லது வீட்டிலேயே செய்து வைக்கக் கூடும். எதுவாக இருந்தாலும் அது சீக்கிரமே கெட்டுப்போகிறது எனில் ஃபிரிட்ஜில் பாத்திரத்தில் தண்ணீர் நிரப்பி அதற்குள் போட்டு வையுங்கள். இதனால் அது கெட்டுப்போவதை தடுக்கும். அதன் சுவை மாறுவதையும் தடுக்கும்.

முட்டை கெட்டுவிட்டதை கண்டறிய : முட்டை வாங்கி வந்ததும் ஒரு அகலமான பாத்திரத்தில் தண்ணீர் பிடித்து அதற்குள் அந்த முட்டைகளை போடுங்கள். போட்டதும் அந்த முட்டைகள் கீழே தங்கினால் நல்ல முட்டை. நடுவில் நின்றால் 2-3 வாரங்களான பழைய முட்டை. மிதந்தால் கெட்டுப்போன முட்டை என்று அர்த்தம்.

எலுமிச்சையை சேமித்து வைக்க : நீங்கள் எப்போதும் ஃபிரிட்ஜில் எலுமிச்சையை சேமித்து வைக்கிறீர்கள் எனில் அது நீண்ட நாட்களுக்கு கெடாமல் இருக்க ஒரு பாட்டிலில் தண்ணீர் நிரப்பி அதற்குள் போட்டு வையுங்கள். நீண்ட நாட்களுக்கு அப்படியே ஃபிரெஷாக இருக்கும்.

மிக்ஸி ஜாரை கூர்மையாக்க : மிக்ஸி ஜார் பிளேடு கூர்மையாக இருந்தால்தான் நம் அவரசர வேலைகள் எளிதாகும். பின் சமையலுக்காக அரைத்தது ஒன்றும் பாதியுமாக இருந்தால் சமையல் சுவையே போய்விடும். எனவே ஜார் பிளேடை ஷார்பாக்க ஜாரில் தூள் உப்பு 1கப் சேர்த்து நன்கு அரைக்க பிளேட் நன்கு கூர்மையாகும்.

பாத்திரங்களின் அழுக்கை நீக்க : பாத்திரங்கள், கரண்டி, ஸ்பூன், கத்திகளை டீப் க்ளீன் செய்ய வேண்டுமெனில் பேக்கிங் சோடாவை சுடு தண்ணீரில் கலந்து அதற்குள் கரண்டி, கத்திகளை போட்டு 10 நிமிடங்கள் ஊற வைத்து கழுவுங்கள்.