ஃப்ரிட்ஜூக்குள் இந்த உணவுப்பொருட்களை வைக்கவே வைக்காதீங்க.!

தற்போதைய காலக்கட்டத்தில் ஃப்ரிட்ஜ் இல்லாத வீடுகளை பார்ப்பது மிகமிக அரிதான ஒன்றாகும். மேலும் ஃப்ரிட்ஜ் என்பது அத்தியாவசிய ஒன்றாக மாறிவிட்டது. அப்படி இருக்கையில் பல பேர் ஒரு வாரத்திற்கு தேவையான காய்கறிகள், பழங்கள் முதல் மீதமிருக்கும் உணவுகள் வரை அனைத்தையும் ஃப்ரிட்ஜில் வைக்கின்றனர். சில சமயங்களில் வாரக்கணக்கில் வைத்து பயன்படுத்துகின்றனர்.

ஃப்ரிட்ஜில் உள்ள குறைந்த வெப்பநிலை சில நேரங்களில் உணவுகளில் உள்ள நன்மை தரும் சத்துக்களை அழித்து, நச்சுத்தன்மை வாய்ந்ததாக மாற்றி விடுகின்றன. அதுமட்டுமின்றி ஃப்ரிட்ஜில் சேமித்து வைத்திருக்கும் உணவுகளை ஒரு குறிப்பிட்ட நாட்களுக்குள் பயன்படுத்திவிட வேண்டும், ஏனென்றால் நாட்கள் செல்லச்செல்ல விஷத்தன்மை நிறைந்ததாக மாறும் அபாயம் உள்ளது.

இதெல்லாம் ஒரு பக்கம் இருந்தாலும் ஃப்ரிட்ஜுக்குள் சில பொருட்களை வைக்கவே கூடாது என்று பலருக்கும் தெரிவதில்லை.  சில பொருட்களை ஃப்ரிட்ஜினுள் வைக்காமல் வெளியே வைத்து உபயோகிப்பதே நல்லது. அப்படி இல்லையெனில் அது உடலுக்கும் ஆரோக்கியத்திற்கும் கேடு விளைவிப்பதாக மாறக் கூடும். அது என்னென்ன பொருட்கள் என்பதை இப்பதிவில் காணலாம்.

தக்காளி : தக்காளியை ஃப்ரிட்ஜில் வைப்பதால் சில சமயங்களில் உடலுக்கு தீங்கு விளைவிக்கும் பூஞ்சைத் தொற்றுகள் ஏற்பட வாய்ப்புள்ளது. மேலும் தக்காளியை ஃப்ரிட்ஜினுள் வைக்கக் கூடாது எனக் கூறுவதற்கு முக்கிய காரணம் அதனுடைய சுவை மற்றும் ஜூஸினஸ் குறைவதற்கு வாய்ப்பு அதிகம்.

வெங்காயம் : வேங்காயத்தை ஃப்ரிட்ஜினுள் வைப்பதை அரவே தவிர்க்க வேண்டும். ஏனென்றால் ஈரப்பதம் வெங்காயத்தில் பூஞ்சைத் தொற்றை ஏற்படுத்தும். வெங்காயத்தை வெளியில் தான் வைக்கவேண்டும். ஆனால் உருளைக்கிழங்குக்கு அருகில் வைக்கக் கூடாது. நறுக்கிய வெங்காயத்தை ஃப்ரிட்ஜினுள் வைக்கலாம் ஆனால் ஓரிரு நாட்களில் பயன்படுத்தி விடுவது நல்லது.

தேன் : தேனின் மென்மையான மற்றும் திரவ அமைப்பு மாறாமல் இருக்கவும், கெட்டியாகாமல் தடுக்கவும் அதனை அறை வெப்பநிலையில் வைப்பதே சிறந்தது.

பிரெட் : ஃப்ரிட்ஜ் உள்ளே பிரெட்டை வைப்பதால் அவை காய்ந்தும், கடினமாக மாறியும் பயன்படுத்த முடியாத நிலையை அடையும்.

உருளைக்கிழங்கு : ஃப்ரிட்ஜில் வைக்கும் போது உருளைக்கிழங்கில் உள்ள ஸ்டார்ச் சத்து தனியே பிரிவதுடன், அது கெட்டியாகவும், இனிப்பு சுவை உடையதாகவும் மாறுகிறது. இதனை தடுக்க அறை வெப்பநிலையெலேயே பேப்பர் பேக்கில் சுற்றி வைக்கலாம்.

பூண்டு : பூண்டை ஃப்ரிட்ஜினுள் வைப்பதால் ரப்பர் போன்ற தன்மையை பெறுகிறது. மேலும் அதனை அறை வெப்பநிலையில் வைக்கும் பொழுது பூண்டு பற்களை தனித்தனியே உதிர்த்து வைக்காமல் முழுதாக வைப்பதன் மூலம் நீண்ட நாட்கள் கெடாமல் ஃப்ரெஷாக இருக்கும்.

வாழைப்பழம் : வாழைப்பழம் பழுப்பதற்கு அறை வெப்பநிலை தேவை. அதனால் அதனை ஃப்ரிட்ஜினுள் வைப்பதன் மூலம் வாழைப்பழத் தோல் கருப்பது மட்டுமல்லாது பழுப்பதற்கு அதிக நாட்கள் எடுக்கும். அதனால்தான் வாழைக்காய் பழுக்காமல் தடுப்பதற்கு ஃப்ரிட்ஜினுள் வைக்கப் படுகிறது.

வெள்ளரிக்காய் : பெரும்பாலானோர் ஃப்ரெஷாக இருக்க வேண்டுமென்று வெள்ளரிகாயை ஃப்ரிட்ஜில் வைத்து பயன்படுத்துகின்றனர். குறிப்பாக நறுக்கிய வெள்ளரிக்காயை வைப்பதனால் வெள்ளரிக்காயில் உள்ள நீரினால் மொறுமொறுப்பு தன்மை நீங்கி தொய்வாகிவிடும். மேலும் வெள்ளரியில் உள்ள விதைகள் விழுந்து ஓட்டைகள் விழ ஆரம்பிக்கும். இவ்வாறு இருக்கையில் சாப்பிடுவதற்கு அவ்வளவு நன்றாக இருக்காது. இருந்தும் ஃப்ரிட்ஜினுள் வைக்க விரும்பினால், ஈரம் புகாத பிளாஸ்டிக் கவரில் சுற்றி வைக்கலாம்.

ஆப்பிள் : ஃப்ரெஷாக வாங்கிய ஆப்பிளை வெளியில் வைத்தாலே குறைந்தது இரண்டு வாரங்களுக்கு கெடாமல் இருக்கும் தன்மையுடையது. அப்படி இருக்கையில் அதை ஃப்ரிட்ஜினுள் வைக்கவேண்டும் என்ற அவசியமே கிடையாது.

காபித் தூள் : ஃப்ரிட்ஜிலிருந்து வரும் மணத்தைப்போக்க ஒன்றிரண்டு காபிக் கொட்டைகளை உபயோகிக்கலாம். ஆனால் நாம் அருந்துவதற்காக பயன்படுத்தப் படும் காபித் தூளை வைக்கக்கூடாது. ஏனெனில் இதன் உண்மையான சுவை மற்றும் மணம் நீங்கிவிடும். மேலும் காபிக்கு அருகில் இருக்கும் பொருட்களின் மணத்தை எடுத்துக்கக்கூடிய பண்பு இருப்பதனால் காபியின் உண்மையான மணம் மாறும் வாய்ப்பு அதிகம். எனவே, அவற்றை அறை வெப்பநிலையில் ஒரு ஏர் டைட் கண்ணாடி பாட்டிலில் வைத்து பயன்படுத்துவதே சிறந்த முறையாகும்.