கணவன் மனைவி சேர்ந்து திட்டமிட வேண்டிய வரவு செலவுகள் மற்றும் சேமிப்பிற்கான ஆலோசனைகள்..!

”வரவு எட்டணா, செலவு பத்து அணா, அதிகம் ரெண்டணா, கடைசியில் துண்டனா, துண்டனா’’ என்பது தமிழ் சினிமாவின் பழங்கால பாடல் என்றாலும், எந்தக் காலத்திற்கும் பொருந்துகின்ற பாடலாகும். அன்றைய தலைமுறையினர் மட்டுமல்லாமல், இன்றைய தலைமுறையினர் வரையிலும் வரவுக்கும், செலவுக்கும் இடையே ஏற்படும் இடைவெளியை சரி செய்ய முடியாமல் தவித்து வருகிறோம்.

முன்பெல்லாம் வீடு, ஆடை, உணவும், மருத்துவம் என அத்தியாவசிய செலவுகளை மட்டுமே மக்கள் செய்து வந்தனர். இப்போது, நம் சௌகரியகங்களுக்காக ஆடம்பரமான செலவுகள் பலவற்றை நாம் தொடங்கி விட்டோம். உதாரணத்திற்கு டாக்ஸி சேவை, வாரத்தில் ஒன்று அல்லது அதற்கு மேற்பட்ட முறை ரெஸ்டாரண்ட் உணவு, குடும்பத்துடன் தியேட்டர்களுக்கு படையெடுப்பது என அத்தியாவசியத்தை தாண்டிய செலவுகள் அதிகம்.

இது மட்டுமல்லாமல் வீட்டு வாடகை, பிள்ளைகளின் கல்வி கட்டணம், அத்தியாவசியப் பொருட்களின் விலை உயர்வு போன்ற சிரமங்களை சந்திக்கும் போது நாம் செய்வதறியாது திகைத்து நிற்கிறோம். நம் சிரமங்களுக்கு கிரெடிட் கார்டு கை கொடுக்கும் என்றாலும், அதுவும் எல்லை மீறிச் செல்லும்போது நாம் தவிப்புக்கு உள்ளாகிறோம். ஆகவே, பணத்தை சேமித்து முறையாக செலவிடுவது அவசியமானது. அதற்கு ஆகச் சிறந்த வழிகள் சிலவற்றை பார்க்கலாம்.

போனஸ் பணத்தை சேமிக்க வேண்டும் : பெரும்பாலான நிறுவனங்களில் பண்டிகை கால போனஸ் வழங்கப்படுகிறது. அதை உடனடியாக செலவு செய்து விடாமல், எதிர்கால தேவைகளுக்காக சேமித்து வைக்க வேண்டும்.

ரெக்கரிங் டெபாசிட் : கையில் பெரும் தொகை கொண்டவர்கள் பிக்ஸட் டெபாசிட் செய்வார்கள். ஆனால், அவ்வபோது கிடைக்கும் தொகையை கொண்டு ரெக்கரிங் டெபாசிட் செய்யலாம். சிறுக, சிறுக சேர்ந்து பெரிய தொகை கிடைக்கும்.

ஷாப்பிங் பட்டியல் : எப்போதும் கடைக்கு ஷாப்பிங் செல்வதற்கு முன்பாக, உங்களுக்கு என்ன பொருள் தேவை என்ன என்பதை பட்டியல் போட்டுக் கொள்ளுங்கள். இதனால், தேவையற்ற பொருட்களை வாங்கும் பழக்கம் குறையும்.

வீட்டில் சமைக்கவும் : இன்றைக்கு ரெஸ்டாரண்ட்களில் சாப்பிடுவது அல்லது ஆன்லைன் மூலமாக ஆர்டர் செய்து சாப்பிடும் பழக்கம் அதிகரித்துள்ளது. இது உடலுக்கும், பணத்திற்கு கேடு தரும் விஷயம் ஆகும். ஆகவே வீட்டில் சமைத்து சாப்பிடவும்.

டிஸ்கவுண்ட்கள் : இன்றைக்கு எண்ணற்ற நிறுவனங்கள் வாடிக்கையாளர்களை கவர டிஸ்கவுண்ட்களை வாரி வழங்குகின்றன. எந்த சமயத்தில், எது கிடைக்கும் என்பதை கணித்து பயன்படுத்திக் கொள்ள வேண்டும்.

பெரும் செலவுகளை குறைப்பது : நாம் செய்யும் செலவுகளில் எது மிக அதிகம் என்பதை கணித்து, எதிர்காலத்தில் அதை குறைப்பதற்கான முயற்சிகளை செய்ய வேண்டும்.

ஆன்லைன் ஷாப்பிங் : ஆன்லைன் ஷாப்பிங்கில் நம் மனது பார்க்கும் பொருட்களை எல்லாம் வாங்குவதற்கு துடிக்கும். ஆகவே, அதை முடிந்த வரை தவிர்க்க வேண்டும்.

ரீசார்ஜ் மற்றும் சப்ஸ்கிரிப்ஷன் : தேவையற்ற ரீசார்ஜ் மற்றும் சப்ஸ்கிரிப்ஷன் போன்றவற்றை தவிர்க்க வேண்டும். குடும்பத்தில் ஒருவருக்கு செய்யும் ரேட் கட்டர், பூஸ்டர் பிளானில் பிறரும் பலன் அடையலாம்.

பட்ஜெட் வரையறை : மாதந்தோறும் திட்டமிடும் பட்ஜெட் அளவைத் தாண்டிய செலவுகளை செய்யக் கூடாது. மனதில் கட்டுப்பாடு அவசியம்.