Air conditioner : ஏசி வாங்கும்போது எப்படி பார்த்து வாங்க வேண்டும்..? இதையெல்லாம் கவனிக்க மறந்துடாதீங்க..!
அதிக விலை கொடுத்து வாங்கும் ஏசி நீண்ட நாட்களுக்கு உழைக்க வேண்டும். அதேசமயம் நல்ல கண்டிஷனிலும் இருக்க வேண்டும் என்பதே பலருடைய எதிர்பார்ப்பு. அதை பூர்த்தி செய்யும் விதமாக இதையெல்லாம் கவனித்து வாங்குவது அவசியம்.
கத்தரி வெயில் தொடங்குவதற்கு முன்னரே வெயில் மக்களை படாதபாடு படுத்தி வருகிறது. அதிலும் இந்த பாண்டமிக் சூழலில் வீட்டிற்குள் இருக்கும் மக்கள் கூட வெயிலின் தாக்கத்தை பொறுத்துக்கொள்ள முடியவில்லை என புலம்புவதை கேட்க முடிகிறது. இவர்களுக்கெல்லாம் கை கொடுக்கும் ஒரே நண்பன் ஏ.சி. இரவில் மட்டுமே பயன்படுத்தப்பட்டு வந்த ஏசி தற்போது பகலிலும் பயன்படுத்தத் தொடங்கிவிட்டனர். அப்படி பலருடைய தேவையாக இருக்கும் ஏசியை வாங்கும்போது சில விஷயங்களை நாம் கவனிப்பது அவசியம். அதிக விலை கொடுத்து வாங்கும் ஏசி எப்படி பார்த்து வாங்குவது என்று பார்க்கலாம்.
அறைக்கு ஏற்ற ஏசி கொள்ளளவு : ஏசி வாங்கும் முன் அதன் கொள்ளளவைக் கணக்கிடுதல் அவசியம். அறையில் அளவிற்கு ஏற்ப ஏசியின் கொள்ளளவு இருக்க வேண்டும். உதாரணமாக 100 - 120 சதுர அடியில் அறை இருக்கிறதெனில் 1 டன் கொள்ளளவு ஏற்றது. அதைவிட அதிகமாக இருந்தால் 1.5 டன் அல்லது 2 டன் கொள்ளளவு ஏற்றதாக இருக்கும். அதேபோல் அறையில் சூரிய வெளிச்சம் படும் அளவையும் கணக்கில் கொள்ளவேண்டும்.
பயன்பாடு: ஏசியை எவ்வாறு பயன்படுத்தப் போகிறீர்கள் என்பது முக்கியம். அதற்கு ஏற்ப அதன் ஆற்றல் திறனைக் கணக்கிட்டு வாங்குங்கள். பலரும் கடைக்காரர் ஐந்து ஸ்டார் ஆற்றல் கொண்ட ஏசியை வாங்கப் பரிந்துரைப்பார்கள். ஆனால் அது அத்தனை சிறந்த யோசனை அல்ல. அது அதிக விலை கொண்டதாக இருக்கும். நீங்கள் அதிகபட்சமாக 6 மணி நேரம் மட்டும் பயன்படுத்தப் போகிறீர்கள். வெயில் நாட்களில் மட்டும் பயன்படுத்தப்போகிறீர்கள் எனில் மூன்று ஸ்டார் ஏசி ஏற்றதாக இருக்கும்.
இன்வெர்டர் ஏசி வாங்கலாம் : பலரும் இன்வெர்டர் ஏசி வாங்குவது நல்ல யோசனை என்கின்றனர். பலரும் இன்று இதைத்தான் விரும்புகின்றனர். ஏனெனில் அதன் வேகம் நிலையானதாக இருக்கும். அதன் மோட்டார் வேகம் அதிகமாக இருக்கும். விரைவில் அறை குளுமையாகிவிடும். அதேசமயம் மின்சாரத்தை மிச்சப்படுத்தவும் இது சிறந்தது என்கின்றனர்.
காற்று வெளியேற ஏற்ற இடம் : ஏசிகள் மின்விசிறி வைக்கப்பட்டுள்ளதால், அந்தக் குளிர்ந்த காற்று பரவ ஏதுவான இடம் அவசியம். எந்த இடத்தில் பொருத்தினால் ஏசி காற்று நன்றாகப் பரவும் என்பதைக் கண்டறிய வேண்டும். இடையூறுகள் இல்லாமல் இருந்தால் காற்று நன்றாகப் பரவும். அதேபோல் முகத்தில் நேராகப் படும்படி வைக்கக்கூடாது. அதற்கு ஏற்ப பொருத்துங்கள்.
கூடுதல் அம்சங்களுக்கு கூடுதல் விலை : ஃபில்டரில் மட்டுமல்ல, ஸ்மார் ஏசிக்களும் இருக்கின்றன. நீங்கள் வீட்டிற்குச் செல்வதற்கு முன்னரே உங்கள் செல்ஃபோனால் ஆன் செய்து வீட்டைக் குளுமையாக்கலாம், மின்விசிறியின் குறைந்த சத்தம், கொசுவைக் கண்டால் ஒழிப்பது போன்ற அம்சங்கள் கொண்டு வருகின்றன. அவை அதன் அம்சங்களுக்கு ஏற்ப விலையிலும் ஏற்றங்கள் இருக்கின்றன.
