தூக்கி எறியும் முட்டை ஓட்டில் இத்தனைப் பயனுள்ள விஷயங்கள் இருக்கா..? நீங்களும் தெரிஞ்சுக்கோங்க..!

நாம் சமையலில் வேண்டாம் என்று தூக்கி எறியும் முட்டை ஓட்டில் கால்சியம் கார்பனேட், புரோட்டீன், மெக்னீசியம், செலினியம் போன்ற ஊட்டச்சத்துக்கள் உள்ளதால் சரும பராமரிப்பு முதல் உடல் ஆரோக்கியத்திற்கு பயனுள்ளதாக உள்ளது.

நம்முடைய சமையலறையில் பயன்படுத்தப்படும் காய்கறிகள்,கீரை தண்டுகள் என பல்வேறு உணவுப் பொருள்களை வீணாக்காமல் நாம் மீண்டும் வேறொன்றிற்கு உபயோகப்படுத்தலாம் என்பது அனைவருக்கும் தெரிந்த விஷயம். ஆனால் வேண்டாம் என்று ஒதுக்கி வைக்கும் முட்டை ஓட்டியில் கால்சியம் நிறைந்துள்ளதால் மீண்டும் சமையலில் நாம் பயன்படுத்த முடியும் என்பது இதுவரை பலருக்கும் தெரியாது.

குழந்தைகள் முதல் பெரியவர்கள் வரை புரோட்டீன் மற்றும் கால்சியம் உணவுகளை வழங்க வேண்டும் என்றால் முட்டையை உணவில் சேர்த்துக்கொள்வோம். பின்னர் முட்டை ஓட்டை நிச்சயம் குப்பைத் தொட்டியில் அல்லது செடிகளுக்கு உரமாக போடுவது வழக்கம். இதை நீங்கள் கீழே போட வேண்டாம் என்றும், மற்ற கால்சியம் நிறைந்த உணவுப்பொருள்களைக் காட்டிலும் முட்டை ஓட்டில் அதிகளவில் கால்சியம் உள்ளது என்கின்றனர் ஊட்டச்சத்து நிபுணர்கள்.

எனவே தாராளமாக இனி முட்டை ஓட்டை தூக்கி எறியாமல் உங்களுக்கு ஆரோக்கியத்தை இயற்கை முறையில் பாதுகாக்க உபயோகிக்க முடியும். எனவே இந்நேரத்தில் சமையலறையில் முட்டை ஓடுகளை மீண்டும் பல்வேறு வழிகளில் எப்படி பயனுள்ளதாக பயன்படுத்தலாம்? என்பது குறித்து இங்கே அறிந்து கொள்வோம்.

பாத்திரங்களை சுத்தம் செய்தல் : முட்டையை உடைத்து அதில் உள்ள வெள்ளை மற்றும் மஞ்சள் கருவை மட்டும் உபயோகித்து விட்டு முட்டை ஓடுகளை தூக்கி எறிந்துவிடுவோம். இனி அப்படி செய்ய வேண்டாம். முட்டை ஓடுகளை நன்றாக உடைத்து வைத்துக் கொண்டு அதிக அழுக்கு படிந்த பாத்திரங்களை சுத்தம் செய்வதற்கு பயன்படுத்தலாம்.

விதைகள் நட்டு வைத்தல் : முட்டை ஓடுகளைப் பாதியாக உடைத்து, விதைகளை முளைக்க வைக்கும் ஜாடியாக உபயோகிக்கலாம். பாதி முட்டை ஓட்டில் மண்ணை நிரப்பி வைத்து விதைகளை நட்டு வைக்கப்பயன்படுத்தலாம்.

பறவைகளுக்கு உணவளித்தல் : பறவைகளுக்காக தானியங்களை வைப்பதற்கு நீங்கள் முட்டை ஓடுகளைப் பயன்படுத்தலாம். முட்டை ஓட்டில் கால்சியம் நிறைந்துள்ளதால் முட்டையிட்ட பறவைகளுக்கு ஊட்டச்சத்துக்களை அளிப்பதற்கு உதவியாக இருக்கும்.

காபியில் முட்டை ஓடு : முட்டை ஓடுகளில் காரத்தன்மை உள்ளது. காபியில் அமிலத்தன்மை உள்ளதால் இதைக்குறைப்பதற்கு பயன்படுத்தலாம். காபியுடன் சிறிதளவு முட்டை ஓடுகளை சேர்த்து கொதிக்க வைக்கும் பருகும் போது அமிலத்தன்மை குறைய வாய்ப்புள்ளது.

ஆப்பிள் சைடர் வினிகரில் முட்டை ஓடுகள் : ஆப்பிள் சைடர் வினிகருடன் முட்டை ஓடுகளை அரைத்து உபயோகிக்கும் போது, சரும பிரச்சனை மற்றும் தோல் எரிச்சலுக்கு சிறந்த நிவாரணமாக உள்ளது.

பற்களின் ஆரோக்கியம் : முட்டை ஓடுகளைப் பயன்படுத்தி ஆரோக்கியமான முறையில் பற்பொடி தயாரிக்கலாம். ¼ கப் நொறுக்கப்பட்ட முட்டை ஓடுகள், 2 டீஸ்பூன் தேங்காய் எண்ணெய், 1 டீஸ்பூன் பேக்கிங் சோடா, 1/2 டீஸ்பூன் காஸ்டில் சோப் மற்றும் சில துளிகள் மிளகுக்கீரை எண்ணெய் போன்றவற்றை சேர்த்து நன்றாக கலக்கிக்கொள்ள வேண்டும். இப்போது இயற்கையான பற்பொடி தயாராகிவிடும். ஏற்கனவே முட்டை ஓடுகளில் கால்சியம் உள்ளதால் பற்களை ஆரோக்கியமாக வைத்திருக்க உதவுகிறது.

சூப் மற்றும் ஜூஸில் முட்டை ஓடுகள் : கால்சியம் அனைவருக்கும் தேவையான ஒன்று. முட்டை ஓடுகளில் அதிக கால்சியம் நிறைந்துள்ளதால் உங்களின் உடல் ஆரோக்கியத்திற்கும், அன்றாட கால்சியம் தேவைகளை நிவர்த்தி செய்யவும் சூப்கள், பழச்சாறுகள் போன்றவற்றில் நன்கு பொடியாக்கி முட்டை ஓடுகளை நீங்கள் சேர்த்துக் கொள்ளலாம். இதே போன்று சில குழம்பு வகைகளிலும் முட்டை ஓடுகளை உபயோகிக்கலாம். இவ்வாறு பல்வேறு ஆரோக்கிய நன்மைகள் இருந்தாலும் அளவுக்கு மீறி உபயோகிக்கக்கூடாது என்கின்றனர் மருத்துவர்கள்.. எனவே இனி மேல் முட்டை ஓடுகளை தூக்கி எறியாமல் மேற்கண்ட வழிமுறையில் பயன்படுத்துவதற்கு நீங்களும் முயற்சி செய்து பாருங்கள்..