Happy Yoga Day 2020 : யோகா செய்வதால் கிடைக்கும் உன்னத சக்திகளை பற்றி கேள்விப்பட்டிருக்கிறீர்களா..?

யோகா கலை என்பது மனதையும், உடலையும் ஒரு நிலைப்படுத்தும்போது நிகழும் அற்புதம். அப்போதுதான் யோகாவின் நன்மைகளையும் முழுமையாகப் பெற முடியும். அப்படி என்னென்ன நன்மைகளைப் பெறலாம் என்று பார்க்கலாம்.

உடல் அமைப்பு சீராகும் : நாள் முழுவதும் டெஸ்கில் வேலை பார்ப்போருக்குத் தண்டு வடம் பாதிக்கப்படும். என்னதான் அமர்ந்து வேலை பார்த்தாலும் உடல் அசதி அதிகமாக இருக்கும். இவைதவிர கழுத்து வலி , தோள்பட்டை வலி என எல்லாவற்றிற்கும் யோகா சிறந்த பயிற்சி.

இலகுத் தன்மை : யோகாவில் இருக்கும் ஸ்ட்ரெட்சுகள் உடலை மிக இலகுவாக்கும். கால்களைத் தலைக்கு மேல் கொண்டு வருவது, கைகளை மடக்குவது என கை கால்களுக்கு இலகுத் தன்மையை அளிக்கும். இதனால் நீங்கள் எந்த வேலை செய்தாலும் உடனே உடல் வளைந்து கொடுக்கும்.

தசை வலுப்பெறும் : பலவீனமான தசைகளை வலுப்பெறச் செய்யும். மேலும் தசை வலுவால் உடல் அமைப்பு அழகாகும்.

சர்க்கரை நோய் கட்டுக்குள் இருக்கும் : இரத்தத்தில் உள்ள சர்க்கரையின் அளவை சமன் செய்யும். கெட்ட கொழுப்புகளை நீக்கி உடல் எடையையும் சீராக்கும்.

வளர்சிதை ஆற்றல் அதிகரிக்கும் : உடல் பாகங்கள் சரியான முறையில் இயங்கத் தொடங்கினாலே வளர்சிதை மாற்றங்கள் சீராக நிகழும். அதற்கு யோகா சரியான பயிற்சியாக இருக்கும்.

இரத்த ஓட்டம் அதிகரிக்கும் : ஓய்வான மற்றும் அமைதியான யோகா முறையால் இரத்த ஓட்டும் ஒவ்வொரு பாகங்களுக்கும் சீராகச் செலுத்தப்படும். இதனால் இதயமும் நன்கு இயங்கும். image source : shutter stock

நோய் எதிர்ப்புச் சக்தி அதிகரிக்கும் : இரத்த ஓட்டம் சீராக இயங்கினாலே நோய் எதிர்ப்புச் சக்தியும் அதிகரிக்கும். இதனால் நோய்த் தொற்றுகள் வராமல் நோய் நொடியின்றி வாழலாம்.

உற்சாகம் பிறக்கும் : தினமும் யோகா பயிற்சி மேற்கொண்டால் உங்களுக்குள் புத்துணர்ச்சி மற்றும் உற்சாகம் கிடைக்கும். இதனால் உங்களை நீங்களே புதிதாகக் காண்பீர்கள்.

நுரையீரல் செயல்பாடு அதிகரிக்கும் : இதில் அதிகமான மூச்சுப் பயிற்சி இருப்பதால் நுரையீரல் செயல்பாடு வேகமாக இருக்கும்.

நல்ல தூக்கம் கிடைக்கும் : யோகாவில் மனதும் ஒருங்கிணைந்து செயல்படுவதால் அழுத்தம், பதட்டம், சோர்வு எதுவாயினும் அவை குறைந்து நிம்மதியான ஆழ்ந்த தூக்கம் வரும்.