எப்படி தூங்கினால் உடலுக்கு ஆரோக்கியம்.? இதுதான் சரியான பொசிஷன்ஸ்!

உள்ளத்திற்கும், உடலுக்கும் போதுமான ஓய்வு கொடுத்து, மீண்டும் புத்துணர்ச்சி அடைவதற்கான நடவடிக்கையாக தூக்கம் அமைகிறது என்பதில் மாற்றுக் கருத்து இல்லை. நம் தூக்கம் முறையானதாகவும், நிம்மதியானதாகவும் இருக்க வேண்டும். ஆழ்ந்த உறக்கத்தின் மூலமாக மட்டுமே நம் உள்ளமும், மனமும் புத்துணர்ச்சி அடையும்.

தவறான பொசிஷனில் தூங்குவது, பற்பல காரணங்களால் தூக்கம் தடைபடுவது ஆகியவை நம் உடல் ஆரோக்கியத்திற்கு நல்லதல்ல. நிம்மதியான தூக்கம் குறித்த அவசியத்தை உணர்த்தும் நோக்கில் உலக தூக்கம் தினம் ஆண்டுதோறும் மார்ச் மாதத்தில் கொண்டாடப்பட்டு வருகிறது.

கடந்த 2008ஆம் ஆண்டு முதல் மார்ச் மாதத்தில் இந்த தினம் கடைப்பிடிக்கப்படுகிறது. அதன்படி இந்த மார்ச் 17ஆம் தேதி உலக தூக்க தினமாக கடைப்பிடிக்கப்படுகிறது.

தூக்கம் என்பது மனிதனுக்கான வரம் என்பதை உணர்த்துவதுதான் இந்த நாளின் நோக்கம் ஆகும். இன்றைய இயந்திரத்தனமான வாழ்க்கை முறை, மன அழுத்தம், டிஜிட்டல் ஸ்கிரீன்களில் மூழ்குதல் போன்ற காரணங்களால் நிம்மதியான உறக்கம் கெட்டுவிடக் கூடாது என்பது இந்நாளின் நோக்கமாக உள்ளது. குறிப்பாக தூக்கமின்மை பிரச்சினைகளுக்கு தீர்வு காண வேண்டும் என்றும் வலியுறுத்தப்படுகிறது.

எந்த பொசிஷனில் தூங்கலாம் : ஆழ்ந்த உறக்கம், நிம்மதியான உறக்கம் என்பதன் அவசியம் குறித்தெல்லாம் தெரிந்து வைத்திருந்தாலும், அவற்றை எப்படி சாத்தியமாக்குவது என்பதை அறிந்து வைத்திருப்பதும் முக்கியமாகும். அந்த வகையில், நாம் எந்த பொசிஷனில் தூங்குகிறோம் என்ற விஷயம் முக்கிய பங்கு வகிக்கிறது.

பொதுவாக நம் முதுகு கீழாக இருக்கும்படி, அதாவது மல்லாக்க படுத்து உறங்குவது சிறப்பானதாக அமையும். இதை ‘சவாஸனா’ என்று குறிப்பிடுகின்றனர். இந்த முறையில் தூங்கும்போது உங்கள் முதுகு தண்டுவடம் நேர்கோட்டில் இருக்கிறது மற்றும் உடல் எடை அழுத்தம் சீராக இருக்கிறது. முகத்தில் சுருக்கங்கள் ஏற்படுவதைத் தடுக்க இது உதவும்.

ஒரு பக்கமாக தூங்குவது : நிம்மதியான, ஆழ்ந்த உறக்கத்திற்கு மிகவும் பரிந்துரைக்கப்பட்ட பொசிஷன் இதுவாகும். அதிலும் இடதுபக்கமாக தலை சாய்ந்து தூங்குவது நல்ல பலனை தரும். ஆசிட் ரிஃப்ளெக்ஸ் பிரச்சினை இருப்பவர்களுக்கு இது சௌகரியத்தை தரும். அது மட்டுமல்லாமல் கழுத்து வலி, இடுப்பு வலி, தோள் வலி போன்றவை வராது.

குப்புற படுத்து தூங்குவது : தூங்கும்போது மூச்சு விடுவதற்கு சிரமம் கொண்டவர்கள் அல்லது குறட்டை பிரச்சினையால் அவதி அடைபவர்கள் இந்த பொசிஷனை முயற்சி செய்யலாம். ஏனெனில் மூச்சுக்குழாய் நேர்கோட்டில் இயங்குவதால் சுமூகமான தூக்கத்தை உறுதி செய்யலாம். ஆசிட் ரிஃப்ளெக்ஸ் பிரச்சினை இருப்பவர்கள் இந்த பொசிஷனை முயற்சி செய்யக் கூடாது.

சுருண்டு படுப்பது : கருவில் உள்ள சிசு போல சுருண்டு படுத்துக் கொள்வது கர்ப்பிணி பெண்களுக்கும், தண்டுவட பிரச்சினை இருப்பவர்களுக்கும் பயனுள்ளதாக அமையும். தண்டுவடம், காதுகள், தோள்கள் மற்றும் தொடைகள் ஆகியவை சௌகரியமான நிலையில் இருக்கும்.

கால்களுக்கு தலையணை : தலைப்பகுதிக்கு மென்மையான தலையணை பயன்படுத்தவும். மல்லாக்க தூங்கும்போது முழங்கால்களுக்கு கீழே தலையணை வைத்து தூங்குவது நல்ல சௌகரியத்தை தரும். உடலின் முக்கிய பகுதிகளில் உள்ள வலி மற்றும் ஸ்ட்ரெஸ் போன்றவற்றுக்கு இது நிவாரணம் தரும்.

முழங்கால்களுக்கு இடையே தலையணை வைத்து உறங்கினால் தொடைகள், இடுப்பு, தண்டுவடம் போன்ற பகுதிக்கு நல்ல சௌகரியம் கிடைக்கும். உங்கள் உடலுக்கு எந்த அமைப்பு சரியாக வரும் என்பதை அறிந்து, அதை பின்பற்றவும்.