உலக ஆரோக்கிய தினம் 2023 : இதய நலன் காக்க நீங்கள் தவிர்க்க வேண்டிய பழக்கங்கள்..!

முன்பெல்லாம் 60, 70 வயது உடையவர்களை மட்டுமே தாக்கிக் கொண்டிருந்த ஹார்ட் அட்டாக், பின்னர் படிப்படியாக 50, 40 எனக் குறைந்து இப்போதெல்லாம் இளம் தலைமுறையினரை கூட தாக்கிக் கொண்டிருக்கிறது. ஆகவே, இதய நலன் குறித்து அக்கறை கொள்ள வேண்டிய தேவை எல்லோருக்கும் ஏற்பட்டுள்ளது.

உலகந்தோறும் ஏப்ரல் 7ஆம் தேதி உலக ஆரோக்கிய தினமாக கடைப்பிடிக்கப்பட்டு வரும் நிலையில், இதயநலன் குறித்தும் இந்த நாளில் தெரிந்து கொள்ள வேண்டியது அவசியம். ஹார்ட் அட்டாக்-ஐ தடுக்கவும், இதய நலனை மேம்படுத்தவும் பின்வரும் ஆலோசனைகளை பின்பற்ற வேண்டும் என்று இதயநல மருத்துவர்கள் தெரிவிக்கின்றனர்.

புகை, மது கூடாது : இன்றைக்கு இளம் தலைமுறையினர் பலரும் செய்கின்ற தவறு புகையிலை பயன்பாடு தான். அது சிகரெட், மென்னும் புகையிலை என எந்த வடிவில் இருந்தாலும் ஆபத்தானதுதான். புகையிலையில் உள்ள ஆபத்து மிகுந்த பொருட்கள் நமது ரத்த தட்டு அணுக்களை ஒன்றோடு, ஒன்று ஒட்டும்படியாக மாற்றிவிடும். அதனால் ஹார்ட் அட்டாக் ஏற்படும்.

புகையிலை பயன்பாட்டில் குறைந்தபட்ச பாதுகாப்பு வரம்பு என்பதே கிடையாது. ஒற்றை சிகரெட் கூட 15 தினங்களில் உங்கள் உயிரை பறிக்கும். அதேபோல, எப்போதாவது மது அருந்துவது பெரிய அளவுக்கு ஆபத்தானது இல்லை என்றாலும் கூட, தொடர் பயன்பாட்டின் விளைவுகளை புறம்தள்ளிவிட முடியாது. நமது இதய துடிப்பு மாறுபடலாம். இதய செயலிழப்பு, தூக்கமின்மை பிரச்சினைகள், உயர் ரத்த அழுத்தம் போன்றவை மதுப்பழக்கத்தால் ஏற்படலாம்.

சராசரி அளவுகள் : நம் இதயத்தை ஆரோக்கியமாக வைத்துக் கொள்ள வேண்டும் என்றால், உடல் நலன் சார்ந்த மருத்துவ வரம்புகளை தெரிந்து வைத்துக் கொள்ள வேண்டும். ரத்த அழுத்தத்தை பொருத்தவரையில் 120/80 என்ற அளவு இயல்பானது. இதைவிட கூடுதலாக ரத்த அழுத்தம் இருந்தால் நாம் விழித்துக்கொண்டு, வாழ்வியல் நடவடிக்கைகளை மாற்றிக் கொள்ள வேண்டும்.

உணவு சாப்பிடாத அதிகாலைப் பொழுதில் ரத்த சர்க்கரை அளவு 100 எம்ஜி என்ற அளவிலும், 3 மாத சராசரி ஹெபிஏ1சி அளவு 5.7 சதவீதமாகவும் இருக்க வேண்டும். மொத்த கொலஸ்ட்ரால் 200 எம்ஜி அளவுக்குள் இருக்க வேண்டும்.

ஆபத்துகளை தவிர்க்க வேண்டும் : ஆரம்ப நிலையில் நோய் கண்டறியப்பட்டால், “அதற்கு மருந்து எடுத்துக் கொள்ளக் கூடாது, பின்னர் அதுவே பழக்கமாகிவிடும்’’ என்ற தவறான புரிதல் இந்திய மக்களிடம் உள்ளது. குறிப்பாக, உயர் ரத்த அழுத்தம், சர்க்கரை போன்ற நோய்களுக்கு பலர் மருந்து எடுப்பதை தவிர்க்கின்றனர். இது மிக தீவிரவமான விளைவுகளுக்கு வழிவகை செய்யும் என்பதை மறக்க வேண்டாம்.

ஆரோக்கியமான வாழ்வியல் மாற்றங்கள் : பதப்படுத்தப்பட்ட உணவுகள், துரித உணவுகள், சோடா பானங்கள் போன்றவற்றை தவிர்த்து, சத்தான, ஆரோக்கியமான உணவுகளை உட்கொள்ள வேண்டும். உடல் எடையை கட்டுக்குள் வைக்க வேண்டும். தினசரி உடற்பயிற்சி செய்வது அவசியமாகும்.

நிம்மதியான, ஆழ்ந்த உறக்கம் முக்கியமாகும். நாளொன்றுக்கு 7 முதல் 9 மணி நேரம் தூங்க வேண்டும். இன்றைய இயந்திர வாழ்க்கை எதிரொலியாக தீரா பிரச்சினையாக உருவெடுத்துள்ள ஸ்ட்ரெஸ் பிரச்சினைக்கு தீர்வு காண வேண்டும்.