ஆண்களைக் காட்டிலும் பெண்கள் நீண்ட ஆயுளுடன் வாழ என்ன காரணம்..? ஆய்வு தரும் விளக்கம்

ஆணுக்கும், பெண்ணுக்கும் இடையே உடல் ரீதியாகவும், மன ரீதியாகவும் நிறையவே வேறுபாடுகள் இருக்கின்றன என்பது நம் எல்லோருக்கும் தெரியும். உடல் வலிமையில் ஆண்கள் மேலானவர்கள் என்பதால் பெண்களைக் காட்டிலும் வேகமாக ஓட முடியும். அதேபோல எடை தூக்குவது என்றாலும் மிகுதியாக தூக்குவார்கள்.

ஆனால், பெண்களைக் காட்டிலும் ஆண்களுக்கு நோய் அபாயங்கள் அதிகம் என்பதும், அவர்களின் ஆயுள் குறைவு என்பதும் உங்களுக்கு தெரியுமா? ஆண்களை விட பெண்கள் ஆரோக்கியமாக, நீண்ட ஆயுள் வாழுகின்றனர் என்று ஆய்வுகள் தெரிவிக்கின்றன.

அமெரிக்காவின் ஹார்வார்டு மருத்துவ பல்கலைக்கழகம் இந்த ஆய்வை நடத்தி முடித்துள்ளது. பெண்கள் கூடுதல் ஆயுளுடன் வாழ்வதில் இயற்கையின் பங்களிப்பு அதிகம் என்று தெரிவிக்கப்பட்டுள்ளது. இது எப்படி நிகழுகிறது என்பதற்கு பலரிடமும் மிகச் சரியான பதில் இல்லை என்றாலும் கூட, அதற்கான காரணங்களாக சில விஷயங்களை ஹார்வார்டு பல்கலைக்கழகம் முன்வைக்கிறது.

கருவிலேயே வேறுபாடு : ஆணுக்கும், பெண்ணுக்கும் இடையிலான வேறுபாடுகள் கருவிலேயே தொடங்கி விடுகிறதாம். மனித உடலில் 23 ஜோடி குரோமோசோம்கள் உள்ள நிலையில், அதில் 22 ஜோடி குரோமோசோம்கள் இரு பாலினத்தவருக்கும் ஒரே மாதிரியானவை தான். இருவருக்கும் வேறுபடுகின்ற 23ஆவது ஜோடி குரோமோசோம் தான் ஆண் என்பதையும், பெண் என்பதையும் தீர்மானிக்கிறது. 23ஆவது ஜோடியாக எக்ஸ் மற்றும் ஒய் கொண்டுள்ளவர்கள் ஆணாகவும், இரண்டுமே எக்ஸ் கொண்டுள்ளவர்கள் பெண்ணாகவும் பிறக்கின்றனர்.

ஹார்மோன்கள் : ஆண்களிடம் உள்ள டெஸ்டோஸ்டிரோன் ஹார்மோன்கள் இதயத்தை சுற்றியிலும் உள்ள தசைகளில் சூழ தொடங்கும் நிலையில், அவர்களூக்கு இதயம் தொடர்புடைய நோய்கள் வருகின்றன. ஆனால், பெண்களிடம் உள்ள ஈஸ்ட்ரோஜன் ஹார்மோன் அவர்களது இதயத்திற்கு பாதுகாப்பு அளிக்கிறது. ஆக, பெண்களுக்கு இதய நோய் குறைவு.

இனப்பெருக்க உறுப்பு : ஆண்களிடம் உள்ள புரோஸ்டேட் சுரப்பி என்பது பல நோய்களுக்கான பிறப்பிடமாக உள்ளது. பெண்களுக்கு மார்பக புற்றுநோய், கர்ப்பப்பை புற்றுநோய், கர்ப்பப்பை வாய் புற்றுநோய் போன்றவை வருகின்றன. இந்த விவகாரத்தில் பெண்களைக் காட்டிலும் ஆண்கள் கொஞ்சம் பாதுகாப்பானவர்கள் என்று உங்களுக்கு தோன்றலாம். ஆனால், பிற வகைகளில் ஆண்களுக்கு புற்றுநோய் ஏற்படுகின்ற அபாயம் அதிகம் உள்ளது.

மெடபாலிசம் : இதய நலன் காக்கும் நல்ல கொலஸ்ட்ரால் பெண்களுக்கு மிகுதியாக உள்ளது. இதனால், அவர்களுக்கு இதயம் தொடர்புடைய நோய் அபாயமும் குறைவு தான். உடல் பருமன் மற்றும் இதர நோய் அபாயங்களும் கூட ஆண்களைக் காட்டிலும் பெண்களுக்கு குறைவு தான். இதற்கெல்லாம் மெடபாலிசம் தான் காரணம்.

சமூக காரணங்கள் : சமூக ரீதியாக பார்த்தால் பெண்கள் தான் எப்போதுமே வீட்டு வேலைகளை செய்கின்றனர். தீபாவளி, பொங்கல் என்று எந்த பண்டிகையானாலும் அவர்கள் ஓய்ந்திருப்பது கிடையாது. இதுவே நல்ல பயிற்சியாக அமைவதால் அவர்களின் ஆரோக்கியம் சிறப்பாக அமைகிறது.