உடற்பயிற்சி செய்தால் மட்டும் போதாது.. அதற்கு முன்பும், பின்பும் இதை பின்பற்றுவது அவசியம்..!

உடல் ஆரோக்கியத்திற்காவும், உடலை கட்டுக்கோப்பாக வைத்துக் கொள்ளவும் நாம் உடற்பயிற்சிகளை செய்கின்ற அதே சமயத்தில், ஊட்டச்சத்து உணவுகளை தவற விடக் கூடாது என்பதையும் நினைவில் கொள்ள வேண்டும்.

பயிற்சி செய்து களைத்துப் போயுள்ள உடலுக்கு புத்துணர்ச்சி ஊட்டுவதற்கு ஊட்டச்சத்து உணவு அவசியமாகும். நம் உடலியில் சேதமடையும் திசுக்களை சீரமைக்கவும், அழற்சியை தவிர்க்கவும் இது அவசியமாகிறது.

நாம் எடுத்துக் கொள்ளும் ஊட்டச்சத்து உணவில் மாவுச்சத்து, புரதம் மற்றும் ஆரோக்கியமான கொழுப்புகள் உள்பட அனைத்தும் இருக்க வேண்டும். அப்போது தான் நம் தசைகள் மீட்டுருவாக்கம் அடையும் மற்றும் போதுமான ஆற்றல் கிடைக்கும்.

முன் தயாரிப்பு மற்றும் ஓய்வு அவசியம் : கடுமையான பயிற்சிகளை செய்யும் முன்பாக நம் உடலை அதற்கு தயார்படுத்திக்கொள்ள வேண்டும். அதனை Warm Up என்று சொல்கின்றனர். இவ்வாறு உடலை முன்கூட்டியே தயார் செய்யாமல் பயிற்சியில் ஈடுபடும் பட்சத்தில் தசைப்பிடிப்பு, உடல் வலி போன்ற பிரச்சினைகளை எதிர்கொள்ள வேண்டியிருக்கும்.

அதேபோல உடற்பயிற்சியை செய்து முடித்தவுடன் சட்டென்று அடுத்த வேலைக்கு தாவி விடக் கூடாது. ஏனென்றால் கடும் சிரமத்தை எதிர்கொண்ட நம் உடலுக்கு ஓய்வு அவசியம் ஆகும். அதனை Cool Down என்று குறிப்பிடுகின்றனர். ஏதேனும் காயங்கள் ஏற்படுவதை தடுக்க இது அவசியமாகிறது. உடற்பயிற்சியின்போது அதி வேகத்தில் இருக்கின்ற ரத்த ஓட்டம் இயல்பு நிலைக்கு திரும்புவதற்கும் இது உதவுகிறது.

நம்முடைய உடற்பயிற்சி நடவடிக்கைகள் பாதுகாப்பாகவும், நம் உடலுக்கு ஆபத்தில்லாமலும் அமைய வேண்டும் என்றால் இதுபோல முன் தயாரிப்பு மற்றும் ஓய்வு நடவடிக்கைகள் அவசியமாகும்.

எவ்வளவு சத்து தேவைப்படும்? சாதாரணமாக உடற்பயிற்சி செய்து முடித்த பிறகு ஊட்டச்சத்து கொண்ட உணவுகளை எவ்வளவு எடுத்துக் கொள்ள வேண்டும் என்று குழப்பம் ஏற்பட்டு விடுகிறது. இது ஒவ்வொரு நபர் மற்றும் அவர் செய்கின்ற பயிற்சியை பொருத்து மாறுபடும். உதாரணத்திற்கு ஒரு ஓட்டப்பந்தய வீரருக்கு எவ்வளவு ஊட்டச்சத்து தேவைப்படும் என்பதை கணிக்க வேண்டும்.

அவர் எவ்வளவு தீவிரமாக பயிற்சி செய்கிறாரோ, அதை ஈடுகட்டும் வகையில் ஊட்டச்சத்து உணவை எடுத்துக் கொள்ள வேண்டும். தினசரி ஒரே வகையான உணவை எடுத்துக் கொள்ளாமல் சுழற்சி அடிப்படையில் சீரான சத்து கொண்ட உணவுகளை எடுத்துக் கொள்ள வேண்டும்.

முன் தயாரிப்பு ஏன் அவசியம்? குளிர்ந்த நிலையில் இருக்கின்ற நம் உடல் சட்டென்று உடற்பயிற்சிக்கு தயாராக இருக்காது. அப்படியொரு சமயத்தில் பயிற்சி செய்தால் தேவையற்ற காயங்கள் ஏற்படலாம். ஆகவே, நம் உடலை கொஞ்சம் வெப்பநிலைக்கு கொண்டு வர வேண்டும். அவ்வாறு செய்வதால் நம் இதய நலன் மேம்படும் மற்றும் நுரையீரல் செயல்பாடு பயிற்சிக்கு ஏற்றவாறு தயார் நிலையில் இருக்கும்.

ஓய்வு தேவை : பயிற்சியின்போது அதிகரிக்கின்ற இதயத் துடுப்பு, உயர் ரத்த அழுத்தம் போன்றவை குறைந்து நம் உடல் சுமூக நிலைக்கு வருவதற்கு இந்த ஓய்வு அவசியமாகிறது. உடல் மட்டுமல்ல, மிகுந்த சிந்தனை மற்றும் கவனம் ஆகியவற்றுடன் பயிற்சிக்கு ஒத்துழைக்கும் நம் மனதுக்கும் சற்று ஓய்வு கொடுப்பது அவசியமாகும்.