கழிவறையை பயன்படுத்திய பின் சோப்பு போட்டு கை கழுவவில்லை எனில் இவ்வளவு பாதிப்புகள் வருமா?

சிலர் வீட்டில் இருந்தாலும், வெளியில் இருந்தாலும் மிகவும் ஹைஜீனிக்காக இருப்பார்கள். எதை தொட்டாலும் சரி, தொடாவிட்டாலும் சரி குறிப்பிட்ட இடைவெளியில் கைகளை அவ்வப்போது சானிடைசர், சோப்பு அல்லது ஹேண்ட் வாஷ் போட்டு கழுவி கொண்டே இருப்பார்கள். அவர்களை நாம் விசித்திரமாக பார்த்திருப்போம். ஆனால் கொரோனா தாக்கத்திற்கு பின்னர் இப்போது உலகமே சானிடைசர் மயமாகிவிட்டது. ஒரு சிலர் கழிப்பறையை பயன்படுத்திய பிறகு சரியாக கைகளை சுத்தம் செய்யாமல் விட்டுவிடுவார்கள்.

கழிப்பறை சென்று வந்த பிறகு கைகளை கழுவாமல் அல்லது சரியாக கழுவாமல் இருப்பதால் அது மிக பெரிய தவறான பழக்கம் ஆகும். கழிவறையை பயன்படுத்திய பிறகு சோப்பு மற்றும் தண்ணீரில் கைகளை முறையாக தேய்த்து கழுவாமல் இருப்பது மிகவும் ஆபத்தானது.

நோய் உண்டாக்கும் பழக்கம் : பொதுவாக ஆயிரக்கணக்கான நோய் கிருமிகளுக்கு இனப்பெருக்க இடமாக இருக்கின்றன வீடுகளில் உள்ள வாஷ்ரூம்கள். நீங்கள் அலுவலகம் அல்லது மால்கள் என வெளியே செல்லும் இடங்களில் உள்ள பொது கழிப்பறைகளைப் பயன்படுத்துகிறீர்கள் என்றால், அது இன்னும் மோசமானது என்பதை நினைவில் கொள்ளுங்கள். ஏனென்றால் யார் எதை தொட்டார்கள் என்பது தெரியாது.

எனவே கழிப்பறையை பயன்படுத்திய பின் சரியாக கைகளை கழுவாமல் விட்டால், வாஷ்ரூம் கிருமிகள் உங்கள் கையிலிருந்து நீங்கள் எதை தொட்டாலும் உதாரணமாக கணினி, மொபைல் என அதற்கு மாறும். இந்த பழக்கம் லேசான குடல் தொற்று முதல் தற்போது உலகை அச்சுறுத்தி வரும் கொரோனா வைரஸ் வரை எந்த நோய் வேண்டுமானாலும் தாக்கும் அபாயம் ஏற்படுகிறது. மேலும் கழிப்பறை போய்விட்டு சரியாக கைகளை கழுவாமல் சாப்பிடுவதற்கு முன் கைகளை கழுவினாலும் போதாது.

ஏனென்றால் நீங்கள் அதற்குள் சரியாக கழுவாத கிருமிகள் நிறைந்த கைகளை பல பொருட்களுக்கு மாற்றி இருப்பீர்கள். ஒவ்வொரு முறை அந்த பொருட்களை தொடும் போதும், கழிப்பறை கிருமிகளையும் மீண்டும் மீண்டும் கைகளில் ஏற்றி கொள்வீர்கள்.

சரும சேதம் : நமது தோல் பகுதி சூப்பர் சென்சிட்டிவ் திறன் கொண்டது. கழிப்பறை சென்று விட்டு கைகளை சரியாக கிருமி நீக்கம் செய்யாமல் சருமத்தைத் தொடும் போது, தோல் பிரச்சனைகள் ஏற்படும் அபாயம் அதிகம். இந்த பழக்கத்தால் தோல் வெடிப்பு, பருக்கள் மற்றும் தோல் எரிச்சல் உள்ளிட்ட ஏராளமான சரும பிரச்சனைகள் ஏற்படும்.

பிறருக்கும் ஆபத்து : கழிவறைக்கு சென்று வந்த பின் கைகளை முறையாக கழுவாமல் இருப்பது உங்களுக்கு மட்டுமல்ல, பிறருக்கும் ஆபத்தை ஏற்படுத்த கூடிய செயல். கிருமிகளுடன் நீங்கள் தொட்ட பொருட்களை யாரெல்லாம் மேற்பரப்புடன் தொடுகிறார்களோ அவர்களுக்கும் நோய் ஏற்படுகிறது.

கைகளை எப்படி கழுவ வேண்டும் : கழிவறை மட்டுமல்ல எங்காவது வெளியில் சென்று வந்தாலும், அழுக்கான பொருட்களை தொட நேர்ந்தாலும் கீழ்கண்டவாறு கைகளை சுத்தப்படுத்தி கொள்ளலாம்.

1. கையின் வெளிப்படும் அனைத்து பகுதிகளையும் கழுவ வேண்டும்

2. தண்ணீரை வேகமாக திறந்து விட்டு அதில் சிறிது நேரம் கைகளை காட்டி விட்டு, பின் சோப்பு பயன்படுத்தி கழுவ வேண்டும்.

3. உள்ளங்கையின் பின்னால் மற்றும் விரல்களுக்கு இடையில் நன்றாக தேய்த்து கழுவ வேண்டும்.

4. நகங்களையும் நன்றாக கழுவி துடைக்க வேண்டும்

5. ஈரமான கைகளில் கிருமிகள் உடனடியாக பரவும் அபாயம் உள்ளது. எனவே கைகளை சுத்தமாக கழுவினால் மட்டும் போதாது. கழுவிய பின் கைகளை சரியாக காய வைக்க வேண்டும்.