முதல்முறை உடலுறவில் ஈடுபடும்போது வலி ஏற்படுவதை தவிர்க்க டிப்ஸ்..!

இனவிருத்திக்காக மட்டுமல்லாமல், எந்த ஒரு ஆணும், பெண்ணும் உடல் ரீதியாக மற்றும் மன ரீதியாக இன்புற்றிருக்க அடிப்படையாக இருப்பது பாலியல் உறவாகும். பருவ வயதிலேயே நமக்கு பாலியல் வேட்கை தொடங்கி விடுகிறது. ஆனால், அதில் இருக்கும் சிக்கல்கள் குறித்து நாமும் யாரிடமும் கேட்பதில்லை அல்லது தாமாக முன்வந்து நமக்கு யாரும் சொல்லித் தருவதில்லை.

பாலியல் குறித்துப் பேசுவதற்கு சமூகத்தில் நிலவும் தயக்க நிலை தான் இதற்கு காரணம் ஆகும். சிலர் ஆதாரமற்ற தரவுகளைக் கொண்ட இணையதளங்களில் படித்து அல்லது படம் பார்த்து மனதை குழப்பிக் கொள்கின்றனர். அதையெல்லாம் விடுத்து, உங்கள் மனதில் இருக்கும் சந்தேகங்களுக்கு விடையளிப்பதாக அமைகிறது இந்த செய்தி.

நீங்கள் தயாரா? ஜஸ்ட் ஓகே என்று நொடிப் பொழுதில் தயாராகும் விஷயமல்ல இது. பாலியல் உறவுக்கு நம் உடலும், உள்ளமும் தயார் நிலையில் இருக்க வேண்டும். இரண்டில் எது ஒன்றுக்கு விருப்பமில்லை என்றால் உறவு என்பது சிக்கலாகிவிடும். உங்கள் மனமும், உள்ளமும் விரும்புகிறது என்றால் மட்டும் இதை முன்னெடுத்து செல்லவும். இல்லை என்றால் கட்டாயமாக மறுத்து விடவும்.

மெதுவாக தொடங்கவும் : முதல்முறை என்பதால் ஆர்வ மிகுதியில் அதிவேகமாக நீங்கள் இயங்கக் கூடும். அது கடுமையான வலியை ஏற்படுத்தி, முதல் அனுபவத்தை மோசமான நினைவுகளாக மாற்றி விடும். மெல்ல, மெல்ல முன்னேறிச் செல்லும் பட்சத்தில் உடலும் அதற்கு ஒத்துழைக்கத் தொடங்கும். ஆக, வலி என்பது குறைவாக இருக்கும்.

லூப்ரிகண்ட் பயன்பாடு : பெண்ணுறுப்பில் அதிக இறுக்கம் தென்படுவதே வலி ஏற்படுவதற்கான அடிப்படை காரணமாகும். செக்ஸ் உறவு வைத்துக் கொள்ளத் தொடங்கும் ஆரம்ப காலங்களில் எல்லோருக்கும் இந்த சிக்கல் இருக்கும். அதே சமயம், கொஞ்சம் லூப்ரிகண்ட் பயன்படுத்தும் பட்சத்தில் இறுக்கம் குறைந்து இலகுவாக மாறும்.

அரிப்பு, எரிச்சல் : நீங்கள் முதல்முறை உறவு கொள்ள முயற்சிக்கும்போது உங்கள் பிறப்புறுப்பில் அரிப்பு, எரிச்சல் போன்ற தொந்தரவுகள் ஏற்பட்டால் உடனடியாக அதை கைவிடவும். நல்லதொரு மருத்துவரிடம் ஆலோசனை பெற்ற பிறகு, பிரச்சினைக எதுவும் இன்றி அடுத்தமுறை முயற்சி செய்யலாம்.

பொசிஷன் : ஒவ்வொரு நபருக்கு ஒவ்வொரு செக்ஸ் பொசிஷன் சௌகரியமானதாக அமையும். உங்களுக்கு எது பிடித்திருக்கிறது என்பதை தெரிந்து கொண்டு, அதன் அடிப்படையில் முயற்சி செய்யவும். இது மனதில் நம்பிக்கையை அதிகரிக்கச் செய்யும். உடல் இலகுவாக உணரும். குறிப்பாக சில பொசிஷன்களில் வலி அதிகமாக இருக்கும். அவற்றை தவிர்க்கவும்.

பொருட்களின் பயன்பாடு : முதல்முறை செக்ஸ் உறவு கொள்ளும்போது உங்களுக்கு அசௌகரியம் ஏற்பட்டால், தலையணை, செக்ஸ் டாய்ஸ் போன்றவற்றை பயன்படுத்தலாம். முதல்முறை செக்ஸ் உறவு வைத்துக் கொள்ளும் முன்பாக ரொமாண்டிக்கான சாங்ஸ், வீடியோ பார்ப்பது உங்கள் மனதில் ஆர்வத்தை தூண்டுவதாக அமையும்.

அமைதியான சூழல் : எந்தவித தொந்தரவு, இரைச்சல் இல்லாத அமைதியான இடத்தில் முதல் அனுபவத்தை முயற்சி செய்யவும். கார், சின்ன அறைகள் போன்ற இடங்களில் இதை நீங்கள் முயற்சி செய்தால் சௌகரியம் போதுமான அளவில் இருக்காது. அதுவே கூட அதிக வலி ஏற்படக் காரணமாகும். குறிப்பாக, முதல்முறை அதிக நேரமெடுத்து ரிலாக்ஸாக முயற்சிக்கலாம்.

இடைவெளி தேவை : முதல் அனுபவத்தின் போது வலி ஏற்படுவது இயற்கையே. அத்தகைய சமயத்தில் பதற்றம் அடைய வேண்டாம். கொஞ்சம் ஓய்வு எடுத்துக் கொண்டு, பின்னர் மீண்டும் முயற்சி செய்யலாம். அடுத்தடுத்து இடைவெளி விட்டு முயற்சி செய்யும் பட்சத்தில் உடலும், மனமும் அதற்கு முழுமையாக தயாராகிவிடும்.

தகவல் தொடர்பு அவசியம் : முதல் அனுபவம் முற்றிலும் புதுமையானது. ஆகவே, எது உங்களுக்கு சௌகரியமானதாக உள்ளது, எது வலியை தருகிறது, எதை செய்ய வேண்டும், எதை தவிர்க்க வேண்டும் என்று பார்ட்னருடன் மனம் விட்டு பேசுங்கள். உங்கள் உடல் தயாராகும் வரையில் பொறுமையாக முன்னேறிச் செல்ல அறிவுறுத்துங்கள்.