பற்கள் மஞ்சள் நிறத்தில் இருப்பது சங்கடத்தை தருகிறதா..? இந்த 7 உணவுகளை தவிருங்கள்..!

அகத்தின் அழகு, முகத்தில் தெரியும் என்பார்கள். அதாவது, நம் உடல் ஆரோக்கியத்துடன் இருக்கிறது என்பதற்கான அறிகுறி முகத்தில் தென்படுமாம். அத்தகைய முகத்தில், நம் மகிழ்ச்சியை வெளிப்படுத்தும் முதல் விஷயம் புன்சிரிப்பு தான். நம் அன்புக்குரியவர்களை, நம் மரியாதைக்கு உரியவர்களை நாம் பார்க்கும் தருணங்களில் சிறு புன்னகை செய்ய நாம் தவறுவதில்லை.

ஆனால், நம் பற்கள் மஞ்சள் நிறத்தில் இருந்தால், புன்னகை செய்வதற்கு கூட பெரும் தயக்கம் இருக்கும். சிலருக்கு மஞ்சள் கறை போல படிந்திருக்கும். இது நம் உடலில் நோய்கள் இருக்கின்றன என்பதற்கான அறிகுறி அல்ல. நாம் உண்ணும் உணவுகள் காரணமாகவே இத்தகைய கறைகள் ஏற்படுகின்றன. ஆம், நம் பற்கள் மஞ்சள் நிறத்தில் இருப்பதற்கு பல உணவுப் பொருள்கள் காரணமாக இருக்கின்றன. உணவில் மாற்றம் ஏற்படுத்தாமல், பற்களை வெண்மையாக மாற்றுவதற்கான மருந்துகள் அல்லது ப்ளீச் சிகிச்சை போன்றவற்றை மேற்கொண்டால் முழுமையான பலன்கள் கிடைக்காது. ஆகவே, பின்வரும் உணவுகளை நாம் தவிர்க்க வேண்டும்.

பிளாக் காஃபி : நம் உடலுக்கு புத்துணர்ச்சி அளிக்கக் கூடிய காஃபி என்பது நமக்கு தெரியும். காலையில் எழுந்தவுடன் ஒரு பிளாக் காஃபி அருந்துவதற்கு யாருக்குத்தான் விருப்பம் இருக்காது. ஆனால், காஃபியை ரசிக்கக் கூடிய நபர்களுக்கு கெட்ட செய்தியாக அமைவது இது ஒன்று தான். ஆம், நம் பற்களை மஞ்சள் நிறத்தில் மாற்றுவதில் பிளாக் காஃபிக்கு முக்கிய பங்கு உண்டு.

தேநீர் : காஃபிக்கு பதிலாக டீ அருந்தலாம் என நீங்கள் யோசித்தீர்கள் என்றால், அதும் தவறான விஷயம் தான். ஏனென்றால் தினசரி டீ அருந்துபவர்களுக்கும் மஞ்சள் நிற பற்கள் அமைய வாய்ப்பு இருக்கிறது. குறிப்பாக, பிளாக் டீ மற்றும் ஹெர்பல் டீ போன்றவற்றை நீங்கள் கட்டாயம் தவிர்க்க வேண்டும்.

சிவப்பு ஒயின் : ஒரு கிளாஸ் ஒயின் அருந்தினால் நம் உடலுக்கு எண்ணற்ற பலன் கிடைக்கும் என்று சொல்லப்படுவது உண்டு. ஆனால், ஒயினில் இடம்பெற்றுள்ள அமிலம் என்பது நம் பற்களில் மஞ்சள் கறையை உண்டு செய்யக் கூடியது ஆகும்.

கோக் : கருமை நிற சோடா எது ஒன்றை அருந்தினாலும், அது உங்கள் பற்களில் கறையை ஏற்படுத்தும் என்று நிபுணர்கள் எச்சரிக்கின்றனர்.

கோலாஸ் : கோடை காலத்தில் கோலாஸ் பானம் அருந்தாமல், அந்த பொழுது கழியாது. ஆனால், ஐஸ் நிரப்பிய இந்த பானத்தை அருந்துவதால் நம் பற்களில் நிச்சயமாக கறை படியும்.

புகையிலை : மென்னும் புகையிலை எடுத்துக் கொள்வது அல்லது புகை பிடிப்பது என எந்த ரூபத்தில் நீங்கள் புகையிலையை உபயோகித்தாலும் அது உங்கள் பற்களில் கறை படியச் செய்யும்.

சோயா சாஸ் : நமது நூடுல்ஸ், பாஸ்தா மற்றும் ஃபிரைடு ரைஸ், மஞ்சூரியன் போன்ற உணவுகளின் சமையலின்போது மணமூட்டியாக, சுவையூட்டியாக சேர்க்கப்படும் சோயா சாஸ் நமது பற்களில் கறையை உண்டு செய்யக் கூடும்.