தைராய்டு பாதிப்பு உள்ளவர்கள் கோடைக்காலத்தில் சாப்பிட வேண்டிய 8 உணவுகள்..!

சீரான, ஆரோக்கியமான உணவு எல்லோருக்கும் தேவை தான் என்றாலும், சில உடல்நலப் பிரச்சினைகளை எதிர்கொண்டிருப்பவர்களுக்கு அதற்கு உகந்த உணவுகளை எடுப்பது கட்டாயமாகிறது. அந்த வகையில் தைராய்டு பிரச்சினை இருப்பவர்கள் இந்த கோடை காலத்தில் எடுத்துக் கொள்ள வேண்டிய உணவுகள் குறித்து இங்கு பார்க்கலாம்.

அதற்கு முன்னதாக தைராய்டு என்றால் என்ன என்று தெரிந்து கொள்ள வேண்டும். தைராய்டு என்பது நம் தொண்டைப் பகுதியில் பட்டாம்பூச்சி போன்ற அமைப்பில் உள்ள சுரப்பி ஆகும். இது உடலுக்கு தேவையான ஹார்மோன்களை உற்பத்தி செய்கிறது. இந்த சுரப்பி பாதிக்கப்பட்டு, உடலுக்கு தேவையான ஹார்மோன்களை உற்பத்தி செய்ய முடியாமல் போனால் அதனை ஹைப்போதைராய்டிஸம் என்று குறிப்பிடுகின்றனர்.

பொதுவாக மைக்ரோவேவ் ஓவனில் சமைக்கப்பட்ட உணவுகள், பதப்படுத்தப்பட்ட பீட்சாக்கள் மற்றும் டோநட்ஸ் போன்றவை உடல் ஆரோக்கியத்திற்கு தீங்கானவை என்றாலும், தைராய்டு பிரச்சினை இருப்பவர்களுக்கு இது மிக அதிகமான விளைவுகளை ஏற்படுத்தக் கூடும்.

தைராய்டு பிரச்சினை இருப்பவர்கள் முழு தானிய உணவுகள், பதப்படுத்தப்படாத உணவுகள், காய்கறிகள் மற்றும் பழங்கள் போன்றவற்றுக்கு முக்கியத்துவம் கொடுக்க வேண்டும். 7 வகையான உணவுப் பட்டியல்  இதோ.

தைராய்டு குறைபாடு இருப்பவர்கள் பரங்கிக்காய் விதைகளை உணவில் சேர்த்துக் கொள்ளலாம். அதில் உடலுக்கு அத்தியாவசிய தேவையான ஜிங்க் சத்து உள்ளது. இது டி4 அளவை டி3 அளவாக மாற்றக் கூடியதாகும்.

அனைத்து வகை உணவிலும் சேர்த்துக் கொள்ள கறிவேப்பிலை நல்ல பலனை தரும். இதில் உள்ள காப்பர் சத்து தைராக்சின் ஹார்மோன் உற்பத்தியை ஊக்குவிக்கும். அதேபோல உடலில் கால்சியம் அளவுகளை கட்டுப்படுத்தி டி4 வகையை ரத்த அணுக்கள் உறிஞ்சுவதை தடுக்கும்.

கோடை காலத்தில் நல்ல குளிர்ச்சியை தரக் கூடிய சப்ஜா விதைகளை நீங்கள் எடுத்துக் கொள்ளலாம். இதில் ஒமேகா 3 ஃபேட்டி ஆசிட் உள்ளது. நமது மெட்டாபாலிச நடவடிக்கையை மேம்படுத்தி, தைராய்டு சுரப்பி சிறப்பாக வேலை செய்ய துணை நிற்கும்.

அமரந்த் எனப்படும் தண்டுக் கீரையை நீங்கள் உணவில் அதிகம் சேர்த்துக் கொள்ளலாம். இதில் டி4-ஐ டி3-ஆக மாற்றும் செலினியம் சத்து உள்ளது.

பாசிப்பருப்பு போன்ற மற்ற பருப்பு வகைகள் தைராய்டு பிரச்சினைக்கு உகந்த உணவுகளாகும். இது உங்கள் உடலுக்கு தேவையான அயோடின் சத்தை தருகிறது.

அயோடின் சத்தை புளிக்காத தயிர் மூலமாகவும் நீங்கள் பெறலாம். இதில் உள்ள ப்ரோபயாடிக் சத்துக்கள் உங்கள் குடல் நலனை மேம்படுத்தும். உங்கள் நோய் எதிர்ப்பு சக்தி கட்டமைப்பை சீரமைக்கும்.

மாதுளம் பழத்தை இந்த கோடை காலத்தில் அடிக்கடி எடுத்துக் கொள்ளலாம். அதில் உள்ள பாலிஃபினால் சத்தானது, உங்கள் உடலில் உள்ள நச்சுக்களை வெளியேற்ற உதவுகிறது. இது அழற்சியை குறைத்து, தைராய்டு சுரப்பியை பாதுகாக்க உதவுகிறது.