அடிக்கடி தலை வலிக்குதா..? இந்த சத்து குறைபாடு கூட காரணமாக இருக்கலாம்..!

தனக்குள் ஏற்படுகின்ற மாற்றங்களை ஒளிவு, மறைவின்றி வெளிப்படுத்துகின்ற கட்டமைப்பை கொண்டது தான் நமது உடல். உடல் வெளிப்படுத்துகின்ற மொழியை நீங்கள் புரிந்து கொள்ள தொடங்கிவிட்டால் எத்தகைய நோய் அல்லது குறைபாடுகளையும் நீங்கள் ஆரம்ப நிலையிலேயே கண்டறிய முடியும்.

அந்த வகையில் உடலில் வைட்டமின் பி12 சத்து குறைபாடு இருக்கிறது என்பதையும் சில அறிகுறிகள் மூலமாக நாம் தெரிந்து கொள்ள முடியும். உடலில் சிவப்பணுக்களை கட்டமைப்பதிலும், மரபணுக்களை உருவாக்குவதிலும் வைட்டமின் பி12-இன் பங்கு மகத்துவமானது. நம் நரம்பிய கட்டமைப்பை ஊக்குவிக்கிறது மற்றும் மூளையின் நலனை காக்கிறது.

தலைவலி : உடலில் வைட்டமின் பி12 பற்றாக்குறை ஏற்படும்போது நரம்பியல் செயல்பாடுகள் பாதிக்கப்படும். மேலும் மூளையின் நலனை மேம்படுத்துகின்ற நரம்பு கட்டமைப்பு பாதிக்கப்படும்போது, அதன் எதிரொலியாக தலைவலி ஏற்படும். பி12 பற்றாக்குறை உள்ள மக்களை ஒப்பிடும்போது, இந்த சத்து நிறைவாக கொண்ட மக்களுக்கு மைக்ரைன் தலைவலி ஏற்படும் வாய்ப்பு குறைவு என்று ஆய்வு தெரிவிக்கிறது.

குழப்பம் மற்றும் கவனச்சிதறல் : விட்டமின் பி12 பற்றாக்குறை ஏற்படுவதன் எதிரொலியாக நரம்பியல் கட்டமைப்பு பாதிக்கப்படுவதால் ஏற்படும் மற்றொரு பிரச்சினை கவனச்சிதறல் ஆகும். இதனுடன் குழப்பம் உண்டாகலாம். இந்த சற்று பற்றாக்குறையால் மூளையின் செயல்பாடு பாதிக்கப்படும்போது ஞாபகமறதி ஏற்படலாம்.

சோர்வு : உடலில் ஆரோக்கியமான சிவப்பணுக்களை கட்டமைக்க பி12 அவசியமாகும். ஆக, இந்த சத்து குறைபாடு ஏற்படும்போது, அதன் எதிரொலியாக ரத்தச்சோகை உருவாகும். இந்த பிரதான அறிகுறி உடல் சோர்வு ஆகும். அன்றாட பணிகளை கூட செய்ய முடியாத அளவுக்கு மிகுதியான உடல் சோர்வு ஏற்படலாம்.

கை, கால் குத்தல் : உங்கள் கை, கால்களில் குண்டூசியால் சுறுக்கென்று குத்துவதை போன்ற உணர்வு, கைகள், உள்ளங்கை, கால், பாதங்கள் போன்ற இடங்களில் எரிச்சல் உணர்வு ஏற்படுவது போன்றவை வைட்டமின் பி12 சத்து பற்றாக்குறை அறிகுறியாகும். சிலருக்கு அரிப்பு, மிகுந்த வலி போன்ற தொந்தரவுகள் உண்டாகலாம்.

சரும நிற மாற்றம் : வைட்டமின் பி12 பற்றாக்குறையால் ரத்தச்சோகை ஏற்படும் நிலையில், அதன் எதிரொலியாக உடலில் உள்ள ஆரோக்கியமான சிவப்பணுக்களின் எண்ணிக்கை குறையத் தொடங்கும். இதனால், நமது சருமம் நிறம் இழந்து வெளிறிய மஞ்சள் நிறத்திற்கு மாறக்கூடும்.

வாய்ப்புண் : உங்கள் நாக்கில் வெடிப்பு தென்படுவது, ஈறுகளில் வெள்ளை, வெள்ளை திட்டுகளாய் தென்படுவது போன்றவை வாய்ப்புண் காரணமாக உண்டாகுபவையாகும். சிலருக்கு நாக்கு ரத்த சிவப்பில் மாறியிருக்கும். இதுபோன்ற அறிகுறிகள் இருந்தால் மருத்துவரை அணுகி வைட்டமின் பி12 சத்து குறைபாடு குறித்து பரிசோதனை செய்து கொள்ள வேண்டும்.